ਮੋਗਾ, 23 ਅਪ੍ਰੈਲ (ਪੋਸਟ ਬਿਊਰੋ)- ਥਾਣਾ ਨਿਹਾਲ ਸਿੰਘ ਵਾਲਾ ਪੁਲਸ ਨੇ ਪੰਜਾਬ ਸਟੇਟ ਸਿਵਲ ਸਪਲਾਈਜ਼ (ਪਨਸਪ) ਕਾਰਪੋਰੇਸ਼ਨ ਦਾ ਅੱਠ ਕਰੋੜ ਰੁਪਏ ਦਾ ਝੋਨਾ ਖੁਰਦ ਬੁਰਦ ਕਰਨ ਦੇ ਨਾਲ ਇਕ ਹੋਰ ਜਾਅਲਸਾਜ਼ੀ ਕੇਸ 'ਚ ਅਦਾਲਤ ਵੱਲੋਂ ਭਗੌੜਾ ਕਰਾਰ ਦਿੱਤੇ ਹੋਏ ਚੌਲ ਮਿੱਲ ਮਾਲਕ ਅਕਾਲੀ ਆਗੂ ਰਣਜੀਤ ਸਿੰਘ ਪਿੰਡ ਭਾਗੀਕੇ ਨੂੰ ਗ੍ਰਿਫਤਾਰ ਕੀਤਾ ਹੈ। ਰਣਜੀਤ ਸਿੰਘ ਪਿੰਡ ਭਾਗੀਕੇ ਮੋਗਾ ਸੈਕਸ ਸਕੈਂਡਲ ਦਾ ਵੀ ਸੂਤਰਧਾਰ ਹੈ।
ਪੁਲਸ ਅਧਿਕਾਰੀਆਂ ਦੇ ਦੱਸਣ ਮੁਤਾਬਕ 30 ਜੂਨ 2017 ਨੂੰ ਥਾਣਾ ਨਿਹਾਲ ਸਿੰਘ ਵਾਲਾ ਵਿੱਚ ਪਨਸਪ ਦੇ ਜ਼ਿਲਾ ਮੈਨੇਜਰ ਦੀ ਸ਼ਿਕਾਇਤ 'ਤੇ ਮੁਖਤਿਆਰ ਸਿੰਘ ਐਂਡ ਸੰਨਜ਼, ਪੱਤੋ ਹੀਰਾਸਿੰਘ (ਨਿਹਾਲ ਸਿੰਘ ਵਾਲਾ) ਦੇ ਮਾਲਕ ਰਣਜੀਤ ਸਿੰਘ ਖਿਲਾਫ ਪਨਸਪ ਦਾ 7.72 ਕਰੋੜ ਰੁਪਏ ਦਾ ਝੋਨਾ ਖੁਰਦ ਬੁਰਦ ਕਰਨ ਦਾ ਕੇਸ ਦਰਜ ਕੀਤਾ ਗਿਆ ਸੀ। ਇਸ ਤੋਂ ਇਲਾਵਾ 10 ਜੂਨ 2017 ਨੂੰ ਥਾਣਾ ਨਿਹਾਲ ਸਿੰਘ ਵਾਲਾ ਵਿੱਚ ਤਾਇਨਾਤ ਪਨਸਪ ਇੰਸਪੈਕਟਰ ਗੌਰਵ ਗੋਇਲ ਦੀ ਸ਼ਿਕਾਇਤ ਉੱਤੇ ਮੁਲਜ਼ਮ ਰਣਜੀਤ ਸਿੰਘ ਤੇ ਉਸ ਦੇ ਪਿਤਾ ਮੁਖਤਿਆਰ ਸਿੰਘ ਪਿੰਡ ਭਾਗੀਕੇ ਖਿਲਾਫ ਕੇਸ ਦਰਜ ਕੀਤਾ ਗਿਆ ਸੀ। ਇਨ੍ਹਾਂ ਦੋਵਾਂ ਦੋਸ਼ੀਆਂ ਦੇ ਖਿਲਾਫ ਸਿ਼ਕਾਇਤ ਇਹ ਹੈ ਕਿ ਉਹ ਮਿੱਲ 'ਚ ਪਏ ਪਨਸਪ ਦੇ ਚੌਲ ਦੀਆਂ ਜਾਅਲੀ ਬਿਲਟੀਆਂ ਤਿਆਰ ਕਰਕੇ ਟਰੱਕਾਂ ਵਿੱਚ ਲੋਡ ਕਰਕੇ ਗਬਨ ਕਰਨ ਦੀ ਨੀਤ ਨਾਲ ਬਾਹਰ ਲਿਜਾ ਰਹੇ ਸਨ ਤਾਂ ਪੁਲਸ ਨੇ ਟਰੱਕ ਕਾਬੂ ਕਰ ਲਏ ਸਨ। ਦੋਵਾਂ ਕੇਸਾਂ ਵਿੱਚ ਦੋਸ਼ੀਆਂ ਨੂੰ ਅਦਾਲਤ ਨੇ ਭਗੌੜਾ ਕਰਾਰ ਦਿੱਤਾ ਸੀ। ਉਤਰ ਪ੍ਰਦੇਸ਼ ਪੁਲਸ ਨੇ ਵੀ ਤਿੰਨ ਵਰ੍ਹੇ ਪਹਿਲਾਂ ਵੀ ਅਕਾਲੀ ਆਗੂ ਦੇ ਖਿਲਾਫ 32 ਲੱਖ ਦਾ ਚੌਲ ਹੜੱਪਣ ਦਾ ਕੇਸ ਦਰਜ ਕੀਤਾ ਸੀ।