ਲੰਡਨ, 19 ਅਪ੍ਰੈਲ (ਪੋਸਟ ਬਿਊਰੋ)- ਵਿਸ਼ਵ ਪ੍ਰੈਸ ਫਰੀਡਮ ਇੰਡੈਕਸ 'ਚ ਭਾਰਤ ਦਾ ਰੁਤਬਾ ਦੋ ਰੈਂਕ ਡਿੱਗ ਕੇ 140ਵੇਂ ਨੰਬਰ 'ਤੇ ਪਹੁੰਚ ਗਿਆ ਹੈ। ‘ਰਿਪੋਰਟਰਜ਼ ਵਿਦਆਊਟ ਬਾਰਡਰਜ਼' ਨੇ ਸਾਲਾਨਾ ਅਧਿਐਨ ਕੱਲ੍ਹ ਜਾਰੀ ਕੀਤਾ ਹੈ, ਜਿਸ ਵਿੱਚ ਸ਼ੱਕ ਜ਼ਾਹਰ ਕੀਤਾ ਗਿਆ ਹੈ ਕਿ ਭਾਰਤ ਵਿੱਚ ਆਮ ਚੋਣਾਂ ਪੱਤਰਕਾਰਾਂ ਲਈ ਖਤਰਨਾਕ ਸਮਾਂ ਹਨ।
ਮਿਲੀ ਜਾਣਕਾਰੀ ਅਨੁਸਾਰ ਵਿਸ਼ਵ ਪ੍ਰੈਸ ਫਰੀਸਮ ਇੰਡੈਕਸ 2019 ਵਿੱਚ ਨਾਰਵੇ ਨੇ 180 ਮੁਲਕਾਂ ਵਿੱਚੋਂ ਮੋਹਰੀ ਸਥਾਨ ਮੱਲ੍ਹਿਆ ਹੈ। ਦੂਜੇ ਨੰਬਰ 'ਤੇ ਫਿਨਲੈਂਡ, ਤੀਜੇ 'ਤੇ ਸਵੀਡਨ ਅਤੇ ਚੌਥੇ 'ਤੇ ਨੈਦਰਲੈਂਡਜ਼ ਆਇਆ ਹੈ।
ਸੂਚੀ 'ਚ ਪਾਕਿਸਤਾਨ 142ਵੇਂ ਅਤੇ ਬੰਗਲਾ ਦੇਸ਼ 150ਵੇਂ ਨੰਬਰ 'ਤੇ ਹੈ। ਚੀਨ ਨੂੰ 177ਵਾਂ, ਉਤਰੀ ਕੋਰੀਆ ਨੂੰ 179ਵਾਂ ਲਿਆ ਅਤੇ ਤੁਰਕਮੇਨਿਸਤਾਨ ਨੂੰ ਆਖਰੀ ਸਥਾਨ ਮਿਲਿਆ ਹੈ। ਇਸ ਅਧਿਐਨ 'ਚ ਕਿਹਾ ਗਿਆ ਹੈ ਕਿ ਦੁਨੀਆ ਭਰ 'ਚ ਪੱਤਰਕਾਰਾਂ ਖਿਲਾਫ ਹਮਲੇ ਵਧੇ ਹਨ ਅਤੇ ਭਾਰਤ 'ਚ ਪਿਛਲੇ ਸਾਲ ਛੇ ਪੱਤਰਕਾਰ ਮਾਰੇ ਗਏ ਜਦ ਕਿ ਇਕ ਕੇਸ ਬਾਰੇ ਕੁਝ ਸ਼ੱਕ ਜ਼ਾਹਰ ਕੀਤੇ ਗਏ ਹਨ। ਭਾਰਤ 'ਚ ਪੱਤਰਕਾਰ ਪੁਲਸ ਹਿੰਸਾ ਸਮੇਤ ਮਾਓਵਾਦੀਆਂ ਅਤੇ ਭਿ੍ਰਸ਼ਟ ਸਿਆਸੀ ਆਗੂਆਂ ਜਾਂ ਅਪਰਾਧਿਕ ਗੁੱਟਾਂ ਦੇ ਹਮਲੇ ਦਾ ਸ਼ਿਕਾਰ ਬਣਦੇ ਹਨ। ਪੈਰਿਸ ਵਿੱਚ ‘ਰਿਪੋਰਟਰਜ਼ ਵਿਦਆਊਟ ਬਾਰਡਰਜ਼' ਇੱਕ ਮੁਨਾਫਾ ਰਹਿਤ ਜਥੇਬੰਦੀ ਹੈ, ਜੋ ਦੁਨੀਆ ਭਰ ਵਿੱਚ ਪੱਤਰਕਾਰਾਂ 'ਤੇ ਹੁੰਦੇ ਹਮਲਿਆਂ ਨਾਲ ਨਜਿੱਠਣ ਸਬੰਧੀ ਕੰਮ ਕਰਦੀ ਹੈ। ਇਸ ਜਥੇਬੰਦੀ ਦੇ ਅਧਿਐਨ 'ਚ ਖੁਲਾਸਾ ਹੋਇਆ ਹੈ ਕਿ ਭਾਰਤ ਦੇ ਦਿਹਾਤੀ ਇਲਾਕਿਆਂ 'ਚ ਗੈਰ ਅੰਗਰੇਜ਼ੀ ਮੀਡੀਆ ਲਈ ਕੰਮ ਕਰਦੇ ਪੱਤਰਕਾਰਾਂ ਨੂੰ ਕਈ ਚੁਣੌਤੀਆਂ ਦਾ ਸਾਹਮਣਾ ਕਰਨਾ ਪੈਂਦਾ ਹੈ। ਇਸ ਵਿੱਚ ਦੋਸ਼ ਲਾਇਆ ਗਿਆ ਹੈ ਕਿ ਹੁਕਮਰਾਨ ਭਾਜਪਾ ਦੇ ਹਮਾਇਤੀਆਂ ਵੱਲੋਂ 2019 'ਚ ਆਮ ਚੋਣਾਂ ਤੋਂ ਪਹਿਲਾਂ ਪੱਤਰਕਾਰਾਂ ਖਿਲਾਫ ਹਮਲੇ ਵੱਧ ਗਏ ਹਨ। ਹਿੰਦੂਤਵ ਦੇ ਖਿਲਾਫ ਖੁੱਲ੍ਹ ਕੇ ਲਿਖਣ ਜਾਂ ਬੋਲਣ ਵਾਲੇ ਪੱਤਰਕਾਰਾਂ ਦੇ ਖਿਲਾਫ ਸੋਸ਼ਲ ਨੈਟਵਰਕਾਂ ਉਤੇ ਨਫਰਤੀ ਮੁਹਿੰਮ ਚਲਾਈ ਜਾਂਦੀ ਹੈ। ਉਸ ਵਿੱਚ ‘ਮੀ ਟੂ' ਮੁਹਿੰਮ ਦਾ ਜ਼ਿਕਰ ਵੀ ਕੀਤਾ ਗਿਆ ਹੈ, ਜਿਸ ਕਰ ਕੇ ਮਹਿਲਾ ਪੱਤਰਕਾਰਾਂ ਨਾਲ ਹੁੰਦੇ ਜਿਨਸੀ ਸ਼ੋਸ਼ਣ ਦੇ ਮਾਮਲਿਆਂ ਦਾ ਖੁਲਾਸਾ ਹੋਇਆ ਹੈ।