ਲੰਡਨ, 23 ਅਪ੍ਰੈਲ (ਪੋਸਟ ਬਿਊਰੋ)- ਸ਼ਾਅਨਾ ਗ੍ਰੇਸੀ ਅਤੇ ਟਾਮ ਮੇਗਿਊਰ ਦਾ ਜਨਮ ਇੱਕੋ ਦਿਨ ਇੱਕੋ ਹਸਪਤਾਲ ਵਿੱਚ ਹੋਇਆ ਅਤੇ ਮਸਾਂ ਤਿੰਨ ਮੀਲ ਦੀ ਦੂਰ ਰਹੇ, ਪਰ ਪਹਿਲੀ ਮੁਲਾਕਾਤ ਹੁੰਦੇ-ਹੁੰਦੇ 17 ਸਾਲ ਲੱਗ ਗਏ। ਦੋਵਾਂ ਦੇ 18ਵੇਂ ਜਨਮ ਦਿਨ 'ਤੇ ਪਹਿਲੀ ਵਾਰ ਇੱਕ-ਦੂਸਰੇ ਦੇ ਹਮਸਫਰ ਬਣਨ ਲੱਗੇ ਹਨ।
ਗ੍ਰੇਟ ਵੀਗਨ ਵਿੱਚ ਰਹਿਣ ਵਾਲੇ ਸ਼ਾਅਨਾ ਅਤੇ ਟਾਮ ਦਾ ਵਿਆਹ ਚਾਰ ਮਈ ਨੂੰ ਹੋਵੇਗੀ। ਦੋਵਾਂ ਦੀ ਲਵ ਸਟੋਰੀ ਜੋ ਵੀ ਸੁਣਦਾ ਹੈ, ਉਸ ਨਮੂ ਕਿਸੇ ਫਿਲਮੀ ਕਹਾਣੀ ਤੋਂ ਘੱਟ ਨਹੀਂ ਲੱਗਦੀ। ਇਸ ਬਾਰੇ ਇਨ੍ਹਾਂ ਦਾ ਕਹਿਣਾ ਹੈ ਕਿ ਲੋਕ ਭਾਵੇਂ ਪਹਿਲੀ ਵਾਰ ਵਿੱਚ ਸਾਡੇ ਪਿਆਰ ਦੀ ਕਹਾਣੀ 'ਤੇ ਯਕੀਨ ਨਾ ਕਰਨ, ਪਰ ਸਾਡਾ ਮਿਲਣਾ ਕਿਸਮਤ ਵਿੱਚ ਲਿਖਿਆ ਸੀ ਤੇ ਸ਼ਾਇਦ 17 ਸਾਲ ਦੀਆਂ ਦੂਰੀਆਂ ਵੀ ਇਸ ਲਈ ਸਨ ਕਿ ਜਦ ਅਸੀਂ ਮਿਲੀਏ ਤਾਂ ਇੱਕ-ਦੂਜੇ ਦੇ ਹੋ ਜਾਈਏ। ਸ਼ਾਅਨਾ ਨੇ ਦੱਸਿਆ ਕਿ ਸਾਡਾ ਦੋਵਾਂ ਦਾ ਜਨਮ ਦਿਨ 22 ਦਸੰਬਰ ਨੂੰ ਹੁੰਦਾ ਹੈ। 1992 ਵਿੱਚ ਵੀਗਨ ਸ਼ਹਿਰ ਵਿੱਚ ਪੈਦਾ ਹੋਏ, ਪਰ ਪਹਿਲੀ ਵਾਰ ਇੱਕ ਦੂਸਰੇ ਨਾਲ 18ਵੇਂ ਜਨਮ ਦਿਨ ਦੀ ਪਾਰਟੀ ਵਿੱਚ ਮਿਲੇ। ਮੈਨੂੰ ਟਾਮ ਵਿੱਚ ਦਿਲਚਸਪੀ ਨਹੀਂ ਸੀ, ਫਿਰ ਦੋ ਮਹੀਨੇ ਬਾਅਦ ਸਾਡੀ ਮੁਲਾਕਾਤ ਇੱਕ ਵਾਰ ਫਿਰ ਹੋਈ ਅਤੇ ਇੱਕ ਸਾਲ ਤੱਕ ਰਿਸ਼ਤਾ ਇੰਝ ਹੀ ਚੱਲਦਾ ਰਿਹਾ। ਆਖਰ 2011 ਵਿੱਚ ਅਸੀਂ ਪਰਵਾਰ ਅਤੇ ਦੋਸਤਾਂ ਨੂੰ ਆਪਣੇ ਰਿਸ਼ਤੇ ਬਾਰੇ ਦੱਸ ਦਿੱਤਾ। ਮੈਨੂੰ ਯਾਦ ਹੈ ਕਿ ਸਾਡੇ ਰਿਲੇਸ਼ਨਸ਼ਿਪ ਵਿੱਚ ਟਾਮ ਜਿੱਦੀ ਸੀ। ਮੈਂ ਅਕਸਰ ਉਸ ਨੂੰ ਕਹਿੰਦੀ ਕਿ ਮੈਂ ਤੈਨੂੰ ਪਿਆਰ ਨਹੀਂ ਕਰਦੀ ਤੇ ਸਿਰਫ ਦੋਸਤ ਹਾਂ, ਪਰ ਉਹ ਹਮੇਸ਼ਾ ਕਹਿੰਦਾ ਸੀ ਕਿ ਮੈਨੂੰ ਪਿਆਰ ਕਰਦਾ ਰਹੇਗਾ। ਫਿਰ ਇੱਕ ਦਿਨ ਉਸ ਨੂੰ ਦੇਖ ਕੇ ਮੈਨੂੰ ਅਹਿਸਾਸ ਹੋਇਆ ਕਿ ਮੈਂ ਉਸ ਨੂੰ ਪਸੰਦ ਕਰਨ ਲੱਗੀ ਸੀ ਤੇ ਇਸ ਗੱਲ ਬਾਰੇ ਯਕੀਨ ਹੋ ਗਿਆ ਕਿ ਸਾਡਾ ਮਿਲਣਾ ਕਿਸਮਤ ਵਿੱਚ ਲਿਖਿਆ ਸੀ। ਮੈਂ ਜਦ ਲੋਕਾਂ ਨੂੰ ਦੱਸਦੀ ਹਾਂ ਕਿ ਮੇਰਾ ਅਤੇ ਟਾਮ ਦਾ ਜਨਮ ਦਿਨ ਇੱਕ ਹੀ ਦਿਨ ਹੈ, ਉਨ੍ਹਾਂ ਦੇ ਰਿਐਕਸ਼ਨ ਦੇਖਣ ਵਾਲੇ ਹੁੰਦੇ ਹਨ। ਮੇਰੇ ਖਿਆਲ 'ਚ ਕਿਸੇ ਵੀ ਰਿਸ਼ਤੇ ਵਿਚ ਅਜੀਬੋ-ਗਰੀਬ ਸੰਯੋਗ ਉਸ ਨੂੰ ਥੋੜ੍ਹਾ ਖਾਸ ਬਣਾ ਦਿੰਦੇ ਹਨ ਅਤੇ ਸਾਡਾ ਰਿਸ਼ਤਾ ਵੀ ਅਜਿਹਾ ਹੀ ਹੈ।