ਐਸ ਏ ਐਸ ਨਗਰ, 24 ਅਪ੍ਰੈਲ (ਪੋਸਟ ਬਿਊਰੋ)- ਚੰਡੀਗੜ੍ਹ ਕੌਮਾਂਤਰੀ ਹਵਾਈ ਅੱਡੇ 'ਤੇ ਕੱਲ੍ਹ ਜਹਾਜ਼ ਦੀ ਜਾਂਚ ਦੌਰਾਨ ਉਸ ਵਿੱਚੋਂ 20 ਸੋਨੇ ਦੇ ਬਿਸਕੁਟ (2330 ਗ੍ਰਾਮ ਸੋਨਾ) ਬਰਾਮਦ ਹੋਏ। ਫੜੇ ਗਏ ਸੋਨੇ ਦੇ ਬਿਸਕੁਟਾਂ ਦਾ ਮਾਰਕੀਟ ਮੁੱਲ ਕਰੀਬ 76.28 ਲੱਖ ਰੁਪਏ ਦੱਸਿਆ ਜਾ ਰਿਹਾ ਹੈ। ਇਸ ਸੋਨਾ ਮਾਨਸਾ ਵਾਸੀ ਰਾਮਬੀਰ (35) ਦੁਬਈ ਤੋਂ ਗੈਰ ਕਾਨੂੰਨੀ ਢੰਗ ਨਾਲ ਭਾਰਤ ਲੈ ਕੇ ਆਇਆ ਹੈ।
ਕਸਟਮ ਵਿਭਾਗ ਨੇ ਦੱਸਿਆ ਕਿ ਚੰਡੀਗੜ੍ਹ ਹਵਾਈ ਅੱਡੇ 'ਤੇ ਸਵੇਰੇ 11.25 ਵਜੇ ਇੰਡੀਗੋ ਦਾ ਜਹਾਜ਼ ਦੁਬਈ ਤੋਂ ਚੰਡੀਗੜ੍ਹ ਪੁੱਜਾ ਸੀ। ਜਾਂਚ ਕੀਤੀ ਤਾਂ ਇਕ ਕਾਲੇ ਰੰਗ ਦੀ ਰੱਸੀ ਵਰਗੀ ਟੇਪ ਵਿੱਚ ਸੋਨੇ ਦੇ 20 ਬਿਸਕੁਟਾਂ ਨੂੰ ਲਪੇਟ ਕੇ ਸੀਟ ਕੋਲ ਰੱਖਿਆ ਹੋਇਆ ਸੀ। ਸੋਨੇ ਦੀ ਬਾਜ਼ਾਰੀ ਕੀਮਤ ਕਰੀਬ 76.28 ਲੱਖ ਰੁਪਏ ਦੱਸੀ ਜਾ ਰਹੀ ਹੈ। ਕਸਟਮ ਵਿਭਾਗ ਨੇ ਮਾਨਸਾ ਦੇ ਰਾਮਬੀਰ ਸਿੰਘ ਨੂੰ ਕਸਟਮ ਐਕਟ 1962 ਤਹਿਤ ਗ੍ਰਿਫਤਾਰ ਕਰਕੇ ਜਾਂਚ ਸ਼ੁਰੂ ਕਰ ਦਿੱਤੀ ਹੈ।
ਦੁਬਈ ਤੋਂ ਆਉਣ ਵਾਲੇ ਜਹਾਜ਼ ਸੋਨਾ ਸਮੱਗਲਿੰਗ ਦਾ ਜ਼ਰੀਆ ਬਣ ਰਹੇ ਹਨ। ਸੱਤ ਦਿਨ ਪਹਿਲਾਂ ਵੀ ਕਸਟਮ ਵਿਭਾਗ ਨੇ ਦੁਬਈ ਤੋਂ ਚੰਡੀਗੜ੍ਹ ਆ ਰਹੀ ਇਸੇ ਫਲਾਈਟ 'ਚੋਂ ਸੋਨੇ ਦੇ 30 ਬਿਸਕੁਟ ਬਰਾਮਦ ਕੀਤੇ ਸਨ, ਜਿਨ੍ਹਾਂ ਦਾ ਵਜ਼ਨ ਸਾਢੇ ਤਿੰਨ ਕਿੱਲੋ ਤੇ ਕੀਮਤ 1.14 ਕਰੋੜ ਰੁਪਏ ਸੀ, ਸਾਫ ਹੈ ਕਿ ਇਕ ਹਫਤੇ ਦੌਰਾਨ ਹੀ ਦੁਬਈ ਤੋਂ ਆਉਣ ਵਾਲੀਆਂ ਫਲਾਈਟਾਂ 'ਚ ਕੁੱਲ 5.830 ਕਿਲੋ ਵਜ਼ਨ ਦੇ 50 ਸੋਨੇ ਦੇ ਬਿਸਕੁਟ ਬਰਾਮਦ ਹੋ ਚੁੱਕੇ ਹਨ।