ਬੈਲਫਾਸਟ, 21 ਅਪ੍ਰੈਲ (ਪੋਸਟ ਬਿਊਰੋ)- ਉਤਰੀ ਆਇਰਲੈਂਡ ਦੇ ਲੰਡਨਡੇਰੀ ਸ਼ਹਿਰ 'ਚ ਭੜਕੇ ਦੰਗੇ ਦੌਰਾਨ ਨੌਜਵਾਨ ਪੱਤਰਕਾਰ ਲਾਇਰਾ ਮੈਕੀ ਦੇ ਕਤਲ ਦੇ ਦੋਸ਼ 'ਚ ਦੋ ਜਣਿਆਂ ਨੂੰ ਗ੍ਰਿਫਤਾਰ ਕੀਤਾ ਗਿਆ ਹੈ। ਪੁਲਸ ਛਾਪੇ ਦੀ ਕਾਰਵਾਈ ਦੌਰਾਨ ਭੜਕੀ ਹਿੰਸਾ ਵਿੱਚ 29 ਸਾਲਾ ਮੈਕੀ ਨੂੰ ਦੰਗਾਈਆਂ ਨੇ ਗੋਲੀ ਮਾਰ ਦਿੱਤੀ ਸੀ। ਪੁਲਸ ਇਸ ਮਾਮਲੇ ਨੂੰ ਅੱਤਵਾਦੀ ਘਟਨਾ ਮਨੰਦੇ ਹੋਏ ਜਾਂਚ ਕਰ ਰਹੀ ਹੈ। ਇਨਾਮ ਜੇਤੂ ਪੱਤਰਕਾਰ ਮੈਕੀ ਉਤਰੀ ਆਇਰਲਂਡ ਵਿੱਚ ਦਹਾਕਿਆਂ ਤੋਂ ਚੱਲੀ ਹਿੰਸਾ ਦੇ ਦੌਰ ਵਿੱਚ ਲਾਪਤਾ ਹੋਏ ਲੋਕਾਂ 'ਤੇ ਕਿਤਾਬ ਲਿਖ ਰਹੀ ਸੀ।
ਪੁਲਸ ਨੇ ਕਿਹਾ ਕਿ ਜਾਂਚ ਟੀਮ ਨੇ 18 ਅਤੇ 19 ਸਾਲ ਦੇ ਦੋ ਲੜਕਿਆਂ ਨੂੰ ਇਸ ਕੇਸ ਵਿੱਚ ਗ੍ਰਿਫਤਾਰ ਕੀਤਾ ਹੈ। ਉਤਰੀ ਆਇਰਲੈਂਡ ਵਿੱਚ ਇਸ ਸਮੇਂ ਸਿਆਸੀ ਪਾਰਟੀਆਂ ਦੋ ਥਾਈਂ ਵੰਡੀਆਂ ਹੋਈਆਂ ਹਨ। ਇੱਕ ਵਰਗ ਉਨ੍ਹਾਂ ਲੋਕਾਂ ਦੀ ਹਮਾਇਤ ਕਰਦਾ ਹੈ, ਜਿਹੜਾ ਆਇਰਲੈਂਡ ਨੂੰ ਬ੍ਰਿਟੇਨ ਤੋਂ ਵੱਖ ਕਰਨਾ ਚਾਹੁੰਦੇ ਹਨ, ਦੂਜਾ ਵਰਗ ਬ੍ਰਿਟੇਨ ਦੇ ਨਾਲ ਬਣੇ ਰਹਿਣਾ ਚਾਹੁੰਦਾ ਹੈ। ਇਸ ਘਟਨਾ ਦੀ ਸਾਰੀਆਂ ਪਾਰਟੀਆਂ ਨੇ ਨਿੰਦਾ ਕੀਤੀ ਹੈ। ਨੇਤਾਵਾਂ ਨੇ ਲੋਕਾਂ ਨੂੰ ਸ਼ਾਂਤੀ ਬਣਾਏ ਰੱਖਣ ਦੀ ਅਪੀਲ ਵੀ ਕੀਤੀ ਹੈ। ਇਥੋਂ ਦੀਆਂ ਪ੍ਰਮੁੱਖ ਛੇ ਪਾਰਟੀਆਂ ਦੇ ਨੇਤਾਵਾਂ ਨੇ ਸਾਂਝੇ ਬਿਆਨ ਵਿੱਚ ਕਿਹਾ, ਲਾਇਰਾ ਦੀ ਹੱਤਿਆ ਇਥੋਂ ਦੇ ਨਾਗਰਿਕ 'ਤੇ ਹਮਲਾ ਹੈ। ਇਹ ਸ਼ਾਂਤੀ ਅਤੇ ਲੋਕੰਤਤਰੀ ਪ੍ਰਕਿਰਿਆਵਾਂ 'ਤੇ ਹਮਲਾ ਹੈ। ਇਸ ਸਮੇਂ ਸਭ ਨੂੰ ਧੀਰਜ ਰੱਖਣਾ ਚਾਹੀਦਾ ਹੈ। ਨੇਤਾਵਾਂ ਨੇ ਯੂਰਪੀ ਯੂਨੀਅਨ ਨੂੰ ਬ੍ਰਿਟੇਨ ਦੇ ਵੱਖ ਹੋਣ ਦੀ ਯੋਜਨਾ 'ਤੇ ਚਿਤਾਵਨੀ ਦਿੱਤੀ ਹੈ। ਉਨ੍ਹਾਂ ਦਾ ਕਹਿਣਾ ਹੈ ਕਿ ਇਸ ਕਦਮ ਨਾਲ ਖੇਤਰ ਵਿੱਚ ਅਸਥਿਰਤਾ ਵਧੇਗੀ ਅਤੇ ਅੱਤਵਾਦੀਆਂ ਨੂੰ ਮੌਕਾ ਮਿਲੇਗਾ। ਇਸ ਨਾਲ ਸ਼ਾਂਤੀ ਸਮਝੌਤੇ 'ਤੇ ਵੀ ਖਤਰਾ ਵਧੇਗਾ।
ਉੱਤਰੀ ਆਇਰਲੈਂਡ ਕਰੀਬ ਤਿੰਨ ਦਹਾਕਿਆਂ ਤੱਕ ਭਿਆਨਕ ਹਿੰਸਾ ਦਾ ਸ਼ਿਕਾਰ ਰਿਹਾ ਸੀ। ਇਸ ਵਿੱਚ 3600 ਤੋਂ ਵੱਧ ਲੋਕ ਮਾਰੇ ਗਏ ਸਨ। 1998 'ਚ ਗੁੱਡ ਫਰਾਈਡੇ ਦੇ ਦਿਨ ਹੋਏ ਸਮਝੌਤੇ ਨਾਲ ਇਸ ਹਿੰਸਾ 'ਤੇ ਰੋਕ ਲੱਗੀ ਸੀ। ਹਾਲੇ ਵੀ ਕਈ ਛੋਟੇ ਅੱਤਵਾਦੀ ਗਰੁੱਪ ਸਰਗਰਮ ਹਨ, ਜਿਹੜੇ ਸਮੇਂ ਸਮੇਂ ਹਮਲੇ ਕਰਦੇ ਰਹਿੰਦੇ ਹਨ। ਪੁਲਸ ਦਾ ਕਹਿਣਾ ਹੈ ਕਿ ਗੁੱਡ ਫਰਾਈਡੇ ਸਮਝੌਤੇ ਦਾ ਵਿਰੋਧ ਕਰ ਰਹੇ ਅੱਤਵਾਦੀਆਂ ਨੇ ਵੀਰਵਾਰ ਦੀ ਵਾਰਦਾਤ ਕੀਤੀ ਹੈ। ਪੁਲਸ ਨੇ ਇਸ ਲਈ ਨਿਊ ਆਈ ਆਰ ਏ ਸਮੁੂਹ ਨੂੰ ਜ਼ਿੰਮੇਵਾਰ ਠਹਿਰਾਇਆ ਹੈ।