ਲੰਡਨ, 21 ਅਪ੍ਰੈਲ (ਪੋਸਟ ਬਿਊਰੋ)- ਭਾਰਤੀ ਮੂਲ ਦੇ ਇੱਕ ਮੈਡੀਕਲ ਪ੍ਰੋਫੈਸਰ ਦੇ ਖਿਲਾਫ ਮੌਜੂਦਾ ਯੂਨੀਵਰਸਿਟੀ ਦੀ ਜਾਣਕਾਰੀ ਬਿਨਾਂ ਇੱਕ ਹੋਰ ਯੂਨੀਵਰਸਿਟੀ ਵਿੱਚ ਕੰਮ ਕਰਨ ਤੇ ਤਨਖਾਹ ਲੈਣ ਦੇ ਦੋਸ਼ ਦੀ ਜਾਂਚ ਲਈ ਟਿ੍ਰਬਿਊਨਲ ਜਾਂਚ ਦੇ ਹੁਕਮ ਦਿੱਤੇ ਗਏ ਹਨ। ਉਹ ਦੋਵਾਂ ਥਾਵਾਂ ਤੋਂ ਸਾਲ ਤੋਂ ਵੱਧ ਸਮੇਂ ਤੋਂ ਤਨਖਾਹ ਲੈ ਰਿਹਾ ਸੀ।
ਅਖਿਲੇਸ਼ ਰੈੱਡੀ (44) ਨੇ ਮੰਨਿਆ ਹੈ ਕਿ ਉਹ ਕੈਂਬਰਿਜ ਯੂਨੀਵਰਸਿਟੀ ਅਤੇ ਯੂਨੀਵਰਸਿਟੀ ਕਾਲਜ ਲੰਡਨ (ਯੂ ਸੀ ਐੱਲ) ਨਾਲ ਸਤੰਬਰ 2015 ਤੋਂ ਨਵੰਬਰ 2016 ਤੱਕ ਕੰਮ ਕਰ ਰਿਹਾ ਸੀ। ਉਸ ਦੇ ਖਿਲਾਫ ਮਾਮਲੇ ਦੀ ਜਾਂਚ ਇਸੇ ਮਹੀਨੇ ਯੂ ਕੇ ਮੈਡੀਕਲ ਪ੍ਰੈਕਟੀਸ਼ਨਰਜ਼ ਵੱਲੋਂ ਕੀਤੀ ਜਾਵੇਗੀ। ਉਸ ਉਤੇ ਦੋਸ਼ ਹੈ ਕਿ ਉਹ ਯੂ ਸੀ ਐੱਲ ਨੂੰ ਦੱਸੇ ਬਿਨਾਂ ਕੈਂਬਰਿਜ ਲਈ ਵੀ ਕੰਮ ਕਰਦਾ ਰਿਹਾ ਅਤੇ ਤਨਖਾਹ ਲੈਂਦਾ ਰਿਹਾ। ਨੀਂਦ ਨਾਲ ਸੰਬੰਧਤ ਰੋਗਾਂ ਦਾ ਮਾਹਿਰ ਅਖਿਲੇਸ਼ ਉਸ ਵੇਲੇ ਚਰਚਾ ਵਿੱਚ ਆਇਆ, ਜਦ ਉਸ ਨੇ ਰੈੱਡ ਬਲੱਡ ਸੈੱਲਜ਼ ਬਾਰੇ ਇੱਕ ਖੋਜ ਕਾਰਜ ਮੁਕੰਮਲ ਕੀਤਾ। ਉਸ ਨੂੰ ਯੂ ਸੀ ਐੱਲ ਵਿੱਚ ਐਕਸਪੈਰੀਮੈਂਟਲ ਨਿਊਰੋਲੋਜੀ ਚੇਅਰ ਵਿੱਚ ਨਿਯੁਕਤ ਕੀਤਾ ਗਿਆ ਸੀ।
ਯੂਨੀਵਰਸਿਟੀ ਕਾਲਜ ਲੰਡਨ ਦੇ ਬੁਲਾਰੇ ਦਾ ਕਹਿਣਾ ਸੀ ਕਿ ਹਾਲੇ ਉਹ ਜਾਂਚ ਮੁਕੰਮਲ ਹੋਣ ਤੱਕ ਕੁਝ ਨਹੀਂ ਕਹਿ ਸਕਦੇ। ਕੈਂਬਰਿਜ ਦੇ ਬੁਲਾਰੇ ਨੇ ਟਿੱਪਣੀ ਤੋਂ ਨਾਂਹ ਕੀਤੀ ਹੈ। ਰੈੱਡੀ ਇਸ ਵੇਲੇ ਯੂਨੀਵਰਸਿਟੀ ਆਫ ਪੈਨਸਿਲਵਿਲੇਨੀਆ ਵਿੱਚ ਫਾਰਮਾਕੌਲੋਜੀ ਦਾ ਪ੍ਰੋਫੈਸਰ ਹੈ। ਅਮਰੀਕਾ ਦੀ ਯੂਨੀਵਰਸਿਟੀ ਨੂੰ ਵੀ ਇਨ੍ਹਾਂ ਦੋਸ਼ਾਂ ਦੀ ਜਾਣਕਾਰੀ ਨਹੀਂ। ਅਖਿਲੇਸ਼ ਰੈੱਡੀ ਖਿਲਾਫ ਜਾਂਚ ਲਈ ਇੱਕ ਵਿਸ਼ੇਸ਼ ਟਿ੍ਰਬਿਊਨਲ ਦਾ ਗਠਨ ਕਰ ਦਿੱਤਾ ਗਿਆ ਹੈ।