ਨਵੀਂ ਦਿੱਲੀ, 13 ਮਈ (ਪੋਸਟ ਬਿਊਰੋ)- ਭਾਰਤੀ ਰਿਜ਼ਰਵ ਬੈਂਕ ਨੇ ਨੇਤਰਹੀਣ ਲੋਕਾਂ ਨੂੰ ਨੋਟਾਂ ਦੀ ਪਛਾਣ ਵਿੱਚ ਮਦਦ ਕਰਨ ਲਈ ਇੱਕ ਮੋਬਾਈਲ ਐਪ ਲਿਆਉਣ ਦੀ ਤਜਵੀਜ਼ ਬਣਾਈ ਹੈ। ਅਜੇ ਤੱਕ ਭਾਰਤ ਵਿੱਚ 10 ਰੁਪਏ, 20 ਰੁਪਏ, 50 ਰੁਪਏ, 100 ਰੁਪਏ, 200 ਰੁਪਏ, 500 ਰੁਪਏ ਤੇ 2000 ਰੁਪਏ ਦੇ ਨੋਟ ਚੱਲਦੇ ਹਨ। ਇਨ੍ਹਾਂ ਤੋਂ ਇਲਾਵਾ ਭਾਰਤ ਸਰਕਾਰ ਇੱਕ ਰੁਪਏ ਦਾ ਨੋਟ ਵੀ ਜਾਰੀ ਕਰਦੀ ਹੈ।
ਨੋਟਾਂ ਦੀ ਪਛਾਣ ਕਰਨ ਵਿੱਚ ਨੇਤਰਹੀਣ ਲੋਕਾਂ ਦੀ ਮਦਦ ਲਈ ਇੰਟਾਗਲਿਓ ਪ੍ਰਿੰਟਿੰਗ ਯਾਨੀ ਉਭਰੇ ਰੂਪ ਨਾਲ ਛਪਾਈ 100 ਰੁਪਏ ਅਤੇ ਇਸ ਤੋਂ ਵੱਡੀ ਰਾਸ਼ੀ ਦੇ ਨੋਟ ਹੀ ਉਪਲਬਧ ਹਨ। ਰਿਜ਼ਰਵ ਬੈਂਕ ਨੇ ਮੋਬਾਈਲ ਐਪ ਬਣਾਉਣ ਲਈ ਤਕਨੀਕੀ ਕੰਪਨੀਆਂ ਤੋਂ ਕੁਟੇਸ਼ਨ ਮੰਗੀਆਂ ਹਨ। ਕੇਂਦਰੀ ਬੈਂਕ ਨੇ ਕਿਹਾ ਹੈ ਕਿ ਮੋਬਾਈਲ ਐਪ ਮਹਾਤਮਾ ਗਾਂਧੀ ਲੜੀ ਅਤੇ ਮਹਾਤਮਾ ਗਾਂਧੀ (ਨਵੀਂ) ਲੜੀ ਦੇ ਵੈਲਿਡ ਨੋਟਾਂ ਨੂੰ ਮੋਬਾਈਲ ਕੈਮਰੇ ਸਾਹਮਣੇ ਰੱਖਣ ਜਾਂ ਸਾਹਮਣੇ ਤੋਂ ਲੰਘਾ ਕੇ ਵੇਖਣ ਅਤੇ ਪਛਾਣਨ 'ਚ ਸਮਰੱਥ ਹੋਣਾ ਚਾਹੀਦਾ ਹੈ। ਇਸ ਤੋਂ ਇਲਾਵਾ ਇਹ ਮੋਬਾਈਲ ਐਪ ਕਿਸੇ ਵੀ ਐਪ ਸਟੋਰ ਵਿੱਚ ਵਾਇਸ ਨਾਲ ਲੱਭੇ ਜਾਣ ਲਾਇਕ ਹੋਣਾ ਚਾਹੀਦਾ ਹੈ। ਰਿਜ਼ਰਵ ਬੈਂਕ ਨੇ ਕਿਹਾ ਕਿ ਐਪ ਨੂੰ ਦੋ ਸੈਕਿੰਡ 'ਚ ਨੋਟ ਦੀ ਪਛਾਣ ਕਰਨ ਅਤੇ ਬਿਨਾਂ ਇੰਟਰਨੈਟ ਦੇ ਕੰਮ ਕਰਨ 'ਚ ਸਮਰੱਥ ਹੋਣਾ ਚਾਹੀਦਾ ਹੈ। ਇਨ੍ਹਾਂ ਤੋਂ ਇਲਾਵਾ ਐਪ ਬਹੁ-ਭਾਸ਼ੀ ਅਤੇ ਆਵਾਜ਼ ਨਾਲ ਨੋਟੀਫਿਕੇਸ਼ਨ ਦੇਣ ਲਾਇਕ ਹੋਣਾ ਚਾਹੀਦਾ ਹੈ। ਘੱਟ ਤੋਂ ਘੱਟ ਐਪ ਹਿੰਦੀ ਤੇ ਅੰਗਰੇਜ਼ੀ ਵਿੱਚ ਹੋਣਾ ਹੀ ਚਾਹੀਦਾ ਹੈ। ਦੇਸ਼ ਵਿੱਚ 80 ਲੱਖ ਲੋਕ ਹਨ, ਜੋ ਨੇਤਰਹੀਣ ਹਨ ਜਾਂ ਫਿਰ ਜਿਨ੍ਹਾਂ ਨੂੰ ਦੇਖਣ 'ਚ ਮੁਸ਼ਕਲ ਹੁੰਦੀ ਹੈ। ਰਿਜ਼ਰਵ ਬੈਂਕ ਦੇ ਇਸ ਕਦਮ ਨਾਲ ਇਨ੍ਹਾਂ ਲੋਕਾਂ ਨੂੰ ਮਦਦ ਮਿਲੇਗੀ।