ਮੁਰਾਦਾਬਾਦ, 21 ਅਪ੍ਰੈਲ (ਪੋਸਟ ਬਿਊਰੋ)- ਫਿਲਮ ਅਦਾਕਾਰਾ ਸੋਨਾਕਸ਼ੀ ਸਿਨਹਾ ਸਮੇਤ ਸੱਤ ਜਣਿਆਂ ਵਿਰੁੱਧ 37 ਲੱਖ ਰੁਪਏ ਦੀ ਧੋਖਾਧੜੀ ਦੇ ਕੇਸ ਦੀ ਜਾਂਚ ਸਥਾਨਕ ਪੁਲਸ ਨੂੰ ਦਿੱਤੀ ਗਈ ਹੈ।
ਜਾਣਕਾਰ ਸੂਤਰਾਂ ਨੇ ਦੱਸਿਆ ਕਿ ਕੋਤਵਾਲੀ ਕਟਘਰ ਦੇ ਪ੍ਰਮੋਦ ਸ਼ਰਮਾ ਵਾਸੀ ਸ਼ਿਵਪੁਰੀ ਨੇ 24 ਨਵੰਬਰ ਨੂੰ ਐੱਸ ਐੱਸ ਪੀ ਨੂੰ ਦੱਸਿਆ ਸੀ ਕਿ ਦਿੱਲੀ ਵਿੱਚ ਤੀਹ ਸਤੰਬਰ ਨੂੰ ਉਨ੍ਹਾਂ ਨੇ ਇੰਡੀਆ ਫੈਸ਼ਨ ਐਂਡ ਬਿਊਟੀ ਐਵਾਰਡ ਪ੍ਰੋਗਰਾਮ ਰੱਖਿਆ ਸੀ, ਜਿਸ ਵਿੱਚ ਐਵਾਰਡ ਵੰਡਣ ਲਈ ਬਾਲੀਵੁੱਡ ਅਦਾਕਾਰਾ ਸੋਨਾਕਸ਼ੀ ਸਿਨਹਾ ਨੇ ਆਉਣਾ ਸੀ। ਸੋਨਾਕਸ਼ੀ ਨੂੰ ਬੁਲਾਵੇ ਦਾ ਸਮਝੌਤਾ ਟੈਲੇਂਟ ਫੁਲ ਆਨ ਕੰਪਨੀ ਦੇ ਅਭਿਸ਼ੇਕ ਸਿਨਹਾ ਨਾਲ 24 ਲੱਖ ਰੁਪਏ ਵਿੱਚ ਹੋਇਆ ਸੀ। ਉਸ ਨੂੰ ਬੁਲਾਉਣ ਲਈ ਟੈਲੇਂਟ ਫੁਲ ਆਨ ਕੰਪਨੀ ਨੇ ਐਕਸਿਡ ਇੰਟਰਟੇਨਮੈਂਟ ਕੰਪਨੀ ਦੇ ਧੂਮਲ ਠੱਕਰ, ਐਡਗਰਸਕੇ ਰੀਆ ਦੇ ਨਾਲ ਸੋਨਾਕਸ਼ੀ ਦੀ ਮੈਨੇਜਰ ਮਾਲਵਿਕਾ ਪੰਜਾਬੀ ਨਾਲ ਸੰਪਰਕ ਕੀਤਾ ਤੇ ਪਿਛਲੇ ਸਾਲ ਜੂਨ ਵਿੱਚ ਸਮਝੌਤਾ ਹੋ ਗਿਆ ਤੇ ਇੱਕ ਵੀਡੀਓ ਵਾਇਰਲ ਕਰ ਕੇ ਸੋਨਾਕਸ਼ੀ ਨੇ ਪ੍ਰੋਗਰਾਮ ਵਿੱਚ ਆਉਣ ਦੀ ਜਾਣਕਾਰੀ ਦਿੱਤੀ ਸੀ। 37 ਲੱਖ ਰੁਪਏ ਦੀ ਰਕਮ ਮੁਰਾਦਾਬਾਦ ਤੋਂ ਆਨਲਾਈਨ ਟ੍ਰਾਂਸਫਰ ਕੀਤੀ ਗਈ ਤੇ ਇਨ੍ਹਾਂ ਵਿੱਚੋਂ ਚਾਰ ਲੱਖ ਰੁਪਏ ਸੋਨਾਕਸ਼ੀ ਦੇ ਖਾਤੇ ਵਿੱਚ ਟਰਾਂਸਫਰ ਹੋਏ ਸਨ। ਬਾਕੀ 33 ਲੱਖ ਰੁਪਏ ਅਭਿਸ਼ੇਕ ਦੀ ਕੰੇਪਨੀ ਟੈਲੇਂਟ ਫੁਲ ਆਨ ਅਤੇ ਉਨ੍ਹਾਂ ਦੀ ਪਤਨੀ ਸਵਾਤੀ ਦੇ ਇਲਾਵਾ ਆਸ਼ੀਸ਼ ਦੇ ਖਾਤੇ ਵਿੱਚ ਗਏ ਸਨ। ਇਸ ਦੇ ਬਾਅਦ ਵੀ ਤੀਹ ਸਤੰਬਰ ਨੂੰ ਉਹ ਪ੍ਰੋਗਰਾਮ ਵਿੱਚ ਨਹੀਂ ਆਈ।
ਪੀੜਤ ਪ੍ਰਮੋਦ ਦਾ ਦੋਸ਼ ਹੈ ਕਿ ਉਨ੍ਹਾਂ ਨਾਲ 37 ਲੱਖ ਰੁਪਏ ਦੀ ਧੋਖਾਧੜੀ ਕੀਤੀ ਗਈ ਹੈ। ਇਸ ਦੀ ਜਾਂਚ ਸੀ ਓ ਕਟਘਰ ਸੁਦੇਸ਼ ਗੁਪਤਾ ਨੂੰ ਸੌਂਪੀ ਗਈ ਸੀ। ਪੁਲਸ ਵੱਲੋਂ ਇਸ ਮਾਮਲੇ ਵਿੱਚ ਕੋਈ ਦਿਲਚਸਪੀ ਨਾ ਦਿਖਾਉਣ ਤੋਂ ਪ੍ਰੇਸ਼ਾਨ ਪ੍ਰਮੋਦ ਨੇ 13 ਫਰਵਰੀ ਨੂੰ ਜ਼ਹਿਰ ਖਾ ਕੇ ਖੁਦਕੁਸ਼ੀ ਕਰਨ ਦੀ ਕੋਸ਼ਿਸ ਕੀਤੀ ਤਾਂ ਮਾਮਲੇ ਦੀ ਮੁਰਾਦਾਬਾਦ ਵਿੱਚ ਹੀ ਜਾਂਚ ਕੀਤੇ ਜਾਣ ਦਾ ਫੈਸਲਾ ਪੁਲਸ ਨੇ ਕੀਤਾ ਅਤੇ ਕੇਸ ਦਰਜ ਕਰ ਲਿਆ ਹੈ।