ਓਟਵਾ, 22 ਅਪਰੈਲ (ਪੋਸਟ ਬਿਊਰੋ) : ਜਲਦ ਹੀ ਅਲਬਰਟਾ ਦੇ ਪ੍ਰੀਮੀਅਰ ਬਣਨ ਜਾ ਰਹੇ ਜੇਸਨ ਕੇਨੀ ਦਾ ਕਹਿਣਾ ਹੈ ਕਿ ਵਾਤਾਵਰਣ ਦਾ ਫਿਕਰ ਕਰਨ ਵਾਲਿਆਂ ਦੀ ਮਨਜ਼ੂਰੀ ਲੈ ਕੇ ਸਰੋਤਾਂ ਦਾ ਵਿਕਾਸ ਕਰਨ ਲਈ ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਦੇ ਤਥਾ ਕਥਿਤ “ਗ੍ਰੈਂਡ ਬਾਰਗੇਨ” ਦਾ ਅੰਤ ਅਲਬਰਟਾ ਦੀਆਂ ਚੋਣਾਂ ਵਾਲੇ ਦਿਨ ਹੀ ਹੋ ਗਿਆ ਸੀ।
ਇੱਕ ਇੰਟਰਵਿਊ ਵਿੱਚ ਯੂਨਾਈਟਿਡ ਕੰਜ਼ਰਵੇਟਿਵ ਆਗੂ ਨੇ ਆਖਿਆ ਕਿ ਨੌਟਲੇ ਸਰਕਾਰ ਨਾਲ ਚੱਲ ਰਹੀ ਪ੍ਰਧਾਨ ਮੰਤਰੀ ਦੀ ਇਹ ਗੱਲਬਾਤ ਚੋਣਾਂ ਵਾਲੇ ਦਿਨ ਹੀ ਮੁੱਕ ਗਈ ਸੀ। ਉਨ੍ਹਾਂ ਅੱਗੇ ਆਖਿਆ ਕਿ ਸਾਡੇ ਪਰੀਪੇਖ ਤੋਂ ਅਤੇ ਅਲਬਰਟਾ ਦੇ ਬਹੁਗਿਣਤੀ ਵੋਟਰਾਂ ਦੇ ਨਜ਼ਰੀਏ ਤੋਂ ਇਸ ਨੂੰ ਮੁਕੰਮਲ ਅਸਫਲਤਾ ਹੀ ਮੰਨਿਆ ਜਾਣਾ ਚਾਹੀਦਾ ਹੈ। ਕੇਨੀ ਨੇ ਆਖਿਆ ਕਿ ਸੋਸ਼ਲ ਲਾਇਸੰਸ ਹਾਸਲ ਕਰਨ ਦੀ ਫੈਡਰਲ ਲਿਬਰਲਾਂ ਦੀ ਕੋਸਿ਼ਸ਼ ਹੋਰ ਕੁੱਝ ਨਹੀਂ ਸਗੋਂ ਦਿਖਾਵਾ ਹੀ ਸੀ।
ਟਰੂਡੋ ਇਹ ਤਹੱਈਆ ਲੈ ਕੇ ਸੱਤਾ ਵਿੱਚ ਆਏ ਸਨ ਕਿ ਉਹ ਕੈਨੇਡਾ ਦੇ ਤੇਲ ਤੇ ਗੈਸ ਸਰੋਤਾਂ ਨੂੰ ਹੋਰਨਾਂ ਮੰਡੀਆਂ ਵਿੱਚ ਪਹੁੰਚਾਉਣਗੇ ਜਦਕਿ ਕੌਮੀ ਕਲਾਈਮੇਟ ਚੇਂਜ ਪਲੈਨ ਗੈਸਾਂ ਦੇ ਰਿਸਾਅ ਨੂੰ ਘਟਾਉਣ ਲਈ ਲਾਗੂ ਕੀਤਾ ਜਾਵੇਗਾ। ਪਰ ਅਜਿਹਾ ਕੁੱਝ ਵੀ ਨਹੀਂ ਹੋਇਆ ਤੇ ਲਿਬਰਲਾਂ ਦਾ ਮੰਨਣਾ ਹੈ ਕਿ ਅਜਿਹਾ ਕਰਕੇ ਉਹ ਵੱਡੇ ਊਰਜਾ ਸਬੰਧੀ ਪ੍ਰੋਜੈਕਟਾਂ ਲਈ ਵਧੇਰੇ ਸਮਰਥਨ ਹਾਸਲ ਕਰ ਸਕਣਗੇ। ਕੇਨੀ ਨੇ ਅੱਗੇ ਆਖਿਆ ਕਿ ਅਲਬਰਟਾ ਵਿੱਚ ਇਸ ਦੀ ਜ਼ਾਹਰਾ ਯੋਜਨਾ ਵੇਖਣ ਨੂੰ ਮਿਲੀ। ਉੱਥੋਂ ਦੇ ਲੋਕਾਂ ਨੂੰ ਲੱਗ ਰਿਹਾ ਹੈ ਕਿ ਫੈਡਰਲ ਸਰਕਾਰ ਨੇ ਟਰਾਂਸ ਮਾਊਨਟੇਨ ਪਾਈਪਲਾਈਨ ਨੂੰ ਮਨਜ਼ੂਰੀ ਦਿਵਾਉਣ ਬਦਲੇ ਕਾਰਬਨ ਟੈਕਸ ਦਾ ਤੋਹਫਾ ਦਿੱਤਾ ਹੈ। ਪਰ ਕੇਨੀ ਨੇ ਆਖਿਆ ਕਿ ਇਹ ਯੋਜਨਾ ਅਸਫਲ ਹੋ ਗਈ।
ਉਨ੍ਹਾਂ ਆਖਿਆ ਕਿ ਅਸੀਂ ਤਾਂ ਇੱਕ ਵੀ ਐਨਵਾਇਰਮੈਂਟਲ ਗਰੁੱਪ, ਪ੍ਰੋਵਿੰਸ਼ੀਅਲ, ਮਿਉਂਸਪਲ ਗਵਰਮੈਂਟ, ਫਰਸਟ ਨੇਸ਼ਨ ਨੂੰ ਪਾਈਪਲਾਈਨਜ਼ ਵਾਸਤੇ ਨਾਂਹ ਤੋਂ ਹਾਂ ਕਹਿੰਦਿਆਂ ਨਹੀਂ ਵੇਖਿਆ। ਇਸ ਤੋਂ ਉਲਟ ਸਗੋਂ ਹੀ ਸਰੋਤਾਂ ਦੇ ਵਿਕਾਸ ਤੇ ਪਾਈਪਲਾਈਨਜ਼ ਦਾ ਵਿਰੋਧ ਹੋਰ ਜਿ਼ਆਦਾ ਵੱਧ ਗਿਆ ਹੈ। ਚੋਣਾਂ ਜਿੱਤਣ ਤੋਂ ਬਾਅਦ ਆਪਣੀ ਪਹਿਲੀ ਇੰਟਰਵਿਊ ਵਿੱਚ ਕੇਨੀ ਨੇ ਕਾਰੋਬਾਰ ਲਈ ਅਲਬਰਟਾ ਦੇ ਦਰਵਾਜ਼ੇ ਖੁੱਲ੍ਹੇ ਹੋਣ ਤੇ ਅਲਬਰਟਾ ਵਾਸੀਆਂ ਲਈ ਸਹੀ ਡੀਲ ਲਿਆਉਣ ਦੇ ਆਪਣੇ ਇਰਾਦੇ ਬਾਰੇ ਜਾਣਕਾਰੀ ਦਿੱਤੀ।