ਇਨ੍ਹੀਂ ਦਿਨੀਂ ਆਉਣ ਵਾਲੀ ਫਿਲਮ ‘ਮਰੂਧਰ ਐਕਸਪ੍ਰੈਸ’ ਦੀ ਚਰਚਾ ਹੈ। ਇਸ ਵਿੱਚ ਕੁਣਾਲ ਰਾਏ ਕਪੂਰ ਅਤੇ ਤਾਰਾ ਅਲੀਸ਼ਾ ਬੇਰੀ ਮੁੱਖ ਭੂਮਿਕਾਵਾਂ 'ਚ ਹਨ। ਪੇਸ਼ ਹਨ ਤਾਰਾ ਨਾਲ ਇੱਕ ਗੱਲਬਾਤ ਦੇ ਮੁੱਖ ਅੰਸ਼ :
* ਫਿਲਮ ‘ਮਰੂਧਰ ਐਕਸਪ੍ਰੈਸ’ ਵਿੱਚ ਆਪਣੇ ਕਿਰਦਾਰ ਬਾਰੇ ਦੱਸੋ?
- ਮੈਂ ਇਸ ਫਿਲਮ 'ਚ ਚਿਤਰਾ ਨਾਂਅ ਦੀ ਇੱਕ ਕੁੜੀ ਦਾ ਕਿਰਦਾਰ ਕਰ ਰਹੀ ਹਾਂ, ਜੋ ਲਖਨਵੀ ਬਿਊਟੀਸ਼ਨ ਹੈ। ਉਹ ਇੱਕ ਛੋਟੇ ਸ਼ਹਿਰ ਦੀ ਰਹਿਣ ਵਾਲੀ ਕੁੜੀ ਹੈ, ਪਰ ਓਮਨ ਮਾਈਂਡਿਡ ਹੈ।
* ਕੁਣਾਲ ਰਾਏ ਕਪੂਰ ਨਾਲ ਕੰਮ ਕਰਨ ਦਾ ਕੀ ਤਜਰਬਾ ਰਿਹਾ?
- ਬਹੁਤ ਚੰਗਾ ਰਿਹਾ। ਉਨ੍ਹਾਂ ਨਾਲ ਕੰਮ ਕਰ ਕੇ ਮੈਨੂੰ ਬਹੁਤ ਮਜ਼ਾ ਆਇਆ। ਅਸੀਂ ਬਹੁਤ ਚੰਗੇ ਦੋਸਤ ਬਣ ਗਏ। ਅਸੀਂ ਸੈਟ 'ਤੇ ਕਾਮੇਡੀ ਕਰਦੇ ਰਹਿੰਦੇ ਸੀ। ਆਸ ਕਰਦੀ ਹਾਂ ਕਿ ਮੈਨੂੰ ਫਿਰ ਕੋਈ ਫਿਲਮ ਮਿਲੇ ਉਨ੍ਹਾਂ ਨਾਲ ਕੰਮ ਕਰਨ ਲਈ।
* ਫਿਲਮ ਦਾ ਇੱਕ ਆਈਟਮ ਸੌਂਗ ‘ਬਲਮਾ ਐਸਾ ਨਾ ਨਿਕਲੇ' ਇਨ੍ਹੀਂ ਦਿਨੀਂ ਧੂਮ ਮਚਾ ਰਿਹਾ ਹੈ। ਕੀ ਕਹਿਣਾ ਚਾਹੋਗੇ?
- ਮੈਂ ਬਹੁਤ ਲੱਕੀ ਹਾਂ, ਜੋ ਇਸ ਦਾ ਹਿੱਸਾ ਬਣੀ ਹਾਂ। ਇਸ ਦਾ ਆਈਟਮ ਸੌਂਗ ਬਿਲਕੁਲ ਕਾਨਪੁਰੀਆ ਅੰਦਾਜ਼ 'ਚ ਮੇਰੇ 'ਤੇ ਫਿਲਮਾਇਆ ਗਿਆ ਹੈ, ਜੋ ਦਰਸ਼ਕਾਂ ਨੂੰ ਬਹੁਤ ਲੁਭਾ ਰਿਹਾ ਹੈ। ਇਹ ਮੇਰੇ ਲਈ ਬਹੁਤ ਸੁਖਦਾਇਕ ਅਹਿਸਾਸ ਹੈ।
* ਤੁਸੀਂ ਕਰੀਅਰ ਦੇ ਸ਼ੁਰੂ ‘ਮਸਤਰਾਮ' ਵਰਗੀ ਫਿਲਮ ਨਾਲ ਕੀਤੀ। ਅੱਗੋਂ ਦੀ ਫਿਲਮ ਯਾਤਰਾ ਨੂੰ ਕਿਵੇਂ ਦੇਖਦੇ ਹੋ?
- ਮੈਂ ਸਾਊਥ ਦੀਆਂ ਫਿਲਮਾਂ ਨਾਲ ਕਰੀਅਰ ਦੀ ਸ਼ੁਰੂਆਤ ਕੀਤੀ ਸੀ। ਹਿੰਦੀ 'ਚ ‘ਮਸਤਰਾਮ’ ਮੇਰੀ ਪਹਿਲੀ ਫਿਲਮ ਸੀ। ਉਸ ਤੋਂ ਬਾਅਦ ‘ਚੋਖੇਰ ਬਾਲੀ’ ਵੀ ਚਰਚਾ 'ਚ ਰਹੀ। ਹਿੰਦੀ ਅਤੇ ਸਾਊਥ ਨੂੰ ਮਿਲਾ ਕੇ ਤਕਰੀਬਨ ਦਰਜਨਾਂ ਫਿਲਮਾਂ ਕਰ ਚੁੱਕੀ ਹਾਂ। ਲਗਾਤਾਰ ਕੰਮ ਮਿਲ ਰਿਹਾ ਹੈ। ਮੈਨੂੰ ਖੁਸ਼ੀ ਹੈ।
* ਵੈੱਬ ਸੀਰੀਜ਼ 'ਚ ਵਧਦੀ ਅਸ਼ਲੀਲਤਾ ਬਾਰੇ ਤੁਸੀਂ ਕੀ ਕਹੋਗੇ?
- ਪਿਛਲੇ ਦਿਨੀਂ ਮੇਰੀ ਵੈੱਬ ਸੀਰੀਜ਼ ‘ਲਵ ਲਸਟ ਐਂਡ ਕੰਫਿਊਜ਼ਨ’ ਰਿਲੀਜ਼ ਹੋਈ। ਬਹੁਤ ਜਲਦੀ ਮੇਰੀ ਇੱਕ ਹੋਰ ਸੀਰੀਜ਼ ਆਉਣ ਵਾਲੀ ਹੈ। ਰਹੀ ਗੱਲ ਅਸ਼ਲੀਲਤਾ ਦੀ, ਤਾਂ ਜਿਸ ਨੂੰ ਜੋ ਦੇਖਣਾ ਹੈ ਉਹ ਦੇਖੇਗਾ। ਫਿਲਮਾਂ ਮਨੋਰੰਜਨ ਲਈ ਬਣਦੀਆਂ ਹਨ ਨਾ ਕਿ ਸਿਖਿਆ ਦੇਣ ਲਈ।