ਭੁਵਨੇਸ਼ਵਰ, 23 ਅਪ੍ਰੈਲ (ਪੋਸਟ ਬਿਊਰੋ)- ਉੜੀਸਾ ਵਿੱਚ ਬੀਤੇ ਐਤਵਾਰ ਹੋਈ ਹਿੰਸਾ ਦੀਆਂ ਕਈ ਘਟਨਾਵਾਂ ਵਿੱਚ ਚੋਣ ਕਮਿਸ਼ਨ ਦੇ ਇੱਕ ਮੈਜਿਸਟਰੇਟ 'ਤੇ ਹਮਲਾ ਕਰਨ ਦੇ ਦੋਸ਼ ਵਿੱਚ ਬੀਜੂ ਜਨਤਾ ਦਲ ਦੇ ਉਮੀਦਵਾਰ ਨੂੰ ਗ੍ਰਿਫਤਾਰ ਕੀਤਾ ਗਿਆ ਹੈ। ਹਿੰਸਾ ਦੇ ਅਲੱਗ-ਅਲੱਗ ਕੇਸਾਂ ਵਿੱਚ ਉੜੀਸਾ ਕਾਂਗਰਸ ਕਮੇਟੀ ਦੇ ਪ੍ਰਧਾਨ ਨਿਰੰਜਨ ਪਟਨਾਇਕ ਅਤੇ ਇੱਕ ਹੋਰ ਬੀ ਜੇ ਡੀ ਉਮੀਦਵਾਰ ਸਮੇਤ 11 ਲੋਕ ਜ਼ਖਮੀ ਹੋ ਗਏ।
ਪੁਲਸ ਨੇ ਕੱਲ੍ਹ ਕਿਹਾ ਕਿ ਭਾਜਪਾ ਦੇ ਵਿਧਾਨ ਸਭਾ ਦੇ ਉਮੀਦਵਾਰ ਦੀ ਕਾਰ 'ਤੇ ਬੰਬ ਸੁੱਟੇ ਗਏ, ਪਰ ਇਸ ਨਾਲ ਕੋਈ ਜ਼ਖਮੀ ਨਹੀਂ ਹੋਇਆ। ਐਤਵਾਰ ਤੀਸਰੇ ਪੜਾਅ ਲਈ ਪ੍ਰਚਾਰ ਮੁਹਿੰਮ ਦਾ ਸਮਾਂ ਖਤਮ ਹੋਣ ਤੋਂ ਕਰੀਬ ਇੱਕ ਘੰਟਾ ਪਹਿਲਾਂ ਹਿੰਸਾ ਸ਼ੁਰੂ ਹੋਈ। ਪੁਰੀ ਦੇ ਜ਼ਿਲ੍ਹਾ ਅਧਿਕਾਰੀ ਤੇ ਸਹਿ-ਜ਼ਿਲ੍ਹਾ ਚੋਣ ਅਧਿਕਾਰੀ ਜੇ ਬੀ ਦਾਸ ਨੇ ਦੋਸ਼ ਲਾਇਆ ਕਿ ਮੌਜੂਦਾ ਵਿਧਾਇਕ ਅਤੇ ਬੀ ਜੇ ਡੀ ਦੇ ਵਿਧਾਨ ਸਭਾ ਉੱਪ ਚੋਣ ਦੇ ਉਮੀਦਵਾਰ ਪ੍ਰਦੀਪ ਮਹਾਰਥੀ ਨੇ ਪੀਪਲੀ ਵਿੱਚ ਚੋਣ ਉਡਣ ਦਸਤੇ ਦੇ ਮੈਜਿਸਟਰੇਟ ਉੱਤੇ ਹਮਲਾ ਕੀਤਾ। ਚੋਣ ਜ਼ਾਬਤੇ ਦੀ ਉਲੰਘਣਾ ਕਰ ਕੇ ਰੁਪਏ ਅਤੇ ਸ਼ਰਾਬ ਵੰਡਣ ਬਾਰੇ ਸ਼ਿਕਾਇਤ 'ਤੇ ਚੋਣ ਕਮਿਸ਼ਨ ਦੀ ਟੀਮ ਰਾਤ ਕਰੀਬ 11.30 ਵਜੇ ਮਹਾਰਥੀ ਦੇ ਫਾਰਮ ਹਾਊਸ 'ਤੇ ਗਈ ਸੀ। ਕੈਪੀਟਲ ਹਸਪਤਾਲ ਵਿੱਚ ਭਰਤੀ ਮੈਜਿਸਟਰੇਟ ਰਵੀ ਨਾਰਾਇਣ ਪਾਤਰਾ ਨੇ ਦੱਸਿਆ, ‘ਜਦੋਂ ਅਸੀਂ ਉਥੇ ਪਹੁੰਚੇ ਪ੍ਰਦੀਪ ਮਹਾਰਥੀ ਨੇ ਗੋਲੀਆਂ ਚਲਾਉਣੀਆਂ ਸ਼ੁਰੂ ਕਰ ਦਿੱਤੀਆਂ ਅਤੇ ਫਿਰ ਮੇਰੀ ਟੀਮ 'ਤੇ ਹਮਲਾ ਕੀਤਾ।” ਇਸ ਹਮਲੇ ਵਿੱਚ ਪੁਲਸ ਦੇ ਸਹਾਇਕ ਡਿਪਟੀ ਇੰਸਪੈਕਟਰ ਵਿਨੈ ਕੁਮਾਰ ਦਾਸ ਅਤੇ ਉਨ੍ਹਾਂ ਦੀ ਕਾਰ ਦਾ ਚਾਲਕ ਦੀਪਕ ਵੀ ਜ਼ਖਮੀ ਹੋ ਗਿਆ ਸੀ।