ਸੁਰੇਂਦਰ ਨਗਰ, 19 ਅਪ੍ਰੈਲ (ਪੋਸਟ ਬਿਊਰੋ)- ਕਾਂਗਰਸ ਨੇਤਾ ਹਾਰਦਿਕ ਪਟੇਲ ਅੱਜ ਸ਼ੁੱਕਰਵਾਰ ਗੁਜਰਾਤ ਦੇ ਸੁਰੇਂਦਰ ਨਗਰ ਦੇ ਇੱਕ ਜਲਸੇ ਵਿੱਚ ਬੋਲ ਰਹੇ ਸਨ ਤਾਂ ਤਰੁਣ ਗੱਜਰ ਨਾਂ ਦੇ ਸ਼ਖਸ ਨੇ ਉਨ੍ਹਾਂ ਨੂੰ ਸਟੇਜ ਉੱਤੇ ਥੱਪੜ ਮਾਰ ਦਿੱਤਾ। ਓਥੇ ਮੌਜੂਦ ਲੋਕਾਂ ਨੇ ਉਸ ਸ਼ਖਸ ਨੂੰ ਫੜ ਕੇ ਉਸ ਦੀ ਕੁੱਟਮਾਰ ਕਰ ਦਿੱਤੀ, ਜਿਸ ਕਾਰਨ ਉਸ ਨੂੰ ਵੀ ਹਸਪਤਾਲ ਭਰਤੀ ਕਰਾਇਆ ਗਿਆ ਅਤੇ ਅਜੇ ਤੱਕ ਉਸ ਦਾ ਇਲਾਜ ਕੀਤਾ ਜਾ ਰਿਹਾ ਹੈ।
ਹਾਰਦਿਕ ਪਟੇਲ ਨੂੰ ਥੱਪੜ ਮਾਰਨ ਵਾਲੇ ਗੱਜਰ ਨੇ ਹਸਪਤਾਲ ਵਿੱਚ ਸਫ਼ਾਈ ਦਿੱਤੀ ਕਿ ਜਦੋਂ ਪਾਟੀਦਾਰ ਅੰਦੋਲਨ ਹੋਇਆ ਸੀ, ਉਸ ਸਮੇਂ ਮੇਰੀ ਪਤਨੀ ਗਰਭਵਤੀ ਸੀ। ਉਸ ਦਾ ਹਸਪਤਾਲ ਵਿੱਚ ਇਲਾਜ ਚੱਲ ਰਿਹਾ ਸੀ। ਉਸ ਸਮੇਂ ਮੈਨੂੰ ਕਾਫੀ ਪਰੇਸ਼ਾਨੀਆਂ ਦਾ ਸਾਹਮਣਾ ਕਰਨਾ ਪਿਆ। ਮੈਂ ਓਦੋਂ ਫੈਸਲਾ ਲਿਆ ਕਿ ਮੈਂ ਇਸ ਆਦਮੀ ਨੂੰ ਮਾਰਾਂਗਾ। ਮੈਂ ਇਸ ਨੂੰ ਕਿਸੇ ਵੀ ਤਰ੍ਹਾਂ ਸਬਕ ਸਿਖਾਉਣਾ ਸੀ।` ਤਰੁਣ ਗੱਜਰ ਨੇ ਕਿਹਾ, ‘ਇਸ ਪਿੱਛੋਂ ਅਹਿਮਦਾਬਾਦ ਵਿੱਚ ਵੀ ਉਸ ਦੀ ਰੈਲੀ ਦੌਰਾਨ ਜਦੋਂ ਮੈਂ ਆਪਣੇ ਬੱਚੇ ਦੀ ਦਵਾਈ ਲੈਣ ਗਿਆ ਤਾਂ ਸਭ ਕੁਝ ਬੰਦ ਸੀ। ਉਨ੍ਹਾਂ ਨੇ ਸੜਕਾਂ ਬੰਦ ਕਰਾ ਦਿੱਤੀਆਂ ਸਨ। ਉਹ ਜੋ ਚਾਹੁੰਦੇ ਸਨ, ਗੁਜਰਾਤ ਵਿੱਚ ਬੰਦ ਕਰਵਾ ਦਿੰਦੇ ਸਨ। ਉਹ ਕੌਣ ਹੈ? ਗੁਜਰਾਤ ਦਾ ਹਿਟਲਰ?`
ਇਸ ਘਟਨਾ ਦੇ ਬਾਅਦ ਹਾਰਦਿਕ ਪਟੇਲ ਨੇ ਤਰੁਣ ਗੱਜਰ ਦੇ ਵਿਰੁੱਧ ਪੁਲਸ ਨੂੰ ਸ਼ਿਕਾਇਤ ਦਰਜ ਕਰਵਾਈ ਹੈ। ਦੱਸਿਆ ਗਿਆ ਹੈ ਕਿ ਹਾਰਦਿਕ ਨੂੰ ਥੱਪੜ ਮਾਰਨ ਵਾਲਾ ਸ਼ਖਸ ਗੁਜਰਾਤ ਦੇ ਕੜੀ ਦਾ ਵਸਨੀਕ ਹੈ। ਘਟਨਾ ਤੋਂ ਬਾਅਦ ਹਾਰਦਿਕ ਦੇ ਸਮਰਥਕਾਂ ਨੇ ਉਸ ਦੀ ਕਾਫੀ ਕੁੱਟਮਾਰ ਕੀਤੀ ਹੋਣ ਕਾਰਨ ਉਸ ਨੂੰ ਹਸਪਤਾਲ ਭਰਤੀ ਕਰਾਇਆ ਗਿਆ ਹੈ। ਹਾਰਦਿਕ ਦੇ ਸਮਰਥਕ ਇੰਨੇ ਗੁੱਸੇ ਵਿੱਚ ਸਨ ਕਿ ਉਨ੍ਹਾਂ ਨੇ ਤੁਰਣ ਦੇ ਕੱਪੜੇ ਤੱਕ ਪਾੜ ਦਿੱਤੇ, ਪਰ ਹਾਰਦਿਕ ਨੇ ਆਪਣੇ ਸਮਰਥਕਾਂ ਨੂੰ ਉਸ ਦੀ ਕੁੱਟਮਾਰ ਕਰਨ ਤੋਂ ਰੋਕਿਆ ਸੀ।