ਸਿਓਲ, 19 ਅਪ੍ਰੈਲ (ਪੋਸਟ ਬਿਊਰੋ)- ਉਤਰੀ ਕੋਰੀਆ ਨੇ ਅਮਰੀਕਾ ਨਾਲ ਐਟਮੀ ਵਾਰਤਾ ਦਾ ਦਬਾਅ ਬਣਾਉਣਾ ਸ਼ੁਰੂ ਕਰ ਦਿੱਤਾ ਹੈ। ਇਸ ਕੋਸਿ਼ਸ਼ ਵਿੱਚ ਉਸ ਨੇ ਕੱਲ੍ਹ ਪਹਿਲਾਂ ਇਕ ਨਵੇਂ ਹਥਿਆਰ ਦਾ ਤਜਰਬਾ ਕੀਤਾ ਅਤੇ ਫਿਰ ਅਮਰੀਕਾ ਦੇ ਵਿਦੇਸ਼ ਮੰਤਰੀ ਮਾਈਕ ਪੌਂਪੀਓ ਨੂੰ ਗੱਲਬਾਤ ਤੋਂ ਹਟਾਉਣ ਦੀ ਮੰਗ ਕੀਤੀ ਹੈ।
ਇਸ ਮੌਕੇ ਉਤਰੀ ਕੋਰੀਆ ਨੇ ਕਿਹਾ ਕਿ ਉਹ ਪੌਂਪੀਓ ਨਾਲ ਗੱਲਬਾਤ ਨਹੀਂ ਕਰਨਾ ਚਾਹੁੰਦਾ। ਜੇ ਉਹ ਰਹਿੰਦੇ ਹਨ ਤਾਂ ਵਾਰਤਾ ਫਿਰ ਅਸਫਲ ਹੋ ਜਾਵੇਗੀ। ਇਸ ਲਈ ਉਨ੍ਹਾਂ ਦੀ ਥਾਂ ਕਿਸੇ ਤਜਰਬੇਕਾਰ ਵਿਅਕਤੀ ਨੂੰ ਨਿਯੁਕਤ ਕੀਤਾ ਜਾਣਾ ਚਾਹੀਦਾ ਹੈ। ਇਸ ਸਾਲ ਫਰਵਰੀ 'ਚ ਵੀਅਤਨਾਮ ਦੀ ਰਾਜਧਾਨੀ ਹਨੋਈ ਵਿੱਚ ਟਰੰਪ ਅਤੇ ਕਿਮ ਵਿਚਾਲੇ ਹੋਈ ਦੂਸਰੀ ਵਾਰਤਾ ਪਿੱਛੋਂ ਉਤਰੀ ਕੋਰੀਆ ਨੇ ਇਹ ਪਹਿਲਾ ਤਜਰਬਾ ਕੀਤਾ ਹੈ। ਉਤਰੀ ਕੋਰੀਆ ਦੀ ਸਰਕਾਰੀ ਨਿਊਜ਼ ਏਜੰਸੀ ਕੇ ਸੀ ਐਨ ਏ ਅਨੁਸਾਰ ਕਿਮ ਜੋਂਗ ਉਨ ਦੀ ਨਿਗਰਾਨੀ ਵਿੱਚ ਉਤਰੀ ਕੋਰੀਆ ਨੇ ਇਕ ਨਵੇਂ ਗਾਈਡਿਡ ਹਥਿਆਰ ਦਾ ਤਜਰਬਾ ਕੀਤਾ ਹੈ। ਕੇ ਸੀ ਐਨ ਏ ਨੇ ਨਵੇਂ ਹਥਿਆਰ ਦੇ ਬਾਰੇ ਜ਼ਿਆਦਾ ਵੇਰਵਾ ਨਹੀਂ ਦਿੱਤਾ, ਪ੍ਰੰਤੂ ਕਿਹਾ ਕਿ ਰਣਨੀਤਕ ਦਿ੍ਰਸ਼ਟੀ ਤੋਂ ਇਹ ਸ਼ਕਤੀਸ਼ਾਲੀ ਹਥਿਆਰ ਹੈ। ਮੰਨਿਆ ਜਾ ਰਿਹਾ ਹੈ ਕਿ ਨਵੇਂ ਤਰ੍ਹਾਂ ਦਾ ਇਹ ਹਥਿਆਰ ਦਰਮਿਆਨੀ ਜਾਂ ਲੰਬੀ ਦੂਰੀ ਦੀ ਬੈਲਿਸਟਿਕ ਮਿਜ਼ਾਈਲ ਨਹੀਂ ਹੋ ਸਕਦੀ, ਕਿਉਂਕਿ ਇਸ ਨਾਲ ਅਮਰੀਕਾ ਨਾਲ ਮੁੜ ਵਾਰਤਾ ਸ਼ੁਰੂ ਕਰਨ ਦੇ ਯਤਨਾਂ ਨੂੰ ਝਟਕਾ ਲੱਗ ਸਕਦਾ ਹੈ। ਇਸ ਤਜਰਬੇ ਦੇ ਕੁਝ ਘੰਟੇ ਪਿੱਛੋਂ ਕੇ ਸੀ ਐਨ ਏ ਨੇ ਦੇਸ਼ ਦੇ ਵਿਦੇਸ਼ ਮੰਤਰਾਲੇ ਦੇ ਸੀਨੀਅਰ ਅਧਿਕਾਰੀ ਕਵੋਨ ਜੋਂਗ ਗਨ ਦੇ ਹਵਾਲੇ ਨਾਲ ਕਿਹਾ ਕਿ ਜੇ ਅਮਰੀਕਾ ਨੇ ਉਸ ਮੂਲ ਕਾਰਨ ਨੂੰ ਹਟਾਇਆ ਨਹੀਂ ਜਾਂਦਾ, ਜਿਸ ਨਾਲ ਉਤਰੀ ਕੋਰੀਆ ਐਟਮੀ ਹਥਿਆਰ ਵਿਕਸਿਤ ਕਰਨ ਲਈ ਮਜਬੂਰ ਹੋਵੇਗਾ ਤਾਂ ਕੋਈ ਵੀ ਵਿਅਕਤੀ ਕੋਰੀਆਈ ਖਿੱਤੇ ਦੀ ਸਥਿਤੀ ਦੇ ਬਾਰੇ ਵਿੱਚ ਅਨੁਮਾਨ ਨਹੀਂ ਲਾ ਸਕੇਗਾ।