* ਸਕਿਓਰਟੀ ਵਾਲਿਆਂ ਨੇ ਆਣ ਕੇ ਉਠਾਇਆ
ਬਠਿੰਡਾ, 13 ਮਈ, (ਪੋਸਟ ਬਿਊਰੋ)- ਪਾਰਲੀਮੈਂਟ ਚੋਣਾਂ ਲਈ ਬਠਿੰਡਾ ਵਿੱਚ ਅਕਾਲੀ-ਭਾਜਪਾ ਦੀ ਸਾਂਝੀ ਉਮੀਦਵਾਰ ਹਰਸਿਮਰਤ ਕੌਰ ਬਾਦਲ ਦੇ ਹੱਕ ਵਿੱਚ ਕੀਤੀ ਰੈਲੀ ਵੇਲੇ ਅਕਾਲੀ ਦਲ ਦੇ ਪ੍ਰਧਾਨ ਸੁਖਬੀਰ ਸਿੰਘ ਬਾਦਲ ਪ੍ਰੋਟੋਕਾਲ ਭੁਲਾ ਕੇ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਵਾਲੀ ਕੁਰਸੀ ਉੱਤੇ ਜਾ ਬੈਠੇ ਅਤੇ ਇਸ ਰੈਲੀ ਵਿੱਚਪੰਜਾਬ ਦੇ ਸਾਬਕਾ ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਬਾਦਲ ਨੂੰ ਬੋਲਣ ਦਾ ਮੌਕਾ ਹੀ ਨਹੀਂਮਿਲ ਸਕਿਆ।
ਅਸਲ ਵਿੱਚ ਹੋਇਆ ਇਹ ਕਿ ਮੰਚ ਉੱਤੇ ਲਾਈ ਗਈ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਦੀ ਕੁਰਸੀ ਦੇ ਇਕ ਪਾਸੇ ਸਾਬਕਾ ਮੁੱਖ ਮੰਤਰੀ ਬਾਦਲ ਦੀ ਕੁਰਸੀ ਤੇ ਦੂਸਰੇ ਪਾਸੇ ਅਕਾਲੀ ਦਲ ਦੇ ਪ੍ਰਧਾਨ ਸੁਖਬੀਰ ਸਿੰਘ ਬਾਦਲ ਦੀ ਕੁਰਸੀ ਸੀ। ਸੁਖਬੀਰ ਸਿੰਘ ਦੇ ਨਾਲ ਹਰਸਿਮਰਤ ਕੌਰ ਬਾਦਲ ਦੀ ਕੁਰਸੀ ਸੀ। ਕਰੀਬ 4.55 ਵਜੇ ਸੁਖਬੀਰ ਸਿੰਘ ਬਾਦਲ ਆਪਣੀ ਕੁਰਸੀ ਤੋਂ ਉਠ ਕੇ ਪ੍ਰਧਾਨ ਮੰਤਰੀ ਦੀ ਕੁਰਸੀ ਉੱਤੇ ਬੈਠ ਕੇ ਪ੍ਰਕਾਸ਼ ਸਿੰਘ ਬਾਦਲ ਨਾਲ ਗੱਲ ਕਰਨ ਲੱਗੇ। ਅਜੇ ਉਨ੍ਹਾਂ ਨੂੰ ਬੈਠਿਆਂ ਕੁਝ ਸੈਕੰਡ ਦਾ ਸਮਾਂ ਹੋਇਆ ਸੀ ਕਿ ਮੰਚ ਉੱਤੇ ਮੌਜੂਦ ਪ੍ਰਧਾਨ ਮੰਤਰੀ ਦਾ ਸੁਰੱਖਿਆ ਗਾਰਡ ਸੁਖਬੀਰ ਸਿੰਘ ਦੇ ਕੋਲ ਪਹੁੰਚਿਆ ਤੇ ਉਨ੍ਹਾਂ ਨੂੰ ਆਪਣੀ ਕੁਰਸੀ ਉੱਤੇਜਾਣਵਾਸਤੇ ਕਿਹਾ। ਸੁਖਬੀਰ ਸਿੰਘ ਬਾਦਲ ਤੁਰੰਤ ਪ੍ਰਧਾਨ ਮੰਤਰੀ ਵਾਲੀ ਕੁਰਸੀ ਤੋਂ ਉਠ ਕੇ ਆਪਣੀ ਕੁਰਸੀ ਉੱਤੇਜਾ ਬੈਠੇ।
ਅਗਲੀ ਗੱਲ ਇਹ ਹੋਈ ਕਿ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ 5.48 ਵਜੇ ਮੰਚ ਉੱਤੇ ਪਹੁੰਚੇ, ਉਨ੍ਹਾਂ ਦੇ ਪਹੁੰਚਣ ਦਾ ਸਮਾਂ 5.20 ਸੀ। ਜਦੋਂ ਉਹ ਆਏ ਤਾਂ ਸੁਖਬੀਰ ਸਿੰਘ ਬਾਦਲ ਭਾਸ਼ਣ ਕਰ ਰਹੇ ਸਨ। ਕੁਝ ਪਲਾਂ ਵਿੱਚ ਸੁਖਬੀਰ ਸਿੰਘ ਨੇ ਭਾਸ਼ਣ ਖਤਮ ਕਰ ਦਿੱਤਾ ਤਾਂ ਮੰਚ ਸੰਭਾਲ ਰਹੇ ਸਾਬਕਾ ਮੰਤਰੀ ਸਿਕੰਦਰ ਸਿੰਘ ਮਲੂਕਾ ਸਾਬਕਾ ਮੁੱਖ ਮੰਤਰੀ ਬਾਦਲ ਦਾ ਨਾਂ ਸੰਬੋਧਨ ਕਰਨ ਲਈ ਪੁਕਰਾਨ ਵਾਲੇ ਸਨ ਕਿ ਪ੍ਰਧਾਨ ਮੰਤਰੀ ਮੋਦੀ ਆਪਣੀ ਸੀਟ ਤੋਂ ਉੱਠੇ ਅਤੇ ਸੰਬੋਧਨ ਕਰਨ ਲਈ ਮਾਈਕ ਅੱਗੇ ਜਾ ਪਹੁੰਚੇ। ਮੰਚ ਉੱਤੇ ਮੌਜੂਦ ਸਾਰੇ ਆਗੂ ਦੇਖਦੇ ਰਹਿ ਗਏ ਤੇ ਇਸ ਤਰ੍ਹਾਂ ਇਸ ਰੈਲੀ ਵਿੱਚ ਸਾਬਕਾ ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਬਾਦਲ ਨੂੰ ਬੋਲਣ ਦਾ ਮੌਕਾ ਹੀ ਨਹੀਂ ਮਿਲਿਆ।