ਕੋਲੰਬੋ, 23 ਅਪ੍ਰੈਲ (ਪੋਸਟ ਬਿਊਰੋ)- ਇਥੇ ਸ਼ੰਗਰੀ ਲਾ ਹੋਟਲ 'ਚ ਧਮਾਕਾ ਕਰਨ ਵਾਲੇ ਇਕ ਆਤਮਘਾਤੀ ਹਮਲਾਵਰ ਦੀ ਪਤਨੀ ਅਤੇ ਭੈਣ ਇਕ ਹੋਰ ਹਮਲੇ 'ਚ ਮਾਰੀਆਂ ਗਈਆਂ। ਇਹ ਧਮਾਕਾ ਓਦੋਂ ਹੋਇਆ ਸੀ ਜਦੋਂ ਕੋਲੰਬੋ ਦੀ ਉਪ ਨਗਰੀ ਦੇ ਇਕ ਘਰ ਛਾਪਾ ਮਾਰਨ ਗਈ ਪੁਲਸ ਨੂੰ ਦੇਖ ਕੇ ਹਮਲਾਵਰ ਨੇ ਆਪਣੇ ਆਪ ਨੂੰ ਉਡਾ ਲਿਆ।
ਪੁਲਸ ਨੇ ਕੋਲੰਬੋ ਦੇ ਚੀਫ ਮੈਜਿਸਟਰੇਟ ਦੀ ਅਦਾਲਤ ਨੂੰ ਦੱਸਿਆ ਕਿ ਸ਼ੰਗਰੀ ਲਾ ਹੋਟਲ 'ਚ ਹਮਲਾ ਕਰਨ ਵਾਲੇ ਆਤਮਘਾਤੀ ਹਮਲਾਵਰ ਦੀ ਪਛਾਣ ਇਕ ਫੈਕਟਰੀ ਦੇ ਮਾਲਕ ਇਨਸਾਨ ਸੀਲਾਵਨ ਦੇ ਤੌਰ 'ਤੇ ਹੋਈ ਹੈ। ਦੇਮਾਟਾਗੋੜਾ ਵਿਖੇ ਕੋਲੰਬੋ ਦੀ ਉਤਰੀ ਉਪ ਨਗਰੀ ਓਜੂਗੋਦਾਵੱਟਾ ਵਿਖੇ ਜਦੋਂ ਪੁਲਸ ਇਕ ਘਰ ਦੀ ਤਲਾਸ਼ੀ ਲੈਣ ਪੁੱਜੀ ਤਾਂ ਉਥੇ ਇਕ ਆਤਮਘਾਤੀ ਹਮਲਾਵਰ ਨੇ ਖੁਦ ਨੂੰ ਉਡਾ ਲਿਆ, ਜਿਸ ਨਾਲ ਘਰ ਦੀ ਛੱਤ ਉਨ੍ਹਾਂ ਉੱਤੇ ਡਿੱਗ ਪਈ, ਜਿਸ ਵਿੱਚ ਤਿੰਨ ਪੁਲਸ ਵਾਲੇ ਵੀ ਮਾਰੇ ਗਏ। ਇਸ ਮੌਕੇ ਸ਼ੰਗਰੀ ਲਾ ਹੋਟਲ 'ਚ ਹਮਲਾ ਕਰਨ ਵਾਲੇ ਹਮਲਾਵਰ ਦੀ ਪਤਨੀ ਅਤੇ ਭੈਣ ਵੀ ਮਾਰੀਆਂ ਗਈਆਂ। ਪੁਲਸ ਵੱਲੋਂ ਗ੍ਰਿਫਤਾਰ ਕੀਤੇ 24 ਲੋਕਾਂ 'ਚ ਸੀਲਾਵਨ ਦੀ ਫੈਕਟਰੀ ਦੇ 9 ਕਰਮਚਾਰੀ ਵੀ ਸ਼ਾਮਲ ਹਨ। ਅਦਾਲਤ ਨੇ ਇਨ੍ਹਾਂ ਨੂੰ ਛੇ ਮਈ ਤੱਕ ਹਿਰਾਸਤ 'ਚ ਭੇਜ ਦਿੱਤਾ।