ਯੇਰੂਸ਼ਲਮ, 24 ਅਪ੍ਰੈਲ (ਪੋਸਟ ਬਿਊਰੋ)- ਇਸਰਾਈਲ ਦੇ ਪ੍ਰਧਾਨ ਮੰਤਰੀ ਬੈਂਜਾਮਿਨ ਨੇਤਨਯਾਹੂ ਨੇ ਵਿਵਾਦ ਵਾਲੇ ਖੇਤਰ ਗੋਲਾਨ ਪਹਾੜੀਆਂ ਉੱਤੇ ਵਸਾਈ ਗਈ ਬਸਤੀ ਦਾ ਨਾਂ ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਦੇ ਨਾਂ ਉੱਤੇ ਰੱਖਣ ਦੀ ਇੱਛਾ ਪ੍ਰਗਟ ਕੀਤੀ ਹੈ। ਉਨ੍ਹਾਂ ਦਾ ਕਹਿਣਾ ਹੈ ਕਿ ਟਰੰਪ ਨੇ ਇਸ ਪਠਾਰ ਵਾਲੇ ਇਲਾਕੇ ਉੱਤੇ ਇਸਰਾਈਲ ਦੀ ਅਖੰਡਤਾ ਨੂੰ ਮਾਨਤਾ ਦੀ ਪਹਿਲ ਕੀਤੀ ਹੈ, ਉਸ ਦਾ ਧੰਨਵਾਦ ਕਰਨ ਲਈ ਉਹ ਏਦਾਂ ਕਰਨਾ ਚਾਹੁੰਦੇ ਹਨ।
ਵਰਨਣ ਯੋਗ ਹੈ ਕਿ ਕਰੀਬ 1,200 ਵਰਗ ਕਿਲੋਮੀਟਰ ਖੇਤਰ ਵਿਚ ਫੈਲੀਆਂ ਗੋਲਾਨ ਪਹਾੜੀਆਂ ਸੀਰੀਆ ਦੀ ਰਾਜਧਾਨੀ ਦਮਿਸ਼ਕ ਤੋਂ 60 ਕਿਲੋਮੀਟਰ ਉੱਤਰ-ਪੱਛਮ ਵਿਚ ਹਨ। ਸਾਲ 1967 ਵਿਚ ਅਰਬ-ਇਸਰਾਈਲ ਜੰਗ ਮੌਕੇ ਇਸਰਾਈਲ ਨੇ ਰਣਨੀਤਕ ਤੌਰ ਉੱਤੇ ਮਹੱਤਵ ਪੂਰਨ ਇਹ ਖੇਤਰ ਸੀਰੀਆ ਕੋਲੋਂ ਖੋਹ ਕੇ 1981 ਵਿੱਚ ਉਸ ਨੇ ਆਪਣਾ ਹਿੱਸਾ ਬਣਾ ਲਿਆ ਸੀ। ਇਸਰਾਈਲ ਦੇ ਇਸ ਕਦਮ ਨੂੰ ਕੌਮਾਂਤਰੀ ਪੱਧਰ ਉੱਤੇ ਮਾਨਤਾ ਨਹੀਂ ਮਿਲ ਸਕੀ। ਅਮਰੀਕਾ ਨੇ ਵੀ ਇਸ ਖੇਤਰ ਵਿਚ ਇਸਰਾਈਲ ਦੀ ਅਖੰਡਤਾ ਨੂੰ ਨਹੀਂ ਸਵੀਕਾਰਿਆ, ਪ੍ਰੰਤੂ ਇਸ ਸਾਲ ਮਾਰਚ ਵਿਚ ਡੋਨਾਲਡ ਟਰੰਪ ਨੇ ਅਮਰੀਕਾ ਦੀ ਇਸ ਪੁਰਾਣੀ ਨੀਤੀ ਨੂੰ ਪਲਟ ਕੇ ਗੋਲਾਨ ਉੱਤੇ ਇਸਰਾਈਲ ਦੇ ਹੱਕ ਨੂੰ ਮਾਨਤਾ ਦੇ ਦਿੱਤੀ ਹੈ। ਸੀਰੀਆ ਨੇ ਇਸ ਫੈਸਲੇ ਦਾ ਵਿਰੋਧ ਵੀ ਕੀਤਾ ਸੀ।
ਬੀਤੇ ਦਿਨੀਂ ਚੋਣਾਂ ਵਿੱਚ ਪੰਜਵੀਂ ਵਾਰ ਜਿੱਤ ਗਏ ਪ੍ਰਧਾਨ ਮੰਤਰੀ ਨੇਤਨਯਾਹੂ ਨੇ ਕਿਹਾ ਹੈ ਕਿ ਡੋਨਾਲਡ ਟਰੰਪ ਦੇ ਇਸ ਇਤਿਹਾਸਕ ਕਦਮ ਤੋਂ ਸਾਰੇ ਇਸਰਾਈਲੀ ਬਹੁਤ ਖ਼ੁਸ਼ ਹਨ ਤੇ ਉਨ੍ਹਾਂ ਦਾ ਧੰਨਵਾਦ ਪ੍ਰਗਟ ਕਰਦੇ ਹਨ, ਅਸੀਂ ਉਨ੍ਹਾਂ ਦਾ ਧੰਨਵਾਦ ਕਰਨਾ ਹੈ, ਮੈਂ ਜਲਦੀ ਹੀ ਗੋਲਾਨ ਦੀ ਬਸਤੀ ਦਾ ਨਾਂ ਟਰੰਪ ਉੱਤੇ ਰੱਖਣ ਦਾ ਮਤਾ ਸਰਕਾਰ ਅੱਗੇ ਰੱਖਾਂਗਾ।