ਨਵੀਂ ਦਿੱਲੀ, 15 ਮਈ (ਪੋਸਟ ਬਿਊਰੋ)- ਪੰਜ ਸਾਲ ਤੋਂ ਫਰਾਰ ਪਾਕਿਸਤਾਨੀ ਅੱਤਵਾਦੀ ਸੰਗਠਨ ਜੈਸ਼-ਏ-ਮੁਹੰਮਦ ਦੇ ਅੱਤਵਾਦੀ ਅਬਦੁਲ ਮਜੀਦ ਬਾਬਾ ਨੂੰ ਦਿੱਲੀ ਪੁਲਸ ਨੇ ਸ੍ਰੀਨਗਰ ਤੋਂ ਗ੍ਰਿਫਤਾਰ ਕੀਤਾ ਹੈ। ਮਜੀਦ ਨੂੰ 2007 ਵਿੱਚ ਤਿੰਨ ਹੋਰਾਂ ਅੱਤਵਾਦੀਆਂ ਦੇ ਨਾਲ ਦਿੱਲੀ ਵਿੱਚ ਗ੍ਰਿਫਤਾਰ ਕੀਤਾ ਸੀ, ਪਰ 2013 ਵਿੱਚ ਹੇਠਲੀ ਅਦਾਲਤ ਨੇ ਮਜੀਦ ਸਮੇਤ ਤਿੰਨ ਅੱਤਵਾਦੀ ਬਰੀ ਕਰ ਦਿੱਤੇ ਸਨ, ਜਦ ਕਿ ਇੱਕ ਨੂੰ ਸਜ਼ਾ ਹੋਈ ਸੀ।
ਸਾਲ 2014 ਵਿੱਚ ਹਾਈ ਕੋਰਟ ਨੇ ਹੇਠਲੀ ਅਦਾਲਤ ਦਾ ਫੈਸਲਾ ਪਲਟ ਕੇ ਇਨ੍ਹਾਂ ਤਿੰਨਾਂ ਨੂੰ ਸਜ਼ਾ ਸੁਣਾਈ ਸੀ। ਦਿੱਲੀ ਪੁਲਸ ਨੇ ਇਨ੍ਹਾਂ 'ਤੇ ਦੋ-ਦੋ ਲੱਖ ਰੁਪਏ ਦਾ ਇਨਾਮ ਵੀ ਐਲਾਨ ਕਰ ਦਿੱਤਾ ਸੀ। ਡੀ ਸੀ ਪੀ ਸਪੈਸ਼ਲ ਸੈੱਲ ਸੰਜੀਵ ਕੁਮਾਰ ਯਾਦਵ ਦੇ ਮੁਤਾਬਕ 2007 ਨੂੰ ਸਪੈਸ਼ਲ ਸੈੱਲ ਨੂੰ ਸੂਚਨਾ ਮਿਲੀ ਕਿ ਜੈਸ਼ ਦੇ ਕੁਝ ਅੱਤਵਾਦੀ ਦਿੱਲੀ ਦਹਿਲਾਉਣ ਦੀ ਸਾਜ਼ਿਸ਼ ਕਰ ਰਹੇ ਹਨ। ਸੈਲ ਦੀ ਟੀਮ ਨੇ ਮੁਠਭੇੜ ਦੇ ਬਾਅਦ ਪਾਕਿਸਤਾਨ ਨਿਵਾਸੀ ਸ਼ਾਹਿਦ ਗਫੂਰ, ਬਾਰਾਮੂਲਾ ਦੇ ਬਸ਼ੀਰ ਅਹਿਮਦ ਪੋਨੂੰ, ਕੁਪਵਾੜਾ ਦੇ ਫੈਆਜ਼ ਅਹਿਮਦ ਲੋਨ ਅਤੇ ਸੋਪੋਰ ਦੇ ਅਬਦੁਲ ਮਜੀਦ ਨੂੰ ਗ੍ਰਿਫਤਾਰ ਕੀਤਾ ਸੀ।