ਕੋਲੰਬੋ, ਸ੍ਰੀ ਲੰਕਾ, 23 ਅਪਰੈਲ (ਪੋਸਟ ਬਿਊਰੋ) : ਸ੍ਰੀ ਲੰਕਾ ਦੇ ਰੱਖਿਆ ਮੰਤਰੀ ਰੁਵਨ ਵਿਜੇਵਰਦਨੇ ਨੇ ਮੰਗਲਵਾਰ ਨੂੰ ਆਖਿਆ ਕਿ ਇੱਕ ਬਿਆਨ ਅਨੁਸਾਰ ਈਸਟਰ ਮੌਕੇ ਚਰਚਾਂ, ਹੋਟਲਾਂ ਤੇ ਦੇਸ਼ ਦੀਆਂ ਹੋਰਨਾਂ ਥਾਂਵਾਂ ਉੱਤੇ ਹੋਏ ਹਮਲੇ ਪਿਛਲੇ ਮਹੀਨੇ ਨਿਊਜ਼ੀਲੈਂਡ ਦੀਆਂ ਮਸਜਿਦਾਂ ਵਿੱਚ ਕੀਤੇ ਗਏ ਕਤਲੇਆਮ ਦਾ ਬਦਲਾ ਲੈਣ ਲਈ ਕੀਤੇ ਗਏ ਹਨ।
ਵਿਜੇਵਰਦਨੇ ਨੇ ਪਾਰਲੀਆਮੈਂਟ ਵਿੱਚ ਦੱਸਿਆ ਕਿ ਸਰਕਾਰ ਨੂੰ ਇਹ ਜਾਣਕਾਰੀ ਮਿਲੀ ਹੈ ਕਿ ਕੋਲੰਬੋ ਦੇ ਅੰਦਰ ਤੇ ਬਾਹਰ ਹੋਏ ਬੰਬ ਧਮਾਕੇ, ਜਿਨ੍ਹਾਂ ਵਿੱਚ 300 ਤੋਂ ਵੱਧ ਲੋਕ ਮਾਰੇ ਗਏ, ਇੱਕ ਕੱਟੜ ਇਸਲਾਮਿਕ ਜਥੇਬੰਦੀ ਵੱਲੋਂ ਕੀਤੇ ਗਏ ਹਨ। ਇਹ ਹਮਲੇ ਕ੍ਰਾਈਸਟਚਰਚ ਹਮਲਿਆਂ ਦੇ ਬਦਲੇ ਵਿੱਚ ਕੀਤੇ ਗਏ ਹਨ। ਪਰ ਰੱਖਿਆ ਮੰਤਰੀ ਨੇ ਆਪਣੇ ਬਿਆਨ ਨੂੰ ਸਿੱਧ ਕਰਨ ਲਈ ਕਿਸੇ ਤਰ੍ਹਾਂ ਦਾ ਸਬੂਤ ਮੁਹੱਈਆ ਨਹੀਂ ਕਰਵਾਇਆ।
ਵਿਜੇਵਰਦਨੇ ਨੇ ਮੰਨਿਆ ਕਿ ਸ੍ਰੀ ਲੰਕਾਂ ਵਿੱਚ ਹੋਏ ਨੌਂ ਬੰਬ ਧਮਾਕਿਆਂ ਨੂੰ ਰੋਕਣ ਵਿੱਚ ਦੇਸ਼ ਦਾ ਸਕਿਊਰਿਟੀ ਤੰਤਰ ਨਾਕਾਮ ਰਿਹਾ। ਉਨ੍ਹਾਂ ਆਖਿਆ ਕਿ ਇਹ ਸਾਡੇ ਸਕਿਊਰਿਟੀ ਤੰਤਰ ਦੀਆਂ ਖਾਮੀਆਂ ਹੀ ਹਨ ਜਿਹੜਾ ਐਨੇ ਵੱਡੇ ਹਮਲੇ ਹੋ ਗਏ। ਉਨ੍ਹਾਂ ਆਖਿਆ ਕਿ ਹੁਣ ਤੱਕ ਇਹ ਸਿੱਧ ਹੋ ਚੁੱਕਿਆ ਹੈ ਕਿ ਖੁਫੀਆ ਏਜੰਸੀਆਂ ਇਨ੍ਹਾਂ ਹਮਲਿਆਂ ਬਾਰੇ ਪਹਿਲਾਂ ਤੋਂ ਹੀ ਜਾਣੂ ਸਨ ਤੇ ਇਨ੍ਹਾਂ ਹਮਲਿਆਂ ਬਾਰੇ ਉਨ੍ਹਾਂ ਵੱਲੋਂ ਜਿ਼ੰਮੇਵਾਰ ਵਿਅਕਤੀਆਂ ਨੂੰ ਦੱਸਿਆ ਵੀ ਗਿਆ ਸੀ। ਪਰ ਇਹ ਜਾਣਕਾਰੀ ਕੁੱਝ ਕੁ ਅਧਿਕਾਰੀਆਂ ਤੱਕ ਹੀ ਸੀਮਤ ਰਹੀ।
ਇਸ ਦੌਰਾਨ ਹਮਲਿਆਂ ਦੇ ਸ਼ੱਕ ਵਿੱਚ 40 ਵਿਅਕਤੀਆਂ ਨੂੰ ਗ੍ਰਿਫਤਾਰ ਕੀਤਾ ਗਿਆ ਹੈ ਜਿਨ੍ਹਾਂ ਵਿੱਚੋਂ ਇੱਕ ਉਸ ਵੈਨ ਦਾ ਡਰਾਈਵਰ ਸੀ ਜਿਸ ਵੈਨ ਨੂੰ ਕਥਿਤ ਤੌਰ ਉੱਤੇ ਆਤਮਘਾਤੀ ਹਮਲਾਵਰਾਂ ਵੱਲੋਂ ਹਮਲੇ ਲਈ ਵਰਤਿਆ ਗਿਆ ਤੇ ਇੱਕ ਉਸ ਘਰ ਦਾ ਮਾਲਕ ਸੀ ਜਿਸ ਘਰ ਵਿੱਚ ਇਨ੍ਹਾਂ ਵਿੱਚੋਂ ਕੁੱਝ ਰਹਿੰਦੇ ਸਨ।