ਚੇਨਈ, 18 ਅਪ੍ਰੈਲ (ਪੋਸਟ ਬਿਊਰੋ)- ਇਨਕਮ ਟੈਕਸ ਵਿਭਾਗ ਨੇ ਤਾਮਿਲ ਨਾਡੂ ਵਿੱਚ ਕੱਲ੍ਹ ਕਿਸੇ ਥਾਂ 1.48 ਕਰੋੜ ਰੁਪਏ ਜ਼ਬਤ ਕੀਤੇ ਹਨ। ਟੀ ਟੀ ਵੀ ਦਿਨਾਕਰਣ ਦੀ ਅਗਵਾਈ ਵਾਲੀ ਅੰਮਾ ਮੱਕਲ ਮੁਨੇਤਰ ਕਝਗਮ (ਏ ਐੱਮ ਐੱਮ ਕੇ) ਪਾਰਟੀ ਦੇ ਸਮਰਥਕਾਂ ਨੇ ਲਿਫਾਫੇ ਵਿੱਚ ਇਸ ਨੂੰ ਰੱਖਿਆ ਸੀ ਅਤੇ ਇਸ ਨੂੰ ਥੇਨੀ ਜ਼ਿਲ੍ਹੇ ਵਿੱਚ ਵੋਟਰਾਂ ਨੂੰ ਵੰਡਿਆ ਜਾਣਾ ਸੀ। ਇਨਕਮ ਟੈਕਸ ਵਿਭਾਗ ਦੇ ਮਹਾਨਿਦੇਸ਼ਕ (ਜਾਂਚ) ਬੀ ਮੁਰਲੀ ਕੁਮਾਰ ਨੇ ਸਾਰੀ ਰਾਤ ਚੱਲੀ ਛਾਪੇਮਾਰੀ ਸਵੇਰੇ ਕਰੀਬ 5.30 ਵਜੇ ਖਤਮ ਹੋਣ 'ਤੇ ਦੱਸਿਆ ਕਿ ਬੇਹਿਸਾਬੀ 1.48 ਕਰੋੜ ਰੁਪਏ ਫੜੇ ਹਨ। ਇਹ 94 ਲਿਫਾਫਿਆਂ ਵਿੱਚ ਰੱਖੇ ਗਏ ਸਨ, ਜਿਨ੍ਹਾਂ 'ਤੇ ਵਾਰਡ ਨੰਬਰ, ਵੋਟਰਾਂ ਦੀ ਗਿਣਤੀ ਲਿਖੀ ਹੋਈ ਸੀ ਅਤੇ ਪ੍ਰਤੀ ਵੋਟਰ 300 ਰੁਪਏ ਰਾਸ਼ੀ ਦਾ ਜ਼ਿਕਰ ਕੀਤਾ ਗਿਆ ਸੀ, ਜਿਸ ਤੋਂ ਸਾਰਾ ਕੁਝ ਸਾਫ ਹੈ।
ਮੁਰਲੀ ਕੁਮਾਰ ਨੇ ਦੱਸਿਆ ਕਿ ਇਹ ਕੰਪਲੈਕਸ ਏ ਐੱਮ ਐੱਮ ਕੇ ਦੇ ਆਗੂ ਦਾ ਹੈ ਅਤੇ ਇਸ ਕੰਪਲੈਕਸ ਦੇ ਅੰਡਰਗਰਾਊਂਡ ਵਿੱਚ ਪਾਰਟੀ ਦਾ ਦਫਤਰ ਹੈ। ਉੱਚ ਅਧਿਕਾਰੀ ਨੇ ਦੱਸਿਆ ਕਿ ਕੇਂਦਰੀ ਟੈਕਸ ਬੋਰਡ ਤੇ ਚੋਣ ਕਮਿਸ਼ਨ ਨੂੰ ਇਸ ਬਾਰੇ ਰਿਪੋਰਟ ਭੇਜੀ ਜਾਏਗੀ। ਇਨਕਮ ਟੈਕਸ ਵਿਭਾਗ ਨੇ ਸ਼ੱਕੀ ਰੁਪਏ ਛੁਪਾਏ ਜਾਣ ਦੀ ਖੁਫੀਆ ਜਾਣਕਾਰੀ ਮਿਲਣ ਦੇ ਬਾਅਦ ਮੰਗਲਵਾਰ ਰਾਤ ਛਾਪੇਮਾਰੀ ਕੀਤੀ ਸੀ। ਇਸ ਦੌਰਾਨ ਕਾਰਵਾਈ ਦਾ ਵਿਰੋਧ ਕਰ ਰਹੇ ਏ ਐੱਮ ਐੱਮ ਕੇ ਦੇ ਵਰਕਰਾਂ ਨੂੰ ਖੇਰੂੰ-ਖੇਰੂੰ ਕਰਨ ਦੇ ਲਈ ਪੁਲਸ ਨੂੰ ਹਵਾ ਵਿੱਚ ਗੋਲੀਆਂ ਵੀ ਚਲਾਉਣੀਆਂ ਪਈਆਂ। ਇਨਕਮ ਟੈਕਸ ਅਧਿਕਾਰੀ ਨੇ ਕਿਹਾ ਕਿ ਕੰਪਲੈਕਸ ਵਿੱਚ ਮੌਜੂਦ ਆਦਮੀ ਦਾ ਬਿਆਨ ਦਰਜ ਕਰ ਲਿਆ ਹੈ। ਉਸ ਨੇ ਦੱਸਿਆ ਕਿ ਇਥੇ ਦੋ ਕਰੋੜ ਰੁਪਏ ਅਦਿੰਪੱਤ ਪੰਚਾਇਤ ਸੰਘ ਇਲਾਕੇ ਵਿੱਚ ਵੋਟਰਾਂ ਨੂੰ ਵੰਡਣ ਲਈ ਲਿਆਂਦੇ ਸਨ।
ਓਧਰ ਕਾਂਗਰਸ ਨੇਤਾ ਤੇ ਸਾਬਕਾ ਕੇਂਦਰੀ ਮੰਤਰੀ ਪੀ ਚਿਦੰਬਰਮ ਨੇ ਤਾਮਿਲ ਨਾਡੂ ਦੇ ਥੁਥੁਕੁਡੀ ਲੋਕ ਸਭਾ ਸੀਟ ਤੋਂ ਦ੍ਰਵਿੜ ਮੁਨੇਤਰ ਕਝਗਮ (ਡੀ ਐਮ ਕੇ) ਉਮੀਦਵਾਰ ਐੱਮ ਕੇ ਕਨੀਮੋਈ ਦੇ ਘਰ ਅਤੇ ਦਫਤਰ ਵਿੱਚ ਇਨਕਮ ਟੈਕਸ ਵਿਭਾਗ ਦੀ ਛਾਪੇਮਾਰੀ ਨੂੰ ਪੱਖਪਾਤੀ ਕਾਰਵਾਈ ਕਿਹਾ ਹੈ। ਚਿਦੰਬਰਮ ਨੇ ਕੱਲ੍ਹ ਟਵੀਟ ਕੀਤਾ, ਖਬਰ ਇਹ ਹੈ ਕਿ ਉਨ੍ਹਾਂ ਦੇ (ਕਨੀਮੋਈ) ਨਿਵਾਸ ਉਤੇ ਛਾਪੇਮਾਰੀ ਦੌਰਾਨ ਕੁਝ ਵੀ ਨਹੀਂ ਮਿਲਿਆ। ਉਨ੍ਹਾਂ ਨੇ ਇਨਕਮ ਟੈਕਸ ਅਧਿਕਾਰੀਆਂ 'ਤੇ ਪੱਖਪਾਖੀ ਰੁਖ ਅਪਣਾਉਣ ਦਾ ਦੋਸ਼ ਲਾਉਂਦੇ ਹੋਏ ਕਿਹਾ ਕਿ ਇਹ ਕਿਵੇਂ ਸੰਭਵ ਹੈ ਕਿ ਕੇਵਲ ਵਿਰੋਧੀ ਧਿਰ ਦੇ ਨੇਤਾਵਾਂ ਨੂੰ ਲੈ ਕੇ (ਇਨਕਮ ਟੈਕਸ ਅਧਿਕਾਰੀ) ਖੁਫੀਆ ਸੂਚਨਾ ਹਾਸਲ ਕਰ ਰਹੇ ਹਨ।