ਨਵੀਂ ਦਿੱਲੀ, 21 ਅਪ੍ਰੈਲ (ਪੋਸਟ ਬਿਊਰੋ)- ਤੇਲੰਗਾਨਾ ਪੁਲਸ ਦੀ ਵਿਸ਼ੇਸ਼ ਜਾਂਚ ਟੀਮ ਨੇ ਡਾਟਾ ਚੋਰੀ ਦਾ ਕੇਸ ਹੱਲ ਕਰ ਲਿਆ ਹੈ। ਆਈ ਟੀ ਗਰਿੱਡ ਇੰਡੀਆ ਦੀਆਂ ਹਾਰਡ ਡਿਸਕਾਂ ਫੜੇ ਜਾਣ ਪਿੱਛੋਂ ਕੀਤੀ ਜਾਂਚ ਤੋਂ ਇਹ ਸਾਹਮਣੇ ਆਇਆ ਹੈ ਕਿ ਇਸ ਕੰਪਨੀ ਨੇ ਪੰਜਾਬ ਨਾਲ ਸੰਬੰਧਤ ਦੋ ਕਰੋੜ ਆਧਾਰ ਕਾਰਡਾਂ ਦਾ ਡਾਟਾ ਚੋਰੀ ਕੀਤਾ ਹੈ।
ਇਸ ਤੋਂ ਪਹਿਲਾਂ ਇਸ ਕੰਪਨੀ ਵੱਲੋਂ ਆਂਧਰਾ ਪ੍ਰਦੇਸ਼ ਤੇ ਤੇਲੰਗਾਨਾ ਰਾਜਾਂ ਦੇ ਨਾਲ ਸੰਬੰਧਤ 7.82 ਕਰੋੜ ਆਧਾਰ ਕਾਰਡਾਂ ਦਾ ਡਾਟਾ ਚੋਰੀ ਕਰਨ ਦਾ ਪਰਦਾ ਫਾਸ਼ ਹੋ ਚੁੱਕਾ ਹੈ। ਅਧਿਕਾਰੀ ਇਸ ਗੱਲ ਤੋਂ ਹੈਰਾਨ ਹਨ ਕਿ ਕੰਪਨੀ ਨੇ ਪੰਜਾਬ ਨਾਲ ਸੰਬੰਧਤ ਇੰਨੀ ਵੱਡੀ ਗਿਣਤੀ ਵਿੱਚ ਡਾਟਾ ਕਿਉਂ ਸਾਂਭ ਕੇ ਰੱਖਿਆ ਸੀ। ਜਾਂਚ ਏਜੰਸੀਆਂ ਦਾ ਕਹਿਣਾ ਹੈ ਕਿ ਕੰਪਨੀ ਦੇ ਮੁੱਖ ਕਾਰਜਕਾਰੀ ਅਧਿਕਾਰੀਆਂ ਦੀ ਪੁੱਛਗਿੱਛ ਤੋਂ ਬਾਅਦ ਇਸ ਦਾ ਰਾਜ ਸਾਹਮਣੇ ਆਵੇਗਾ।
ਵਰਨਣ ਯੋਗ ਹੈ ਕਿ ਯੂਨੀਕ ਆਈਡੈਂਟੀਫਿਕੇਸ਼ਨ ਅਥਾਰਟੀ ਆਫ ਇੰਡੀਆ (ਯੂ ਆਈ ਡੀ ਏ ਆਈ) ਨੇ ਆਪਣੇ ਸਰਵਰ ਤੋਂ ਡਾਟਾ ਲੀਕ ਹੋਣ ਜਾਂ ਇਸ 'ਚ ਸੰਨ੍ਹ ਲੱਗਣ ਦੀਆਂ ਰਿਪੋਰਟਾਂ ਨੂੰ ਕਈ ਵਾਰੀ ਰੱਦ ਕੀਤਾ ਹੈ। ਪੰਜਾਬ ਵਿਚਲੇ ਆਧਾਰ ਕਾਰਡਾਂ ਬਾਰੇ ਕੰਪਨੀ ਕੋਲ ਜਾਣਕਾਰੀ ਦਾ ਉਦੋਂ ਪਤਾ ਲੱਗਾ, ਜਦੋਂ ਆਈ ਟੀ ਗਰਿੱਡ (ਇੰਡੀਆ) ਆਂਧਰਾ ਪ੍ਰਦੇਸ਼ ਅਤੇ ਤੇਲੰਗਾਨਾ ਨਾਲ ਸੰਬੰਧਤ 7.382 ਕਰੋੜ ਲੋਕਾਂ ਬਾਰੇ ਨਿੱਜੀ ਜਾਣਕਾਰੀ ਰੱਖਣ ਕਰ ਕੇ ਫਸ ਗਈ। ਬੀਤੇ ਬੁੱਧਵਾਰ ਯੂ ਆਈ ਡੀ ਏ ਨੇ ਕਿਹਾ ਸੀ ਕਿ ਉਸ ਦੇ ਸਰਵਰ ਸੁਰੱਖਿਅਤ ਹਨ। ਉਸ ਦੇ ਬਿਆਨ ਅਨੁਸਾਰ ਹੋਰਨਾਂ ਲੋਕਾਂ ਦੇ ਆਧਾਰ ਨੰਬਰ ਆਪਣੇ ਕਬਜ਼ੇ ਵਿੱਚ ਰੱਖਣ ਦੇ ਦੋਸ਼ ਵਿੱਚ ਵਿਸ਼ੇਸ਼ ਹਾਲਤਾਂ ਵਿੱਚ ਅਪਰਾਧਕ ਕਾਰਵਾਈ ਹੋ ਸਕਦੀ ਹੈ ਅਤੇ ਆਧਾਰ ਕਾਰਡ ਦੀ ਜਾਣਕਾਰੀ ਰੱਖ ਕੇ ਕਾਰਡ ਹੋਲਡਰ ਨੂੰ ਕਿਸੇ ਤਰ੍ਹਾਂ ਦਾ ਨੁਕਸਾਨ ਪਹੁੰਚਾਉਣਾ ਸੰਭਵ ਨਹੀਂ, ਕਿਉਂਕਿ ਆਧਾਰ ਕਾਰਡ ਬਾਰੇ ਕਿਸੇ ਵੀ ਤਰ੍ਹਾਂ ਦੀ ਸਰਵਿਸ ਲਈ ਬਾਇਓਮੈਟਿ੍ਰਕ ਢੰਗ ਨਾਲ ਸ਼ਨਾਖਤ ਜਾਂ ਵਨ ਟਾਈਮ ਪਾਸਵਰਡ (ਓ ਟੀ ਪੀ) ਦੀ ਲੋੜ ਹੁੰਦੀ ਹੈ। ਯੂ ਆਈ ਡੀ ਏ ਆਈ ਨੇ ਤੇਲੰਗਾਨਾ ਪੁਲਸ ਦੀ ਰਿਪੋਰਟ ਦੇ ਆਧਾਰ ਉੱਤੇ ਕੇਸ ਦਰਜ ਕਰਵਾ ਦਿੱਤਾ ਹੈ। ਤੇਲੰਗਾਨਾ ਪੁਲਸ ਦੇ ਅਨੁਸਾਰ ਡਾਟਾ ਚੋਰੀ ਕਰ ਕੇ ਇਸ ਰਾਹੀਂ ਰਾਜਾਂ ਵਿੱਚ ਵੋਟਰਾਂ ਨਾਲ ਸੰਪਰਕ ਕੀਤਾ ਹੋ ਸਕਦਾ ਹੈ। ਜਾਂਚ ਟੀਮ ਨੂੰ ਕੰਪਨੀ ਦੇ ਕਬਜ਼ੇ 'ਚੋਂ 60 ਹਾਰਡ ਡਿਸਕਾਂ, ਪੈਨ ਡਰਾਈਵ ਅਤੇ ਮੈਮਰੀ ਕਾਰਡ ਮਿਲੇ ਹਨ।