ਨਵੀਂ ਦਿੱਲੀ, 24 ਅਪ੍ਰੈਲ (ਪੋਸਟ ਬਿਊਰੋ)- ਭਾਰਤ ਦੇ ਸਟਾਰ ਪਹਿਲਵਾਨ ਬਜਰੰਗ ਪੂਨੀਆ ਨੇ ਆਪਣੀ ਸ੍ਰੇਸ਼ਟਤਾ ਨੂੰ ਕਾਇਮ ਰੱਖਦੇ ਹੋਏ ਚੀਨ 'ਚ ਚੱਲਦੀ ਏਸ਼ੀਆਈ ਕੁਸ਼ਤੀ ਚੈਂਪੀਅਨਸ਼ਿਪ ਦੇ 65 ਕਿਲੋਗਰਾਮ ਫ੍ਰੀ ਸਟਾਈਲ ਵਰਗ ਵਿੱਚ ਕੱਲ੍ਹ ਸੋਨ ਤਮਗਾ ਜਿੱਤ ਲਿਆ, ਜਦ ਕਿ ਪ੍ਰਵੀਨ ਰਾਣਾ ਨੂੰ 79 ਕਿਲੋਗਰਾਮ ਵਿੱਚ ਚਾਂਦੀ ਅਤੇ ਸਤਿਆਵ੍ਰਤ ਕਾਦਿਆਨ ਨੂੰ 97 ਕਿਲੋਗਰਾਮ ਵਿੱਚ ਕਾਂਸੀ ਤਮਗੇ ਨਾਲ ਸਬਰ ਕਰਨਾ ਪਿਆ।
ਕਾਮਨਵੈੱਲਥ ਅਤੇ ਏਸ਼ੀਆਈ ਖੇਡਾਂ ਦੇ ਸੋਨ ਤਮਗਾ ਜੇਤੂ ਅਤੇ ਵਿਸ਼ਵ ਚੈਂਪੀਅਨਸ਼ਿਪ ਵਿੱਚ ਚਾਂਦੀ ਤਮਗਾ ਜੇਤੂ ਬਜਰੰਗ ਨੇ ਫਾਈਨਲ ਵਿੱਚ ਕਜ਼ਾਕਿਸਤਾਨ ਦੇ ਸਯਾਤਬੇਕ ਓਕਾਸੋਵ ਨੂੰ 12-7 ਨਾਲ ਹਰਾਇਆ। ਉਸ ਦੇ ਸੋਨਾ ਜਿੱਤਦੇ ਹੀ ਉਸ ਦੇ ਹਰਿਆਣਾ ਦੇ ਸੋਨੀਪਤ ਵਿੱਚ ਯੋਗੇਸ਼ਵਰ ਦੱਤ ਅਖਾੜੇ 'ਚ ਖੁਸ਼ੀ ਦੀ ਲਹਿਰ ਦੌੜ ਗਈ। ਬਜਰੰਗ ਦੇ ਗੁਰੂ ਯੋਗੇਸ਼ਵਰ ਤੇ ਅਖਾੜੇ ਦੇ ਕੋਚ ਦਰੋਣਾਚਾਰੀਆ ਐਵਾਰਡੀ ਰਾਮਫਲ ਨੇ ਬਜਰੰਗ ਨੂੰ ਇਸ ਪ੍ਰਾਪਤੀ ਦੀ ਵਧਾਈ ਦਿੱਤੀ ਹੈ।
79 ਕਿਲੋਗਰਾਮ ਵਿੱਚ ਪ੍ਰਵੀਨ ਰਾਣਾ ਨੇ ਸ਼ਾਨਦਾਰ ਪ੍ਰਦਰਸ਼ਨ ਕੀਤਾ ਅਤੇ ਫਾਈਨਲ ਵਿੱਚ ਜਗ੍ਹਾ ਬਣਾ ਲਈ, ਪਰ ਉਸ ਨੂੰ ਚਾਂਦੀ ਤਮਗੇ ਨਾਲ ਸਬਰ ਕਰਨਾ ਪਿਆ। ਰਾਣਾ ਨੂੰ ਫਾਈਨਲ ਵਿੱਚ ਬਹਿਮਨ ਮੁਹੰਮਦ ਤੈਮੂਰੀ ਹੱਥੋਂ 0-3 ਨਾਲ ਹਾਰ ਮਿਲੀ। ਭਾਰਤ ਦੇ ਸਤਿਆਵ੍ਰਤ ਕਾਦਿਆਨ 97 ਕਿਲੋਗਰਾਮ ਵਰਗ ਦੇ ਕਾਂਸੀ ਤਮਗਾ ਮੁਕਾਬਲੇ ਵਿੱਚ ਪਹੁੰਚਿਆ ਤੇ ਉਸ ਨੇ ਚੀਨ ਦੇ ਹਾਓਬਿਨ ਗਾਓ ਨੂੰ 8-2 ਨਾਲ ਹਰਾਕੇ ਕਾਂਸੀ ਤਮਗਾ ਜਿੱਤਿਆ। ਰਵੀ ਕੁਮਾਰ ਨੇ 57 ਕਿਲੋਗਰਾਮ ਵਰਗ ਵਿੱਚ ਰੇਪਚੇਜ਼ ਵਿੱਚ ਤਾਈਪੇ ਦੇ ਚਿਯਾ ਸੋ ਲਿਊ ਨੂੰ 4-0 ਨਾਲ ਹਰਾ ਕੇ ਕਾਂਸੀ ਤਮਗਾ ਮੁਕਾਬਲੇ ਵਿੱਚ ਜਗ੍ਹਾ ਬਣਾਈ, ਜਿੱਥੇ ਉਸ ਨੂੰ ਈਰਾਨ ਦੇ ਯੋਨੇਸ ਓਲੀਯਕਬਾਰ ਹੱਥੋਂ 0-11 ਨਾਲ ਹਾਰ ਦਾ ਸਾਹਮਣਾ ਕਰਨਾ ਪਿਆ।
ਇਸ ਦੌਰਾਨ ਏਸ਼ੀਆਈ ਖੇਡਾਂ ਦੇ ਸੋਨ ਤਮਗਾ ਜੇਤੂ ਤੇਜਿੰਦਰ ਪਾਲ ਸਿੰਘ ਤੂਰ ਨੇ ਆਪਣਾ ਸ਼ਾਨਦਾਰ ਪ੍ਰਦਰਸ਼ਨ ਬਰਕਰਾਰ ਰੱਖਦਿਆਂ ਏਸ਼ੀਆਈ ਐਥਲੈਟਿਕਸ ਚੈਂਪੀਅਨਸ਼ਿਪ ਵਿੱਚ ਪੁਰਸ਼ ਸ਼ਾਟਪੁੱਟ ਚੈਂਪੀਅਨਸ਼ਿਪ ਵਿੱਚ ਸੋਨ ਤਮਗਾ ਜਿੱਤ ਲਿਆ ਹੈ। ਤੇਜਿੰਦਰ ਨੇ ਸੈਸ਼ਨ ਦਾ ਸਰਵਸ੍ਰੇਸ਼ਠ ਪ੍ਰਦਰਸ਼ਨ ਕਰਦਿਆਂ 20.22 ਮੀਟਰ ਤੱਕ ਥ੍ਰੋਅ ਕੀਤੀ ਅਤੇ ਸੋਨ ਤਮਗਾ ਆਪਣੇ ਨਾਂਅ ਕੀਤਾ। ਭਾਰਤ ਦਾ ਇਸ ਚੈਂਪੀਅਨਸ਼ਿਪ ਵਿੱਚ ਇਹ ਦੂਜਾ ਸੋਨ ਤਮਗਾ ਹੈ। ਸੋਮਵਾਰ ਨੂੰ ਗੋਮਤੀ ਮਰਿਮੁਥੂ ਨੇ ਮਹਿਲਾ 800 ਮੀਟਰ ਦੌੜ ਦਾ ਸੋਨ ਤਮਗਾ ਜਿੱਤਿਆ ਸੀ।