* ਚਾਰਟਰਡ ਅਕਾਊਂਟੈਂਟ ਵੀ ਨਾਲ ਵੀ ਫੜਿਆ ਗਿਆ
ਟਾਂਡਾ ਉੜਮੁੜ, 20 ਅਪ੍ਰੈਲ (ਪੋਸਟ ਬਿਊਰੋ)- ਵਿਜੀਲੈਂਸ ਬਿਊਰੋ ਦੀ ਹੁਸ਼ਿਆਰਪੁਰ ਟੀਮ ਨੇ ਕੱਲ੍ਹ ਟਾਂਡਾ ਦੇ ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਦੇ ਕਾਰਜਕਾਰਨੀ ਦੇ ਮੈਂਬਰ ਜਥੇਦਾਰ ਤਾਰਾ ਸਿੰਘ ਸੱਲ੍ਹਾਂ ਦੇ ਵ੍ਹਾਈਟ ਹਾਊਸ ਪੈਲਸ ਵਿੱਚ ਦੋ ਲੱਖ ਰੁਪਏ ਦੀ ਰਿਸ਼ਵਤ ਲੈਂਦੇ ਐਕਸਾਈਜ਼ ਐਂਡ ਟੈਕਸੇਸ਼ਨ ਦੇ ਫਲਾਇੰਗ ਵਿੰਗ ਦੇ ਏ ਈ ਟੀ ਸੀ-ਕਮ-ਅਸਿਸਟੈਂਟ ਕਮਿਸ਼ਨਰ ਸੇਲਜ਼ ਟੈਕਸ (ਜੀ ਐਸ ਟੀ) ਹਰਮੀਤ ਸਿੰਘ ਨੂੰ ਰੰਗੇ ਹੱਥੀਂ ਫੜਿਆ ਹੈ। ਡੀ ਐਸ ਪੀ ਹੁਸ਼ਿਆਰਪੁਰ ਦਲਬੀਰ ਸਿੰਘ ਹੋਠੀ ਦੀ ਅਗਵਾਈ ਵਿੱਚ ਵਿਜੀਲੈਂਸ ਦੀ ਇਸ ਕਾਰਵਾਈ ਮੌਕੇ ਈ ਟੀ ਓ ਦੇ ਇਸ ਜਾਲ 'ਚ ਮਦਦ ਕਰਨ ਵਾਲਾ ਸਥਾਨਕ ਸੀ ਏ ਰਮਨ ਸੋਂਧੀ (ਵਾਸੀ ਅਹੀਆਪੁਰ) ਵੀ ਫੜਿਆ ਗਿਆ ਹੈ।
ਪਤਾ ਲੱਗਾ ਹੈ ਕਿ ਟਾਂਡਾ-ਸ੍ਰੀ ਹਰਿਗੋਬਿੰਦਪੁਰ ਰੋਡ ਉੱਤੇ ਪਿੰਡ ਗਿੱਲ ਨੇੜੇ ਜਥੇਦਾਰ ਤਾਰਾ ਸਿੰਘ ਸੱਲ੍ਹਾਂ ਦੇ ਵ੍ਹਾਈਟ ਹਾਊਸ ਪੈਲਸ ਵਿੱਚ ਇਹ ਅਧਿਕਾਰੀ ਹਰਮੀਤ ਸਿੰਘ ਓਥੋਂ ਦੇ ਪ੍ਰਬੰਧਕਾਂ ਨੂੰ ਜੀ ਐਸ ਟੀ ਟੈਕਸ ਦਾ ਡਰਾਵਾ ਦੇ ਕੇ ਤੰਗ ਕਰ ਰਿਹਾ ਸੀ ਤੇ ਇਸ ਵਿੱਚ ਟਾਂਡਾ ਪੈਲਸ ਲਈ ਸੇਵਾਵਾਂ ਦੇਣ ਵਾਲਾ ਸਥਾਨਕ ਚਾਰਟਰਡ ਅਕਾਊਂਟੈਂਟ (ਸੀ ਏ) ਰਮਨ ਸੋਂਧੀ ਉਸ ਦੀ ਮਦਦ ਕਰ ਰਿਹਾ ਸੀ। ਇਹ ਸਿਲਸਿਲਾ ਇਸ ਸਾਲ ਫਰਵਰੀ ਵਿੱਚ ਸ਼ੁਰੂ ਹੋਇਆ ਸੀ ਜਦੋਂ 11 ਮਹੀਨੇ ਦੇ ਰਹਿੰਦੇ ਜੀ ਐਸ ਟੀ ਟੈਕਸ ਬਕਾਏ ਬਾਰੇ ਰੇਡ ਕਰ ਕੇ ਹਰਮੀਤ ਸਿੰਘ ਇਸ ਪੈਲਸ ਵਿੱਚੋਂ ਦਸਤਾਵੇਜ਼ ਜਬਰੀ ਚੁੱਕ ਕੇ ਲੈ ਗਿਆ ਸੀ ਤੇ ਉਸ ਨੇ ਪ੍ਰਬੰਧਕਾਂ ਨੂੰ ਡਰਾ ਕੇ ਸੱਤ ਲੱਖ ਰੁਪਏ ਦੀ ਰਿਸ਼ਵਤ ਮੰਗੀ ਤੇ ਸੀ ਏ ਸੋਂਧੀ ਦੀ ਮਦਦ ਨਾਲ ਪਿਛਲੇ 10 ਦਿਨਾਂ ਵਿੱਚ ਤਿੰਨ ਲੱਖ ਰੁਪਏ ਲੈ ਜਾਣ ਤੋਂ ਬਾਅਦ ਦੋ ਲੱਖ ਰੁਪਏ ਹੋਰ ਦੀ ਮੰਗ ਕਰ ਰਿਹਾ ਸੀ। ਇਸ ਅਧਿਕਾਰੀ ਤੋਂ ਤੰਗ ਆ ਕੇ ਤਾਰਾ ਸਿੰਘ ਸੱਲ੍ਹਾਂ ਨੇ ਇਸ ਦੀ ਸ਼ਿਕਾਇਤ ਵਿਜੀਲੈਂਸ ਨੂੰ ਕੀਤੀ ਤਾਂ ਡੀ ਐਸ ਪੀ ਵਿਜੀਲੈਂਸ ਹੁਸ਼ਿਆਰਪੁਰ ਦਲਬੀਰ ਸਿੰਘ ਹੋਠੀ ਦੀ ਅਗਵਾਈ ਵਾਲੀ ਟੀਮ ਨੇ ਕੱਲ੍ਹ ਸਵੇਰ ਤੋਂ ਪੈਲਸ ਵਿੱਚ ਟਰੈਪ ਲਾ ਲਿਆ ਸੀ। ਦੱਸੇ ਸਮੇਂ ਮੁਤਾਬਕ ਏ ਈ ਟੀ ਸੀ ਹਰਮੀਤ ਸਿੰਘ ਅਤੇ ਸੀ ਏ ਸੋਂਧੀ ਦੁਪਹਿਰ ਦੋ ਵਜੇ ਪੈਲਸ ਆਏ ਤੇ ਜਦੋਂ ਅਧਿਕਾਰੀ ਨੇ ਦੋ ਲੱਖ ਰੁਪਏ ਦੀ ਰਿਸ਼ਵਤ ਫੜ ਕੇ ਅੱਗੋਂ ਸੀ ਏ ਨੂੰ ਫੜਾਈ ਤਾਂ ਵਿਜੀਲੈਂਸ ਟੀਮ ਨੇ ਦੋਵਾਂ ਨੂੰ ਰੰਗੇ ਹੱਥੀਂ ਫੜ ਲਿਆ।