ਜਲੰਧਰ, 14 ਮਈ (ਪੋਸਟ ਬਿਊਰੋ)- ਫਾਦਰ ਐਂਥਨੀ ਦੇ ਪ੍ਰਤਾਪਪੁਰਾ ਵਾਲੇ ਘਰ ਤੋਂ 5.78 ਕਰੋੜ ਲੁੱਟਣ ਵਾਲੇ ਏ ਐੱਸ ਆਈ ਜੋਗਿੰਦਰ ਸਿੰਘ ਅਤੇ ਏ ਐੱਸ ਆਈ ਰਾਜਪ੍ਰੀਤ ਸਿੰਘ ਜੇਲ੍ਹ ਭੇਜ ਦਿੱਤੇ ਗਏ ਹਨ। ਕੱਲ੍ਹ ਐੱਸ ਆਈ ਟੀ ਨੇ ਉਨ੍ਹਾਂ ਨੂੰ ਮੋਹਾਲੀ ਕੋਰਟ ਵਿੱਚ ਪੇਸ਼ ਕੀਤਾ, ਜਿੱਥੋਂ 14 ਦਿਨ ਦੀ ਨਿਆਇਕ ਹਿਰਾਸਤ ਵਿੱਚ ਉਨ੍ਹਾਂ ਨੂੰ ਜੇਲ੍ਹ ਭੇਜਣ ਦੇ ਹੁਕਮ ਦੇ ਦਿੱਤੇ ਗਏ। ਇਸ ਮਾਮਲੇ ਵਿੱਚ ਐੱਸ ਆਈ ਟੀ ਦੀ ਦੋਵੇਂ ਏ ਐੱਸ ਆਈਜ਼ ਤੋਂ ਜਾਂਚ ਕਰ ਚੁੱਕੀ ਹੈ।
ਇਸ ਤੋਂ ਬਾਅਦ ਇਸ ਕੈਸ਼ ਬਾਰੇ ਫਾਦਰ ਐਂਥਨੀ ਜਾਂਚ ਦੇ ਘੇਰੇ ਵਿੱਚ ਆ ਗਏ ਹਨ ਕਿਉਂਕਿ ਉਨ੍ਹਾ ਨੇ ਪਹਿਲਾਂ 6.65 ਕਰੋੜ ਰੁਪਏ ਦੀ ਲੁੱਟ ਦੱਸਿਆ ਸੀ, ਫਿਰ 5.78 ਕਰੋੜ ਦੀ ਲੁੱਟ ਦੀ ਗੱਲ ਕਹਿਣ ਲੱਗੇ। ਦੋਵਾਂ ਏ ਐੱਸ ਆਈ ਤੇ ਉਨ੍ਹਾਂ ਦੇ ਸਾਥੀਆਂ ਤੋਂ ਪੁਲਸ ਨੂੰ 4.51 ਕਰੋੜ ਰੁਪਏ ਹੀ ਮਿਲੇ। ਇਸ ਦੇ ਬਾਅਦ ਉਨ੍ਹਾਂ ਐੱਸ ਆਈ ਟੀ ਦੀ ਸਖਤੀ ਨਾਲ ਪੁੱਛਗਿੱਛ ਵਿੱਚ ਕਿਹਾ ਕਿ ਉਨ੍ਹਾਂ ਨੇ ਇੰਨਾ ਕੈਸ਼ ਲੁੱਟਿਆ ਸੀ। ਉਨ੍ਹਾਂ ਤੋਂ ਡੀ ਜੀ ਪੀ ਦਿਨਕਰ ਗੁਪਤਾ ਅਤੇ ਬਿਊਰੋ ਆਫ ਇਨਵੈਸਟੀਗੇਸ਼ਨ (ਕ੍ਰਾਈਮ) ਦੇ ਡਾਇਰੈਕਟਰ ਪ੍ਰਬੋਧ ਕੁਮਾਰ ਨੇ ਵੀ ਪੁੱਛਗਿੱਛ ਕੀਤੀ, ਪ੍ਰੰਤੂ ਕੁਝ ਨਹੀਂ ਨਿਕਲਿਆ। ਜੇ ਫਾਦਰ ਐਂਥਨੀ ਦਾ 5.78 ਕਰੋੜ ਦਾ ਦਾਅਵਾ ਸਹੀ ਹੈ ਤਾਂ ਸਵਾਲ ਹੈ ਕਿ ਬਾਕੀ ਦਾ ਲਗਭਗ ਸਵਾ ਕਰੋੜ ਰੁਪਿਆ ਕਿੱਥੇ ਗਿਆ। ਇਸ ਬਾਰੇ ਫਾਦਰ ਐਂਥਨੀ ਅਤੇ ਉਨ੍ਹਾਂ ਦੇ ਸਹਿਯੋਗੀ ਜਾਂਚ ਦੇ ਘੇਰੇ ਵਿੱਚ ਆ ਗਏ ਹਨ।
ਆਈ ਜੀ ਕਰਾਈਮ ਪੀ ਕੇ ਸਿਨਹਾ ਦੀ ਅਗਵਾਈ ਵਾਲੀ ਵਿਸ਼ੇਸ਼ ਜਾਂਚ ਟੀਮ (ਐੱਸ ਆਈ ਟੀ) ਨੂੰ ਇਸ ਕੇਸ ਵਿੱਚ ਜਲੰਧਰ ਦੇ ਪੁਲਸ ਕਮਿਸ਼ਨਰ ਗੁਰਪ੍ਰੀਤ ਸਿੰਘ ਭੁੱਲਰ ਦੀ ਜਾਂਚ ਰਿਪੋਰਟ ਦੀ ਉਡੀਕ ਹੈ। ਪੁਲਸ ਕਮਿਸ਼ਨਰ ਆਪਣੀ ਟੀਮ ਨਾਲ ਪਿਛਲੇ ਕਈ ਦਿਨਾਂ ਤੋਂ 5.78 ਕਰੋੜ ਦੇ ਮਾਮਲੇ ਵਿੱਚ ਫਾਦਰ ਐਂਥਨੀ ਅਤੇ ਉਨ੍ਹਾਂ ਦੇ ਕਰੀਬੀਆਂ ਦੇ ਬਿਆਨ ਦਰਜ ਕਰਨ ਦੇ ਨਾਲ ਕਿਤਾਬਾਂ ਤੇ ਸਟੇਸ਼ਨਰੀ ਵੇਚਣ ਦੇ ਕਾਰੋਬਾਰ ਦੇ ਦਸਤਾਵੇਜ਼ਾਂ ਦੀ ਵੀ ਜਾਂਚ ਕਰ ਰਹੇ ਹਨ। ਇਹ ਰਿਪੋਰਟ ਆਉਣਦੇ ਨਾਲ ਸਪੱਸ਼ਟ ਹੋਵੇਗਾ ਕਿ ਫਾਦਰ ਐਂਥਨੀ ਦਾ ਦਾਅਵਾ ਸੱਚਾ ਹੈ ਜਾਂ ਝੂਠਾ।