ਜਲੰਧਰ, 24 ਅਪ੍ਰੈਲ (ਪੋਸਟ ਬਿਊਰੋ)- ਜਲੰਧਰ ਛਾਉਣੀ ਵਿਧਾਨ ਸਭਾ ਹਲਕੇ ਵਾਸਤੇ ਅਕਾਲੀ ਦਲ ਦੇ ਇੰਚਾਰਜ ਸਰਬਜੀਤ ਸਿੰਘ ਮੱਕੜ ਨੇ ਢੇਸੀ ਭਰਾਵਾਂ ਜਸਪਾਲ ਸਿੰਘ ਢੇਸੀ ਤੇ ਪਰਮਜੀਤ ਸਿੰਘ ਰਾਏਪੁਰ 'ਤੇ ਉਨ੍ਹਾਂ ਵਿਰੁੱਧ ਝੂਠਾ ਪ੍ਰਚਾਰ ਕਰਨ ਦਾ ਦੋਸ਼ ਲਾਉਂਦਿਆਂ ਮਾਣਹਾਨੀ ਦਾ ਨੋਟਿਸ ਜਾਰੀ ਕੀਤਾ ਹੈ।
ਆਪਣੇ ਵਕੀਲ ਰਾਹੀਂ ਭੇਜੇ ਨੋਟਿਸ ਵਿੱਚ ਸਰਬਜੀਤ ਸਿੰਘ ਮੱਕੜ ਨੇ ਕਿਹਾ ਕਿ ਢੇਸੀ ਭਰਾਵਾਂ ਵੱਲੋਂ ਕੀਤੇ ਝੂਠੇ ਪ੍ਰਚਾਰ ਕਾਰਨ ਉਨ੍ਹਾਂ ਦੇ ਸਮਾਜਿਕ ਅਤੇ ਰਾਜਸੀ ਰੁਤਬੇ ਨੂੰ ਵੱਡਾ ਹਰਜਾ ਪੁੱਜਾ ਹੈ, ਇਸ ਕਰਕੇ ਇਕ ਹਫਤੇ ਵਿੱਚ ਇਕ ਕਰੋੜ ਰੁਪਏ ਦਾ ਹਰਜਾਨਾ ਦਿੱਤਾ ਜਾਵੇ, ਨਹੀਂ ਤਾਂ ਉਹ ਅਦਾਲਤ ਵਿੱਚ ਜਾਣਗੇ। ਉਨ੍ਹਾਂ ਨੋਟਿਸ ਵਿੱਚ ਲਿਖਿਆ ਕਿ ਢੇਸੀ ਭਰਾ ਕੂਲ ਰੋਡ ਉਪਰਲੀ ਜਿਹੜੀ 55 ਮਰਲੇ ਅਤੇ 31 ਮਰਲੇ ਜਾਇਦਾਦ ਉੱਤੇ ਸਰਬਜੀਤ ਸਿੰਘ ਮੱਕੜ ਦੇ ਨਾਜਾਇਜ਼ ਕਬਜ਼ੇ ਦਾ ਰੌਲਾ ਪਾ ਰਹੇ ਹਨ, ਉਹ ਪੂਰੀ ਤਰ੍ਹਾਂ ਬੇਬੁਨਿਆਦ ਅਤੇ ਝੂਠਾ ਹੈ। 55 ਮਰਲੇ ਜਗ੍ਹਾ ਮੱਕੜ ਅਤੇ ਤਿੰਨ ਹੋਰ ਭਾਈਵਾਲਾਂ ਨੇ ਰਮੇਸ਼ ਕੁਮਾਰ ਮੁਖਤਿਆਰ ਰਾਹੀਂ ਖਰੀਦੀ ਸੀ ਤੇ ਅੱਠ ਸਤੰਬਰ 1997 ਨੂੰ ਇਸ ਜਗ੍ਹਾ ਦੀ ਤਹਿਸੀਲਦਾਰ ਵੱਲੋਂ ਰਜਿਸਟਰੀ ਹੋਈ, ਜਦ ਕਿ 31 ਮਰਲੇ ਜਗ੍ਹਾ ਇੰਦਰਬੀਰ ਸਿੰਘ ਪੁੱਤਰ ਗੁਰਜੇਪਾਲ ਸਿੰਘ ਸਾਬਕਾ ਪੁਲਸ ਅਧਿਕਾਰੀ ਤੋਂ ਸਰਬਜੀਤ ਸਿੰਘ ਮੱਕੜ ਨੇ 11 ਸਤੰਬਰ 2006 ਨੂੰ ਖਰੀਦੀ ਅਤੇ ਰਜਿਸਟਰੀ ਕਰਵਾਈ ਸੀ। ਇਸ ਰਜਿਸਟਰੀ ਲਈ ਸਰਬਜੀਤ ਸਿੰਘ ਮੱਕੜ ਨੇ 81 ਲੱਖ 46 ਹਜ਼ਾਰ 860 ਰੁਪਏ ਸਟੇਟ ਬੈਂਕ ਪਟਿਆਲਾ ਰਾਹੀਂ ਅਦਾਇਗੀ ਕੀਤੀ ਸੀ। ਉਨ੍ਹਾਂ ਲਿਖਿਆ ਕਿ 55 ਮਰਲੇ ਜਗ੍ਹਾ ਦਾ ਅਦਾਲਤੀ ਕੇਸ ਕੇ ਕੇ ਗੋਇਲ ਸਿਵਲ ਜੱਜ ਦੀ ਅਦਾਲਤ ਵਿੱਚ ਚੱਲਦਾ ਸੀ ਤੇ 2 ਨਵੰਬਰ 2006 ਨੂੰ ਅਦਾਲਤੀ ਫੈਸਲੇ ਤਹਿਤ ਸਰਬਜੀਤ ਸਿੰਘ ਮੱਕੜ ਅਤੇ ਭਾਈਵਾਲਾਂ ਨੇ ਛੇ ਲੱਖ ਰੁਪਏ ਅਦਾ ਕੀਤੇ ਸਨ। ਮਾਲ ਵਿਭਾਗ ਤੇ ਅਦਾਲਤੀ ਫੈਸਲਿਆਂ ਮੁਤਾਬਕ ਕੂਲ ਰੋਡ 'ਤੇ 55 ਮਰਲੇ ਅਤੇ 31 ਮਰਲੇ ਜਗ੍ਹਾ ਕਿਸੇ ਵੀ ਤਰ੍ਹਾਂ ਵਿਵਾਦ ਵਾਲੀ ਨਹੀਂ ਤੇ ਨਾ ਸਰਬਜੀਤ ਸਿੰਘ ਮੱਕੜ ਤੇ ਉਨ੍ਹਾਂ ਦੇ ਭਾਈਵਾਲਾਂ ਨੇ ਕਿਸੇ ਜਾਇਦਾਦ 'ਤੇ ਨਾਜਾਇਜ਼ ਕਬਜ਼ਾ ਕੀਤਾ ਹੈ। ਉਨ੍ਹਾਂ ਲਿਖਿਆ ਕਿ ਢੇਸੀ ਪਰਵਾਰ ਦੀ ਫਰਮ ਟੀ ਐਸ ਐਸ ਦੇ ਕੁਝ ਬੰਦੇ 9 ਅਪਰੈਲ 2005 ਨੂੰ ਕੂਲ ਰੋਡ ਉਪਰਲੀ ਜਗ੍ਹਾ ਉੱਤੇ ਜਬਰੀ ਕਬਜ਼ਾ ਕਰਨ ਲਈ ਆਏ ਤਾਂ ਇਨ੍ਹਾਂ ਦੇ ਖਿਲਾਫ ਥਾਣਾ ਡਵੀਜ਼ਨ ਨੰਬਰ ਛੇ ਵਿੱਚ ਕੇਸ ਦਰਜ ਹੋਇਆ ਸੀ, ਜਿਹੜਾ ਅਜੇ ਵੀ ਚੱਲ ਰਿਹਾ ਹੈ। ਇਨ੍ਹਾਂ ਪਲਾਟਾਂ ਵਿੱਚ ਅੱਠ ਤੇ ਦੋ ਕਮਰੇ ਬਣੇ ਹੋਏ ਹਨ। ਉਸ ਵੇਲੇ ਤੋਂ ਬਿਜਲੀ ਦੇ ਕੁਨੈਕਸ਼ਨ ਲੱਗੇ ਹਨ। ਸਰਬਜੀਤ ਸਿੰਘ ਮੱਕੜ ਨੇ ਕਿਹਾ ਕਿ ਪ੍ਰਕਾਸ਼ ਸਿੰਘ ਬਾਦਲ ਨੇ ਇਸ ਮਾਮਲੇ 'ਚ ਕਦੇ ਕੋਈ ਦਖਲ ਨਹੀਂ ਦਿੱਤਾ ਤੇ ਨਾ ਹੀ ਕਮੇਟੀ ਬਣਾਈ ਹੈ। ਇਸ ਬਾਰੇ ਕੀਤਾ ਜਾ ਰਿਹਾ ਪ੍ਰਚਾਰ ਵੀ ਝੂਠਾ ਹੈ।