ਸਾਊਥ ਦੀਆਂ ਫਿਲਮਾਂ ਵਿੱਚ ਨਾਂਅ ਖੱਟਣ ਤੋਂ ਬਾਅਦ ਬਾਲੀਵੁੱਡ ਵਿੱਚ ਆਪਣੀ ਪਛਾਣ ਕਾਇਮ ਕਰ ਚੁੱਕੀ ਕ੍ਰਿਤੀ ਖਰਬੰਦਾ ਦੀਆਂ ਅਗਲੀਆਂ ਫਿਲਮਾਂ ਵਿੱਚ ‘ਹਾਊਸ ਫੁੱਲ 4’ ਅਤੇ ‘ਪਾਗਲਪੰਤੀ’ ਸ਼ਾਮਲ ਹਨ। ਕਰੀਅਰ ਵਿੱਚ ਅੱਜ ਤੱਕ ਦੀ ਆਪਣੀ ਸਫਲਤਾ ਦਾ ਸਿਹਰਾ ਉਹ ਆਪਣੀ ਮਿਹਨਤ ਨੂੰ ਦਿੰਦੀ ਅਤੇ ਕਹਿੰਦੀ ਹੈ, ‘‘ਮੈਂ ਕਿਸਮਤ ਦੀ ਥਾਂ ਮਿਹਨਤ ਨੂੰ ਮਹੱਤਵ ਦਿੰਦੀ ਹਾਂ। ਜੇ ਤੁਸੀਂ ਮਿਹਨਤ ਨਾ ਕਰੋਗੇ ਤਾਂ ਕਿਸਮਤ ਦਾ ਚੰਗਾ ਹੋਣ 'ਤੇ ਵੀ ਕੁਝ ਨਹੀਂ ਹੋਵੇਗਾ। ਸਾਕਾਰਾਤਮਕ ਵੰਡੋ, ਤਾਂ ਹੀ ਤੁਹਾਡੇ ਜੀਵਨ ਵਿੱਚ ਵੀ ਸਾਕਾਰਾਤਮਕਤਾ ਆਏਗੀ।” ਉਹ ਮੰਨਦੀ ਹੈ ਕਿ ਸਟਾਰ ਕਲਾਕਾਰਾਂ ਨਾਲ ਫਿਲਮਾਂ ਕਰਨ ਨਾਲ ਕਰੀਅਰ ਤੇਜ਼ੀ ਨਾਲ ਅੱਗੇ ਵਧਦਾ ਹੈ, ਪਰ ਉਸ ਦੀ ਰਾਏ ਵਿੱਚ ਚੰਗੀ ਸਕ੍ਰਿਪਟ ਵਾਲੀਆਂ ਘੱਟ ਫਿਲਮਾਂ ਕਰਨਾ ਵੱਧ ਫਾਇਦੇਮੰਦ ਹੈ, ਇਸ ਲਈ ਚੰਗੇ ਕੰਟੈਂਟ ਅਤੇ ਚੰਗੇ ਕਿਰਦਾਰ ਵਾਲੀਆਂ ਫਿਲਮਾਂ ਹੀ ਕਰਨਾ ਚਾਹੁੰਦੀ ਹੈ।
ਇੰਡਸਟਰੀ ਵਿੱਚ ਇੰਨੇ ਸਾਲ ਗੁਜ਼ਾਰ ਕੇ ਕ੍ਰਿਤੀ ਅਭਿਨੈ ਦੀ ਸ਼ੁਰੂਆਤ ਬਾਰੇ ਦੱਸਦੀ ਹੈ, ‘‘ਮੈਂ ਪੰਜਾਬਣ ਹਾਂ ਦਿੱਲੀ ਦੀ, ਜਦੋਂ ਤਿੰਨ ਸਾਲ ਦੀ ਸੀ, ਉਦੋਂ ਸਾਡਾ ਪਰਵਾਰ ਬੰਗਲੌਰ ਚਲਾ ਗਿਆ ਸੀ। ਮੇਰੀ ਪੜ੍ਹਾਈ ਲਿਖਾਈ ਤੇ ਪਾਲਣ-ਪੋਸ਼ਣ ਉਥੇ ਹੋਇਆ। ਮੈਂ ਆਪਣੀ ਦਾਦੀ ਕਾਰਨ ਚਾਰ ਸਾਲ ਦੀ ਉਮਰ ਤੋਂ ਮਾਡਲਿੰਗ ਕਰਨ ਲੱਗੀ ਸੀ। ਜਦੋਂ ਮੈਂ 18 ਦੀ ਹੋਈ ਤਾਂ ਮੇਰੇ ਇੱਕ ਪ੍ਰੋਡਕਟ ਦੀ ਮਾਡਲਿੰਗ ਦਾ ਪੋਸਟਰ ਦੇਖ ਕੇ ਤੇਲਗੂ ਫਿਲਮ ‘ਬੋਨੀ’ ਦੇ ਨਿਰਦੇਸ਼ਕ ਨੇ ਫੋਨ ਉਤੇ ਮੈਨੂੰ ਫਿਲਮ ਦਾ ਆਫਰ ਦਿੱਤਾ, ਜਿਸ ਨੂੰ ਮੈਂ ਮਨ੍ਹਾ ਕਰ ਦਿੱਤਾ ਕਿਉਂਕਿ ਉਨ੍ਹੀਂ ਦਿਨੀਂ ਮੈਂ ਵਿਆਹ ਦੇ ਸੁਫਨੇ ਦੇਖ ਰਹੀ ਸੀ।” ਕ੍ਰਿਤੀ ਨੇ ਕਿਹਾ, ‘‘ਉਸ ਸਮੇਂ ਮੋਬਾਈਲ ਦਾ ਜ਼ਮਾਨਾ ਨਹੀਂ ਸੀ, ਇਸ ਲਈ ਉਸ ਨਿਰਦੇਸ਼ਕ ਨੇ ਸਾਡੇ ਲੈਂਡਲਾਈਨ ਨੰਬਰ 'ਤੇ ਕਈ ਵਾਰ ਫੋਨ ਕੀਤਾ। ਉਦੋਂ ਮੇਰੀ ਮਾਂ ਅਤੇ ਦਾਦੀ ਨੇ ਕਿਹਾ ਕਿ ਇੰਨੇ ਪਿਆਰ ਨਾਲ ਫਿਲਮ ਦਾ ਆਫਰ ਦੇ ਰਿਹਾ ਹੈ, ਨਾਂਹ ਨਾ ਕਰ। ਇੱਕ ਫਿਲਮ ਕਰ ਲਓ, ਹੋਰ ਨਾ ਕਰੀਂ। ਮੈਂ ਫਿਲਮ ਕੀਤੀ, ਪਰ ਫਲਾਪ ਰਹੀ। ਮੈਂ ਫਿਲਮਾਂ ਨੂੰ ਬਾਏ-ਬਾਏ ਕਹਿ ਕੇ ਪੜ੍ਹਾਈ ਪੂਰੀ ਕਰਨ ਲੱਗੀ, ਪਰ ਫਿਲਮ ਦੇ ਆਫਰ ਆਉਣੇ ਬੰਦ ਨਹੀਂ ਹੋਏ। ਇਸ ਲਈ ਇੱਕ ਸਾਲ ਬਾਅਦ ਮੈਂ ਦੁਬਾਰਾ ਫਿਲਮਾਂ ਕਰਨ ਲੱਗੀ ਅਤੇ ਉਦੋਂ ਤੋਂ ਇਹ ਸਿਲਸਿਲਾ ਜਾਰੀ ਹੈ।” ਅਭਿਨੇਤਰੀ ਬਣਨ ਤੋਂ ਬਾਅਦ ਖੁਦ 'ਚ ਆਏ ਬਦਲਾਅ 'ਤੇ ਉਹ ਕਹਿੰਦੀ ਹੈ, ‘‘ਜ਼ਿੰਦਗੀ 'ਚ ਸਭ ਤੋਂ ਵੱਡਾ ਬਦਲਾਅ ਇਹ ਕਿ ਮੇਰੇ ਮਾਂ ਪਿਓ ਨੂੰ ਮੇਰੇ ਉਤੇ ਮਾਣ ਹੋਣ ਲੱਗਾ। ਅਸੀਂ ਮੱਧਵਰਗੀ ਪਰਵਾਰ ਤੋਂ ਹਾਂ। ਮੇਰੇ ਹੀਰੋਇਨ ਬਣਨ ਤੋਂ ਬਾਅਦ ਮੇਰੇ ਮਾਤਾ ਪਿਤਾ ਨੇ ਪਹਿਲੀ ਵਾਰ ਬਿਜ਼ਨਸ ਕਲਾਸ ਵਿੱਚ ਹਵਾਈ ਯਾਤਰਾ ਕੀਤੀ ਤਾਂ ਉਨ੍ਹਾਂ ਨੂੰ ਆਪਣੀ ਬੇਟੀ 'ਤੇ ਮਾਣ ਹੋਇਆ। ਅਸੀਂ ਤਾਂ ਕਦੇ ਹਵਾਈ ਜਹਾਜ਼ ਵਿੱਚ ਚੜ੍ਹਨ ਦਾ ਸੁਪਨਾ ਵੀ ਨਹੀਂ ਦੇਖਿਆ ਸੀ।”