ਇਸਲਾਮਾਬਾਦ, 19 ਅਪ੍ਰੈਲ (ਪੋਸਟ ਬਿਊਰੋ)- ਨਕਦੀ ਅਤੇ ਭੁਗਤਾਨ ਦੇ ਸੰਕਟ ਨਾਲ ਜੂਝ ਰਹੇ ਪਾਕਿਸਤਾਨ ਦੇ ਖਜ਼ਾਨਾ ਮੰਤਰੀ ਅਸਦ ਉਮਰ ਨੇ ਅੰਤਰਰਾਸ਼ਟਰੀ ਕਰੰਸੀ ਫੰਡ (ਆਈ ਐੱਮ ਐੱਫ) ਤੋਂ ਮਿਲਣ ਵਾਲੇ ਕਿਸੇ ਮਹੱਤਵ ਵਾਲੇ ਰਾਹਤ ਪੈਕੇਜ ਦਾ ਸਮਝੌਤਾ ਹੋਣ ਤੋਂ ਪਹਿਲਾਂ ਕੱਲ੍ਹ ਅਸਤੀਫਾ ਦੇ ਦਿੱਤਾ ਹੈ।
ਵਰਨਣ ਯੋਗ ਹੈ ਕਿ ਅਸਦ ਉਮਰ ਆਈ ਐੱਮ ਐੱਫ ਤੋਂ ਰਾਹਤ ਪੈਕੇਜ ਦਿਵਾਉਣ ਲਈ ਚੱਲਦੀ ਗੱਲਬਾਤ ਵਿੱਚ ਪਾਕਿਸਤਾਨ ਦੀ ਅਗਵਾਈ ਕਰ ਰਹੇ ਸਨ। ਪਾਕਿਸਤਾਨ ਦੀ ਇਮਰਾਨ ਖਾਨ ਸਰਕਾਰ ਤੇ ਖਾਸ ਤੌਰ ਉੱਤੇ ਖਜ਼ਾਨਾ ਮੰਤਰੀ ਅਸਦ ਉਮਰ ਬਹੁਤ ਹੀ ਖਰਾਬ ਆਰਥਿਕ ਹਾਲਤ ਬਾਰੇ ਲਗਾਤਾਰ ਵਿਰੋਧੀ ਧਿਰਾਂ, ਕਾਰੋਬਾਰ ਜਗਤ ਤੇ ਲੋਕਾਂ ਦੇ ਨਿਸ਼ਾਨੇ 'ਤੇ ਆਏ ਹੋਏ ਸਨ। ਉਨ੍ਹਾਂ ਨੇ ਪ੍ਰਧਾਨ ਮੰਤਰੀ ਇਮਰਾਨ ਖਾਨ ਵੱਲੋਂ ਉਨ੍ਹਾਂ ਨੂੰ ਵਿੱਤ ਮੰਤਰਾਲੇ ਤੋਂ ਹਟਾ ਕੇ ਊਰਜਾ ਮੰਤਰਾਲੇ ਦਾ ਅਹੁਦਾ ਦੇਣ ਦੀ ਪੇਸ਼ਕਸ਼ ਦੇ ਬਾਅਦ ਅਸਤੀਫਾ ਦੇ ਦਿੱਤਾ। ਅਸਦ ਉਮਰ ਪਿਛਲੇ ਦਿਨੀਂ ਆਈ ਐੱਮ ਐੱਫ ਦੇ ਨਾਲ ਚਰਚਾ ਦੇ ਬਾਅਦ ਅਮਰੀਕਾ ਤੋਂ ਵਾਪਸ ਪਰਤੇ ਅਤੇ ਉਨ੍ਹਾਂ ਨੇ ਕਿਹਾ ਸੀ ਕਿ ਉਹ ਮੰਤਰੀ ਮੰਡਲ ਦਾ ਕੋਈ ਵੀ ਅਹੁਦਾ ਨਾ ਲੈਣ ਬਾਰੇ ਪ੍ਰਧਾਨ ਮੰਤਰੀ ਦੀ ਸਹਿਮਤੀ ਲੈ ਚੁੱਕੇ ਹਨ। ਉਨ੍ਹਾਂ ਨੇ ਕਿਹਾ ਕਿ ਮੰਤਰੀ ਮੰਡਲ ਵਿੱਚ ਫੇਰਬਦਲ ਦੀ ਯੋਜਨਾ ਦੇ ਤਹਿਤ ਪ੍ਰਧਾਨ ਮੰਤਰੀ ਚਾਹੁੰਦੇ ਸਨ ਕਿ ਮੈਂ ਵਿੱਤ ਮੰਤਰਾਲੇ ਦੀ ਜਗ੍ਹਾ ਊਰਜਾ ਮੰਤਰਾਲੇ ਦਾ ਕੰਮ ਸੰਭਾਲਾਂ, ਪਰ ਮੈਂ ਮੰਤਰੀ ਮੰਡਲ ਦਾ ਕੋਈ ਵੀ ਅਹੁਦਾ ਨਾ ਲੈਣ ਉਤੇ ਉਨ੍ਹਾਂ ਦੀ ਸਹਿਮਤੀ ਲੈ ਲਈ ਹੈ।