ਯੂ ਐਨ, 3 ਅਕਤੂਬਰ (ਪੋਸਟ ਬਿਊਰੋ)- ਯੂ ਐਨ 'ਚ ਮਾਲਦੀਵ ਨੇ ਸਥਾਈ ਪ੍ਰਤੀਨਿਧ ਅਲੀ ਨਸੀਰ ਮੁਹੰਮਦ ਨੇ ਵਿਸਵ ਸੰਸਥਾ ਨੂੰ ਵਿਸ਼ਵਾਸ ਦਿੱਤਾ ਹੈ ਕਿ ਉਨ੍ਹਾਂ ਦੇ ਦੇਸ਼ 'ਚ ਵਿਰੋਧੀ ਨੇਤਾ ਇਬਰਾਹਿਮ ਸਾਲੇਹ ਦਾ ਸੱਤਾ ਤਬਾਦਲਾ ਸ਼ਾਂਤੀ ਪੂਰਵਕ ਕੀਤਾ ਜਾ ਰਿਹਾ ਹੈ। ਸਾਲੇਹ ਪਿਛਲੇ ਮਹੀਨੇ ਹੋਈਆਂ ਚੋਣਾਂ 'ਚ ਰਾਸ਼ਟਰਪਤੀ ਚੁਣੇ ਗਏ ਸੀ।
ਨਸੀਰ ਦਾ ਇਹ ਬਿਆਨ ਉਨ੍ਹਾਂ ਖਬਰਾਂ ਦੋਰਾਨ ਆਇਆ ਹੈ, ਜਿਨ੍ਹਾਂ 'ਚ ਵਿਰੋਧੀਆਂ ਨੇ ਇਹ ਦਾਅਵਾ ਕੀਤਾ ਸੀ ਕਿ ਰਾਸ਼ਟਰਪਤੀ ਅਬਦੁੱਲਾ ਯਾਮੀਨ ਹਾਰ ਦੇ ਬਾਵਜੂਦ ਸੱਤਾ 'ਚ ਰਹਿਣ ਦੀ ਕੋਸ਼ਿਸ਼ ਕਰ ਰਹੇ ਹਨ। ਵਿਰੋਧੀਆਂ ਨੇ ਸ਼ਾਂਤੀ ਨਾਲ ਸੱਤਾ ਦੇ ਤਬਾਦਲੇ ਲਈ ਅੰਤਰਰਾਸ਼ਟਰੀ ਜਥੇਬੰਦੀ ਤੋਂ ਮਦਦ ਦੀ ਗੁਹਾਰ ਵੀ ਲਾਈ ਸੀ। ਯੂ ਐਨ ਜਨਰਲ ਅਸੈਂਬਲੀ ਵਿੱਚ ਬੀਤੇ ਦਿਨੀਂ ਇਕ ਉਚ ਪੱਧਰੀ ਚਰਚਾ ਦੌਰਾਨ ਨਸੀਰ ਨੇ ਕਿਹਾ ਕਿ ਮਾਲਦੀਵ ਲਈ 23 ਸਤੰਬਰ ਦਾ ਦਿਨ ਅਸਾਧਾਰਨ ਸੀ। ਇਸ ਦਿਨ ਰਾਸ਼ਟਰਪਤੀ ਚੋਣਾਂ ਹੋਈਆਂ ਸੀ। ਇਹ ਅਜਿਹਾ ਸਮਾਂ ਹੈ, ਜਿਸ ਉੱਤੇ ਮਾਲਦੀਪ ਦਾ ਹਰ ਨੌਜਵਾਨ ਮਾਣ ਕਰ ਸਕਦਾ ਹੈ ਕਿ ਸਾਡੇ ਦੇਸ਼ ਨੇ ਕਿੰਨੀ ਤਰੱਕੀ ਕੀਤੀ ਹੈ। ਚੋਣਾਂ ਦੇ ਬਾਅਦ ਮਾਲਦੀਵ 'ਚ ਇਕ ਚੁਣੀ ਹੋਈ ਸਰਕਾਰ ਦੂਸਰੀ ਨਵੀਂ ਸਰਕਾਰ ਨੂੰ ਸੱਤਾ ਸੌਂਪ ਰਹੀ ਹੈ। ਬੀਤੇ ਸ਼ਨਿਚਰਵਾਰ ਚੋਣ ਕਮਿਸ਼ਨ ਨੇ ਮਾਲਦੀਵ ਡੈਮੋਕ੍ਰੇਟਿਕ ਪਾਰਟੀ ਦੇ ਉਮੀਦਵਾਰ ਸੋਲਿਹ ਨੂੰ ਜੇਤੂ ਐਲਾਨਿਆ ਸੀ।