ਸਮਰਾਲਾ, 21 ਅਪ੍ਰੈਲ (ਪੋਸਟ ਬਿਊਰੋ)- ਕਕਰਾਲਾਂ ਖੁਰਦ ਦੇ ਵਾਸੀ ਗੁਰਜੰਟ ਸਿੰਘ (50) ਨੂੰ ਪਿੰਡ ਕੋਟਲਾ ਵਿੱਚ ਓਦੋਂ ਕੁੱਟ-ਕੁੱਟ ਕੇ ਮਾਰ ਦਿੱਤਾ ਗਿਆ, ਜਦ ਉਹ ਕੋਟਲਾ ਪਿੰਡ ਦੇ ਅਵਤਾਰ ਸਿੰਘ ਦੀ ਪਤਨੀ ਸੰਦੀਪ ਕੌਰ ਨੂੰ ਮਿਲਣ ਗਿਆ ਸੀ। ਜਦ ਉਹ ਅਵਤਾਰ ਸਿੰਘ ਦੇ ਘਰ ਗਿਆ ਤਾਂ ਅਵਤਾਰ ਸਿੰਘ ਉਸ ਨੂੰ ਕੁੱਟਣ ਲੱਗਾ ਤੇ ਇਸ ਵਿੱਚ ਉਸ ਦੀ ਪਤਨੀ ਸੰਦੀਪ ਕੌਰ ਨੇ ਵੀ ਉਸ ਦਾ ਸਾਥ ਦਿੱਤਾ।
ਪਤਾ ਲੱਗਾ ਹੈ ਕਿ ਗੁਰਜੰਟ ਸਿੰਘ ਦੇ ਤਾਏ ਦਾ ਬੇਟਾ ਜਸਦੇਵ ਸਿੰਘ ਵੀ ਮੋਟਰ ਸਾਈਕਲ 'ਤੇ ਉਸ ਦੇ ਨਾਲ ਗਿਆ ਸੀ, ਜੋ ਗੁਰਜੰਟ ਸਿੰਘ ਨੂੰ ਕੁੱਟਦੇ ਦੇਖ ਕੇ ਦੌੜ ਗਿਆ ਅਤੇ ਪੁਲਸ ਨੂੰ ਸੁੂਚਨਾ ਦਿੱਤੀ। ਉਸ ਨੇ ਪੁਲਸ ਨੂੰ ਬਿਆਨ ਦਿੱਤੇ ਕਿ ਰਾਤ ਗੁਰਜੰਟ ਸਿੰਘ ਉਸ ਨੂੰ ਪਿੰਡ ਕੋਟਲਾ ਵਿੱਚ ਅਵਤਾਰ ਸਿੰਘ ਦੇ ਘਰ ਇਹ ਕਹਿ ਕੇ ਲੈ ਗਿਆ ਸੀ ਕਿ ਅਵਤਾਰ ਸਿੰਘ ਦੀ ਪਤਨੀ ਨਾਲ ਉਸ ਦੀ ਜਾਣ-ਪਛਾਣ ਹੈ ਤੇ ਕੰਮ ਦੇ ਸਿਲਸਿਲੇ ਵਿੱਚ ਉਸ ਨੂੰ ਮਿਲਣ ਜਾਣਾ ਹੈ। ਜਦੋਂ ਉਹ ਉਸ ਦੇ ਘਰ ਪਹੁੰਚੇ ਤਾਂ ਸੰਦੀਪ ਕੌਰ ਦੇ ਪਤੀ ਅਵਤਾਰ ਸਿੰਘ ਨੇ ਗੁਰਜੰਟ ਸਿੰਘ ਨੂੰ ਡੰਡਿਆਂ ਨਾਲ ਕੁੱਟਣਾ ਸ਼ੁਰੂ ਕਰ ਦਿੱਤਾ ਤੇ ਉਹ ਬੇਹੋਸ਼ ਹੋ ਗਿਆ। ਗੁਰਜੰਟ ਸਿੰਘ ਦੀ ਹਾਲਤ ਖਰਾਬ ਹੁੰਦੀ ਦੇਖ ਕੇ ਪਤੀ-ਪਤਨੀ ਇਲਾਜ ਦੇ ਲਈ ਉਸ ਨੂੰ ਸਿਵਲ ਹਸਪਤਾਲ ਲੈ ਗਏ, ਜਿੱਥੇ ਡਾਕਟਰਾਂ ਨੇ ਉਸ ਨੂੰ ਮ੍ਰਿਤਕ ਕਰਾਰ ਦੇ ਦਿੱਤਾ। ਪੁਲਸ ਨੇ ਜਸਦੇਵ ਦੇ ਬਿਆਨਾਂ ਉਤੇ ਅਵਤਾਰ ਸਿੰਘ ਅਤੇ ਉਸ ਦੀ ਪਤਨੀ ਸੰਦੀਪ ਕੌਰ 'ਤੇ ਕਤਲ ਕਰਨ ਦਾ ਕੇਸ ਦਰਜ ਕਰ ਕੇ ਅਵਤਾਰ ਸਿੰਘ ਨੂੰ ਗ੍ਰਿਫਤਾਰ ਕਰ ਲਿਆ ਹੈ ਗੁਰਜੰਟ ਸਿੰਘ ਰੇਲਵੇ ਵਿਭਾਗ ਭੋਪਾਲ ਵਿੱਚ ਨੌਕਰੀ ਕਰਦਾ ਸੀ ਤੇ ਕੱਲ੍ਹ ਹੀ ਆਪਣੇ ਘਰ ਆਇਆ ਸੀ।