ਸਿਧਾਰਥ ਮਲਹੋਤਰਾ ਨੇ ਆਪਣਾ ਕਰੀਅਰ ਮਾਡਲ ਵਜੋਂ ਸ਼ੁਰੂ ਕੀਤਾ ਸੀ, ਪਰ ਬਤੌਰ ਐਕਟਰ ਉਸ ਦੀ ਪਹਿਲੀ ਫਿਲਮ ‘ਸਟੂਡੈਂਟ ਆਫ ਦਿ ਈਅਰ’ ਸੁਪਰਹਿੱਟ ਰਹੀ ਸੀ। ਉਸ ਫਿਲਮ ਤੋਂ ਲੋਕਾਂ ਨੂੰ ਲੱਗਾ ਸੀ ਕਿ ਸਿਧਾਰਥ ਬਾਲੀਵੁੱਡ ਦਾ ਇੱਕ ਹੋਰ ਰੋਮਾਂਟਿਕ ਹੀਰੋ ਬਣੇਗਾ, ਪਰ ‘ਏਕ ਵਿਲੇਨ’, ‘ਬ੍ਰਦਰਜ਼’, ‘ਜੈਂਟਲਮੈਨ’, ‘ਬਾਰ ਬਾਰ ਦੇਖੋ’, ‘ਅੱਯਾਰੀ’ ਆਦਿ ਨਾਲ ਉਸ ਨੇ ਸਿੱਧ ਕੀਤਾ ਕਿ ਉਹ ਸਿਰਫ ਰੋਮਾਂਟਿਕ ਹੀਰੋ ਬਣਨ ਨਹੀਂ ਆਇਆ। ਅੱਜ ਉਹ ਅਭਿਨੇਤਾਵਾਂ ਦੀ ਲਿਸਟ 'ਚ ਮੰਨਿਆ-ਪ੍ਰਮੰਨਿਆ ਨਾਂਅ ਬਣ ਚੁੱਕਾ ਹੈ। ਪੇਸ਼ ਹਨ ਉਸ ਨਾਲ ਹੋਈ ਗੱਲਬਾਤ ਦੇ ਕੁਝ ਅੰਸ਼ :
* ਫਿਲਮ ‘ਜਬਰੀਆ ਜੋੜੀ’ ਵਿੱਚ ਤੁਹਾਡਾ ਕੀ ਕਿਰਦਾਰ ਹੈ ਅਤੇ ਇਹ ਕਿੰਨਾ ਚੈਲਿੰਜਿੰਗ ਹੈ?
-ਇਸ ਵਿੱਚ ਮੇਰਾ ਕਿਰਦਾਰ ਬਿਹਾਰੀ ਮੁੰਡੇ ਦਾ ਹੈ, ਇਸ ਲਈ ‘ਜਬਰੀਆ ਜੋੜੀ' ਵਿੱਚ ਕੰਮ ਕਰਨਾ ਮੇਰੇ ਲਈ ਵੱਖਰੀ ਤਰ੍ਹਾਂ ਦਾ ਤਜਰਬਾ ਹੈ, ਕਿਉਂਕਿ ਇਸ ਦੇ ਲਈ ਮੈਨੂੰ ਖਾਸ ਬਿਹਾਰੀ ਅੰਦਾਜ਼ 'ਚ ਢਲਣਾ ਪਿਆ। ਇਹ ਬਹੁਤ ਹੀ ਦੇਸੀ ਰੂਪ ਹੈ। ਬਿਹਾਰੀ ਮੁੰਡੇ ਦਾ ਰੋਲ ਪਲੇਅ ਕਰਨਾ ਇਸ ਲਈ ਬਹੁਤ ਵੱਖਰਾ ਹੈ ਕਿ ਇਸਦੇ ਲਈ ਇੱਕ ਖਾਸ ਹਾਵ-ਭਾਵ ਅਤੇ ਬੋਲਣ ਦਾ ਲਹਿਜ਼ਾ ਸਿੱਖਣਾ ਪਿਆ ਹੈ। ਮੈਂ ਪਰਿਣੀਤੀ ਨਾਲ ਕੰਮ ਕਰ ਕੇ ਵੀ ਐਕਸਾਈਟਿਡ ਹਾਂ, ਸਾਡੇ ਵਿੱਚ ਕਾਫੀ ਗੂੜ੍ਹੀ ਦੋਸਤੀ ਹੈ। ਸਾਡੇ ਦੋਵਾਂ ਲਈ ਇਹ ਇੱਕ ‘ਧਮਾਕੇਦਾਰ' ਫਿਲਮ ਹੋਵੇਗੀ।
* ਤੁਹਾਡੀ ਨਾਂਅ ਕਈ ਹੀਰੋਇਨਾਂ ਨਾਲ ਜੁੜਿਆ ਹੈ। ਸੱਚਾਈ ਕੀ ਹੈ?
- ਜਿੱਥੋਂ ਤੱਕ ਮੇਰੇ ਰਿਲੇਸ਼ਨਸ਼ਿਪ ਦਾ ਸਵਾਲ ਹੈ, ਇਸ ਸੰਬੰਧੀ ਆਪਣੇ ਕੰਮ ਨਾਲ ਰਿਲੇਸ਼ਨਸ਼ਿਪ 'ਚ ਹਾਂ। ਮੇਰੇ ਕੋਲ ਕਿਸੇ ਹੋਰ ਚੀਜ਼ ਲਈ ਸਮਾਂ ਨਹੀਂ ਹੈ।
* ਸੁਣਨ ਵਿੱਚ ਆਇਆ ਹੈ ਕਿ ਤੁਸੀਂ ਵਿਕਰਮ ਬੱਤਰਾ ਦੀ ਬਾਇਓਪਿਕ 'ਚ ਕੰਮ ਕਰ ਰਹੇ ਹੋ?
- ਹਾਂ, ਇਹ ਸਕ੍ਰਿਪਟ ਮੇਰੇ ਕੋਲ ਹੈ। ਇਸ ਫਿਲਮ ਦਾ ਟਾਈਟਲ ‘ਸ਼ੇਰ ਸ਼ਾਹ’ ਹੋਵੇਗਾ। ਇਸ ਦਾ ਅਜੇ ਕੋਈ ਅਧਿਕਾਰਤ ਐਲਾਨ ਨਹੀਂ ਹੋਇਆ, ਪਰ ਛੇਤੀ ਹੀ ਇਸ ਦੇ ਨਾਂ ਅਤੇ ਅਧਿਕਾਰਤ ਮੋਹਰ ਲੱਗੇਗੀ। ਇਸ ਫਿਲਮ ਦਾ ਨਿਰਮਾਣ ਧਰਮਾ ਪ੍ਰੋਡਕਸ਼ਨ ਅਧੀਨ ਹੋਵੇਗਾ। ਇਸ ਵਿੱਚ ਵਿਕਰਮ ਬੱਤਰਾ ਦਾ ਕਿਰਦਾਰ ਨਿਭਾਵਾਂਗਾ। ਇਸ ਫਿਲਮ ਦੀ ਸ਼ੂਟਿੰਗ ਛੇਤੀ ਸ਼ੁਰੂ ਹੋਵੇਗੀ ਅਤੇ ਸ਼ੂਟਿੰਗ ਇਸੇ ਸਾਲ ਪੂਰੀ ਵੀ ਹੋ ਜਾਏਗੀ। ਇਸ ਤੋਂ ਬਾਅਦ ਫਿਲਮ ਦੀ ਰਿਲੀਜ਼ ਡੇਟ ਦਾ ਐਲਾਨ ਹੋਵੇਗਾ।
* ਤੁਸੀਂ ਆਪਣੀ ਫਿਟਨੈੱਸ ਬਾਰੇ ਬਹੁਤ ਚੌਕੰਨੇ ਰਹੇ ਹੋ। ਫਿਟਨੈੱਸ ਲਈ ਕੀ ਕੁਝ ਕਰਦੇ ਹੋ?
- ਮੈਂ ਆਪਣੀ ਫਿਜ਼ਿਕ ਵਿੱਚ ਕਈ ਤਬਦੀਲੀਆਂ ਕੀਤੀਆਂ ਹਨ, ਕਿਉਂਕਿ ਪਹਿਲੀ ਫਿਲਮ ਤੋਂ ਬਾਅਦ ਮੈਂ ਆਪਣੀ ਬਾਡੀ 'ਤੇ ਬਹੁਤ ਧਿਆਨ ਦਿੱਤਾ। ਖੁਦ ਨੂੰ ਫਿੱਟ ਰੱਖਣ ਲਈ ਰੋਜ਼ ਸਖਤ ਮਿਹਨਤ ਕਰਦਾ ਹਾਂ, ਜਿਮ 'ਚ ਕਈ ਘੰਟੇ ਬਿਤਾਉਂਦਾ ਹਾਂ। ਵਰਕਆਊਟ ਤੋਂ ਇਲਾਵਾ ਸਪੋਰਟਸ 'ਚ ਵੀ ਕਾਫੀ ਦਿਲਚਸਪੀ ਦਿਖਾਉਂਦਾ ਹਾਂ।
* ਕਿਸ ਤਰ੍ਹਾਂ ਦਾ ਡਾਈਟ ਪਲਾਨ ਫਾਲੋ ਕਰਦੇ ਹੋ?
- ਮੈਂ ਆਰਗੈਨਿਕ ਤੇ ਘਰ ਦੀ ਬਣੀ ਬੈਲੇਂਸ ਡਾਈਟ ਲੈਂਦਾ ਹਾਂ। ਮਾਸ, ਚਿਕਨ, ਮੱਛੀ ਤੇ ਸਬਜ਼ੀਆਂ ਵੱਧ ਖਾਂਦਾ ਹਾਂ। ਮੇਰੀ ਡਾਈਟ 'ਚ ਲੋੜੀਂਦਾ ਪ੍ਰੋਟੀਨ, ਕਾਰਬੋਹਾਈਡ੍ਰੇਟਸ ਅਤੇ ਫਾਈਬਰ ਹੁੰਦਾ ਹੈ। ਜਦੋਂ ਮਿੱਠਾ ਖਾਣ ਦਾ ਬਹੁਤ ਮਨ ਕਰਦਾ ਹੈ ਤਾਂ ਮੈਂ ਫਲ ਖਾਂਦਾ ਹਾਂ, ਪਰ ਫਰੂਟ ਜੂਸ ਨਹੀਂ ਲੈਂਦਾ। ਮੈਂ ਖੁਦ ਨੂੰ ਹਾਈਡ੍ਰੇਟ ਰੱਖਣ ਲਈ ਬਹੁਤ ਸਾਰਾ ਪਾਣੀ ਪੀਂਦਾ ਹਾਂ।