ਚੰਡੀਗੜ੍ਹ, 21 ਅਪ੍ਰੈਲ (ਪੋਸਟ ਬਿਊਰੋ)- ਪੰਜਾਬ ਵਿੱਚ ਪਾਰਲੀਮੈਂਟ ਚੋਣਾਂ ਬਾਰੇ ਦੋ ਖੱਬੇ ਪੱਖੀ ਪਾਰਟੀਆਂ ਸੀ ਪੀ ਆਈ ਅਤੇ ਸੀ ਪੀ ਆਈ (ਐੱਮ) ਵਿੱਚ ਤਰੇੜਾਂ ਪੈ ਗਈਆਂ ਲੱਗਦੀਆਂ ਹਨ। ਸੀ ਪੀ ਐੱਮ ਨੇ ਸਟੈਂਡ ਲੈ ਲਿਆ ਹੈ ਕਿ ਪੰਜਾਬ ਵਿੱਚ ਆਮ ਆਦਮੀ ਪਾਰਟੀ ਤੋਂ ਬਾਗੀ ਹੋਏ ਸੁਖਪਾਲ ਸਿੰਘ ਖਹਿਰਾ ਦੀ ਅਗਵਾਈ ਵਾਲੇ ਪੰਜਾਬ ਜਮਹੂਰੀ ਗਠਜੋੜ (ਪੀ ਡੀ ਏ) ਦੀ ਅਮਲੀ ਤੌਰ ਉਤੇ ਕੋਈ ਹੋਂਦ ਨਹੀਂ, ਇਹ ਗੈਰ ਸੰਵਿਧਾਨਕ ਗਠਜੋੜ ਹੈ, ਜਿਸ ਵਿੱਚ ਸੀ ਪੀ ਆਈ ਆਪਣੇ ਆਪ ਨੂੰ ਸ਼ਾਮਲ ਹੋਇਆ ਸਮਝਦੀ ਹੈ ਅਤੇ ਇਸ ਨੇ ਇਸ ਗਠਜੋੜ ਦੇ ਸਮਰਥਨ ਨਾਲ ਦੋ ਉਮੀਦਵਾਰ ਅੰਮ੍ਰਿਤਸਰ ਤੇ ਫਿਰੋਜ਼ਪੁਰ ਤੋਂ ਖੜੇ ਕਰ ਦਿੱਤੇ ਹਨ। ਦੂਸਰੇ ਪਾਸੇ ਸੀ ਪੀ ਐੱਮ ਦੇ ਪੰਜਾਬ ਦੇ ਸੈਕਟਰੀ ਸੁਖਵਿੰਦਰ ਸਿੰਘ ਸੇਖੋਂ ਦੀ ਰਾਏ ਹੈ ਕਿ ਇਸ ਗਠਜੋੜ ਵਿੱਚ ਖਾਲਿਸਤਾਨ ਸਮਰਥਕ ਵੀ ਹਨ ਅਤੇ ਸੀ ਪੀ ਐੱਮ ਇਨ੍ਹਾਂ ਨਾਲ ਮਿਲ ਕੇ ਚੋਣਾਂ ਨਹੀਂ ਲੜ ਸਕਦੀ। ਉਨ੍ਹਾਂ ਨੇ ਪੰਜਾਬ ਵਿੱਚ ਇੱਕੋ ਉਮੀਦਵਾਰ ਰਘੂਨਾਥ ਸਿੰਘ ਖੜਾ ਕੀਤਾ ਹੈ।
ਖੱਬੇ ਪੱਖੀਆਂ ਦੇ ਜਾਣਕਾਰ ਹਲਕਿਆਂ ਦਾ ਕਹਿਣਾ ਹੈ ਕਿ ਅਕਾਲੀ ਦਲ ਟਕਸਾਲੀ ਅਤੇ ਆਮ ਆਦਮੀ ਪਾਰਟੀ ਨੇ ਖਹਿਰਾ ਧੜੇ ਵੱਲੋਂ ਖਡੂਰ ਸਾਹਿਬ ਹਲਕੇ ਤੋਂ ਪੀ ਡੀ ਏ ਉਮੀਦਵਾਰ ਬੀਬੀ ਪਰਮਜੀਤ ਕੌਰ ਖਾਲੜਾ ਵਾਸਤੇ ਕਈ ਤਰ੍ਹਾਂ ਦੀਆਂ ਅੜਚਣਾਂ ਖੜ੍ਹੀਆਂ ਕਰ ਦਿੱਤੀਆਂ ਹਨ। ਉਨ੍ਹਾਂ ਦੋਵਾਂ ਪਾਰਟੀਆਂ ਦੇ ਮੁਖੀਆਂ ਰਣਜੀਤ ਸਿੰਘ ਬ੍ਰਹਮਪੁਰਾ ਤੇ ਭਗਵੰਤ ਮਾਨ ਨੇ ਸਟੈਂਡ ਲੈ ਲਿਆ ਹੈ ਕਿ ਜੇ ਸੁਖਪਾਲ ਸਿੰਘ ਖਹਿਰਾ ਬੀਬੀ ਪਰਮਜੀਤ ਕੌਰ ਖਾਲੜਾ ਨੂੰ ਪੀ ਡੀ ਏ ਗੱਠਜੋੜ ਦੀ ਬਜਾਏ ਆਜ਼ਾਦ ਉਮੀਦਵਾਰ ਵਜੋਂ ਪੇਸ਼ ਕਰਨ ਤਾਂ ਉਹ ਬਿਨਾਂ ਸ਼ਰਤ ਸਮਰਥਨ ਦੇਣ ਲਈ ਤਿਆਰ ਹਨ। ਟਕਸਾਲੀਆਂ ਨੇ ਆਪਣੇ ਉਮੀਦਵਾਰ ਜੇ ਜੇ ਸਿੰਘ ਨੂੰ ਬਿਠਾ ਲਿਆ ਹੈ।