ਨਵੀਂ ਦਿੱਲੀ, 24 ਅਪ੍ਰੈਲ (ਪੋਸਟ ਬਿਊਰੋ)- ਬੂਟਿਆਂ ਨੂੰ ਸਾਡੇ ਵਾਤਾਵਰਣ ਲਈ ਵਰਦਾਨ ਮੰਨਿਆ ਜਾਂਦਾ ਹੈ। ਇਨ੍ਹਾਂ ਤੋਂ ਬਿਨਾਂ ਧਰਤੀ 'ਤੇ ਜੀਵਨ ਸੰਭਵ ਨਹੀਂ, ਕਿਉਂਕਿ ਇਨ੍ਹਾਂ ਵਿੱਚੋਂ ਨਿਕਲੀ ਆਕਸੀਜਨ ਹੀ ਸਾਨੂੰ ਜੀਵਨ ਦਿੰਦੀ ਹੈ, ਪਰ ਕੁਝ ਦਰੱਖਤ ਅਜਿਹੇ ਵੀ ਹੁੰਦੇ ਹਨ, ਜੋ ਇਨਸਾਨ ਲਈ ਜਾਨਲੇਵਾ ਹੁੰਦੇ ਹਨ।
ਇੱਕ ਦਰੱਖਤ ਅਜਿਹਾ ਵੀ ਹੈ, ਜੋ ਇਨਸਾਨ ਦੇ ਜੀਵਨ ਲਈ ਖਤਰਾ ਹੈ। ਇਸ ਨੂੰ ਸੁਸਾਈਡ ਟ੍ਰੀ ਯਾਨੀ ਸਰਬੇਰਾ ਓਡੋਲਮ ਨਾਂਅ ਨਾਲ ਜਾਣਿਆ ਜਾਂਦਾ ਹੈ। ਇਹ ਦਰੱਖਤ ਦੇਖਣ 'ਚ ਜਿੰਨਾ ਸੋਹਣਾ ਹੈ, ਓਨਾ ਹੀ ਖਤਰਨਾਕ ਵੀ ਹੈ। ਕਿਹਾ ਜਾਂਦਾ ਹੈ ਕਿ ਇਹ ਦਰੱਖਤ ਕਿੰਗ ਕੋਬਰਾ ਤੋਂ ਵੱਧ ਖਤਰਨਾਕ ਹੈ। ਇਹ ਇੰਨਾ ਜ਼ਹਿਰੀਲਾ ਹੁੰਦਾ ਹੈ ਕਿ ਕੁਝ ਮਿੰਟਾਂ 'ਚ ਇਨਸਾਨ ਨੂੰ ਮਾਰ ਸਕਦਾ ਹੈ। ਭਾਰਤ ਅਤੇ ਦੱਖਣ-ਪੂਰਬ ਏਸ਼ੀਆ ਦੇ ਕੁਝ ਦੇਸ਼ਾਂ ਵਿੱਚ ਪਾਇਆ ਜਾਣ ਵਾਲਾ ਸਰਬੇਰਾ ਓਡੋਲਮ ਦਰੱਖਤ ਜ਼ਹਿਰੀਲਾ ਅਤੇ ਖਤਰਨਾਕ ਹੈ। ਕਿਹਾ ਜਾਂਦਾ ਹੈ ਕਿ ਹਰ ਹਫਤੇ ਇਸ ਬੂਟੇ ਨਾਲ ਘੱਟ ਤੋਂ ਘੱਟ ਇੱਕ ਵਿਅਕਤੀ ਦੀ ਮੌਤ ਹੋ ਜਾਂਦੀ ਹੈ। ਇਸ ਬੂਟੇ ਬਾਰੇ ਕਈ ਖੋਜਾਂ ਵੀ ਕੀਤੀਆਂ ਜਾ ਚੁੱਕੀਆਂ ਹਨ। ਖੋਜੀਆਂ ਮੁਤਾਬਕ ਵਿਸ਼ਵ ਵਿੱਚ ਹੋਰ ਜ਼ਹਿਰੀਲੇ ਬੂਟਿਆਂ ਦੇ ਮੁਕਾਬਲੇ ਸਰਬੇਰਾ ਓਡੋਲਮ ਵੱਧ ਜ਼ਹਿਰੀਲਾ ਹੈ। ਇਸ ਦੇ ਬੀਜ ਵਿੱਚ ਸਰਬੇਰੀਨ ਨਾਂਅ ਦਾ ਤੱਤ ਹੁੰਦਾ ਹੈ, ਜੋ ਜ਼ਹਿਰੀਲਾ ਹੈ। ਇਸ ਨਾਲ ਸਰੀਰ ਵਿੱਚ ਜਲਣ, ਸਿਰਦਰਦ, ਉਲਟੀਆਂ, ਅਨਿਯਮਿਤ ਧੜਕਣ ਅਤੇ ਡਾਇਰੀਆਂ ਵਰਗੀ ਪ੍ਰੇਸ਼ਾਨੀ ਹੋ ਸਕਦੀ ਹੈ। ਇਸ ਦੇ ਵਰਤਣ ਤੋਂ ਕੁਝ ਘੰਟਿਆਂ ਦੇ ਅੰਦਰ ਇਨਸਾਨ ਦੀ ਮੌਤ ਹੋ ਜਾਂਦੀ ਹੈ। ਕਿਹਾ ਜਾਂਦਾ ਹੈ ਕਿ ਇਸ ਦਾ ਨਿਸ਼ਾਨ ਲੱਭਣਾ ਬਹੁਤ ਹੀ ਮੁਸ਼ਕਲ ਹੁੰਦਾ ਹੈ।