ਲੁਧਿਆਣਾ, 14 ਮਈ (ਪੋਸਟ ਬਿਊਰੋ)- ਫਤਿਹਗੜ੍ਹ ਸਾਹਿਬ ਦੇ ਕਾਂਗਰਸ ਉਮੀਦਵਾਰ ਡਾਕਟਰ ਅਮਰ ਸਿੰਘ ਦੇ ਹੱਕ ਵਿੱਚ ਹੋ ਰਹੀਆਂ ਰੈਲੀਆਂ ਵਿੱਚ ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਦੇ ਹੈਲੀਕਾਪਟਰ ਆ ਨਹੀਂ ਸਨ ਸਕੇ। ਦੋ ਦਿਨ ਪਹਿਲਾਂ ਸਾਹਨੇਵਾਲ ਦੇ ਕੋਹਾੜਾ ਦੀ ਰੈਲੀ ਵਿੱਚ ਕੈਪਟਨ ਅਮਰਿੰਦਰ ਸਿੰਘ ਨਾ ਆਏ ਤਾਂ ਕਾਂਗਰਸੀਆਂ ਦਾ ਦਾਅਵਾ ਸੀ ਕਿ ਏਅਰ ਟਰੈਫਿਕ ਕੰਟਰੋਲ ਤੋਂ ਉਨ੍ਹਾਂ ਦੇ ਹੈਲੀਕਾਪਟਰ ਨੂੰ ਪਟਿਆਲਾ ਤੋਂ ਉਡਾਣ ਦੀ ਮਨਜ਼ੂਰ ਨਹੀਂ ਦਿੱਤੀ। ਮਨਜ਼ੂਰੀ ਮਿਲਣ ਤੱਕ ਰੈਲੀ ਖਤਮ ਹੋ ਚੁੱਕੀ ਸੀ। ਕੱਲ੍ਹ ਖੰਨਾ ਵਿੱਚ ਡਾਕਟਰ ਅਮਰ ਸਿੰਘ ਦੇ ਹੱਕ ਵਿੱਚ ਦੂਸਰੀ ਰੈਲੀ ਤੋਂ ਪਹਿਲਾਂ ਵੀ ਪ੍ਰਸ਼ਾਸਨ ਨੇ ਕੈਪਟਨ ਅਮਰਿੰਦਰ ਸਿੰਘ ਦੇ ਹੈਲੀਕਾਪਟਰ ਦੀ ਮਨਜ਼ੂਰੀ ਰੱਦ ਕਰ ਦਿੱਤੀ। ਇਸ ਰੈਲੀ ਵਿੱਚ ਕਾਂਗਰਸ ਪ੍ਰਧਾਨ ਰਾਹੁਲ ਗਾਂਧੀ ਨੇ ਸ਼ਾਮਲ ਹੋਣਾ ਸੀ, ਇਸ ਲਈ ਕੈਪਟਨ ਦਾ ਰੈਲੀ ਵਿੱਚ ਪਹੁੰਚਣਾ ਜ਼ਰੂਰੀ ਸੀ। ਇਸ ਵਾਰ ਕੈਪਟਨ ਸੜਕ ਰਸਤੇ ਖੰਨਾ ਵਿੱਚ ਰੈਲੀ ਵਾਲੀ ਥਾਂ 'ਤੇ ਪਹੁੰਚੇ।
ਕੱਲ੍ਹ ਖੰਨਾ ਵਿੱਚ ਡਾਕਟਰ ਅਮਰ ਸਿੰਘ ਦੇ ਹੱਕ ਵਿੱਚ ਕਾਂਗਰਸ ਰੈਲੀ ਸੀ। ਇਸ ਦੇ ਲਈ ਰੈਲੀ ਵਾਲੀ ਜਗ੍ਹਾ ਨੇੜੇ ਮੋਹਨਪੁਰ ਵਿੱਚ ਹੈਲੀਪੈਡ ਬਣਾਇਆ ਸੀ। ਕਾਂਗਰਸ ਨੇ ਕੈਪਟਨ ਅਮਰਿੰਦਰ ਸਿੰਘ ਦੇ ਹੈਲੀਕਾਪਟਰ ਦੀ ਮੋਹਨਪੁਰ ਵਿੱਚ ਲੈਂਡਿੰਗ ਲਈ ਪ੍ਰਸ਼ਾਸਨ ਤੋਂ ਮਨਜ਼ੂਰੀ ਲਈ ਸੀ। ਦਸ ਸੀਟਰ ਹੈਲੀਕਾਪਟਰ ਵਿੱਚ ਕੈਪਟਨ ਦੇ ਨਾਲ ਲਾਲ ਸਿੰਘ, ਰਾਜਿੰਦਰ ਸਿੰਘ, ਖੂਬੀ ਰਾਮ, ਡਾਕਟਰ ਵਿਜੇ ਅਬਰੋਲ, ਰਵੀਨ ਠੁਕਰਾਲ ਅਤੇ ਨਿਰਵੈਨ ਸਿੰਘ ਦੇ ਆਉਣ ਦੀ ਮਨਜ਼ੂਰੀ ਲਈ ਗਈ ਸੀ। ਐਤਵਾਰ ਦੁਪਹਿਰ ਪ੍ਰਸ਼ਾਸਨ ਨੇ ਮਨਜ਼ੂਰੀ ਦਿੱਤੀ, ਪ੍ਰੰਤੂ ਸ਼ਾਮ ਨੂੰ ਪ੍ਰਸ਼ਾਸਨ ਨੇ ਮਨਜ਼ੂਰੀ ਰੱਦ ਕਰ ਦਿੱਤੀ। ਪ੍ਰਸ਼ਾਸਨ ਨੇ ਮਨਜ਼ੂਰੀ ਰੱਦ ਕਰਨ ਦੇ ਪਿੱਛੇ ਕਾਰਨ ਦੱਸਿਆ ਕਿ ਆਯੋਜਕਾਂ ਨੇ ਲੈਂਡਿੰਗ ਦਾ ਵੈਨਿਊ ਬਦਲ ਦਿੱਤਾ ਸੀ।
ਪਤਾ ਲੱਗਾ ਹੈ ਕਿ ਪਹਿਲਾਂ ਮੋਹਨਪੁਰ ਵਿੱਚ ਕੈਪਟਨ ਦਾ ਹੈਲੀਕਾਪਟਰ ਲੈਂਡ ਕਰਨਾ ਸੀ, ਪਰ ਬਾਅਦ ਵਿੱਚ ਇਹ ਹੈਲੀਪੈਡ ਰਾਹੁਲ ਗਾਂਧੀ ਲਈ ਰਾਖਵਾਂ ਕਰ ਦਿੱਤਾ ਗਿਆ। ਕੈਪਟਨ ਅਮਰਿੰਦਰ ਸਿੰਘ ਦੇ ਹੈਲੀਕਾਪਟਰ ਭੰਮੀ ਪਿੰਡ ਵਿੱਚ ਲੈਂਡਿੰਗ ਦੀ ਯੋਜਨਾ ਬਣਾਈ ਗਈ, ਪਰ ਪ੍ਰਸ਼ਾਸਨ ਨੇ ਜਗ੍ਹਾ ਬਦਲਣ ਨੂੰ ਮਨਜ਼ੂਰੀ ਨਹੀਂ ਦਿੱਤੀ।