ਐਸ ਏ ਐਸ ਨਗਰ, 18 ਅਪ੍ਰੈਲ (ਪੋਸਟ ਬਿਊਰੋ)- ਇਸ ਨਗਰ ਦੇ ਮੰਨੇ ਪ੍ਰਮੰਨੇ ਸੁਨਿਆਰੇ ਅਨਮੋਲ ਰਤਨ ਜਿਊਲਰਜ਼ ਨਾਲ 22 ਕਰੋੜ 80 ਲੱਖ ਦੀ ਠੱਗੀ ਦਾ ਕੇਸ ਸਾਹਮਣੇ ਆਇਆ ਹੈ। ਇਸ ਸੰਬੰਧ ਵਿੱਚ ਪੰਚਕੂਲਾ ਦੇ ਮਿੱਤਲ ਪਰਵਾਰ 'ਤੇ ਮੋਹਾਲੀ ਵਿੱਚ ਠੱਗੀ ਦਾ ਮਾਮਲਾ ਦਰਜ ਹੋਇਆ ਹੈ।
ਪਤਾ ਲੱਗਾ ਹੈ ਕਿ ਮਿੱਤਲ ਪਰਵਾਰ ਉੱਤੇ ਫੇਜ਼-5 ਦੇ ਅਨਮੋਲ ਰਤਨ ਜਿਊਲਰਜ਼ ਦੇ ਮਾਲਕ ਵਿਕਾਸ ਵਾਲੀਆ ਨੂੰ ਵਿਦੇਸ਼ੀ ਹੀਰੇ ਮੰਗਵਾ ਕੇ 25 ਫੀਸਦੀ ਸਸਤਾ ਦੇਣ ਦੇ ਨਾਮ ਉਤੇ 22 ਕਰੋੜ 80 ਲੱਖ ਰੁਪਏ ਦੀ ਧੋਖਾਧੜੀ ਕਰਨ ਦਾ ਦੋਸ਼ ਹੈ। ਵਿਕਾਸ ਵਾਲੀਆ ਨੇ ਐਸ ਐਸ ਪੀ ਨੂੰ ਇਸ ਬਾਰੇ ਸ਼ਿਕਾਇਤ ਦਿੱਤੀ ਸੀ, ਜਿਸ ਦੀ ਜਾਂਚ ਐਸ ਪੀ ਸਿਟੀ ਕਰ ਰਹੇ ਸਨ। ਇਸ ਜਾਂਚ ਮਗਰੋਂ ਪੁਲਸ ਨੇ ਮਿੱਤਲ ਪਰਵਾਰ ਉਤੇ ਫੇਜ਼ ਇਕ ਥਾਣੇ ਵਿੱਚ ਅਸ਼ੋਕ ਮਿੱਤਲ, ਚੇਤਨਾ ਮਿੱਤਲ, ਅਦਿਤੀ ਮਿੱਤਲ, ਅਰਪਿਤ ਮਿੱਤਲ, ਰਾਜ ਰਾਣੀ ਮਿੱਤਲ, ਵਿਨੋਦ ਮਿੱਤਲ ਅਤੇ ਕੁਝ ਅਣਪਛਾਤੇ ਲੋਕਾਂ ਖਿਲਾਫ ਮਾਮਲਾ ਦਰਜ ਕਰ ਲਿਆ ਹੈ। ਵਿਕਾਸ ਵਾਲੀਆ ਨੇ ਦੱਸਿਆ ਕਿ ਉਹ ਪਿਛਲੇ 30 ਸਾਲਾਂ ਤੋਂ ਮੋਹਾਲੀ, ਦਿੱਲੀ, ਮੁੰਬਈ ਤੇ ਸੂਰਤ ਵਿੱਚ ਸੋਨੇ ਅਤੇ ਹੀਰਿਆਂ ਦਾ ਧੰਦਾ ਕਰਦੇ ਆਏ ਹਨ। ਇਕ ਪਾਰਟੀ ਦੌਰਾਨ ਅਸ਼ੋਕ ਮਿੱਤਲ ਨਾਲ ਉਨ੍ਹਾਂ ਦੇ ਦੋਸਤ ਨੇ ਜਾਣ ਪਛਾਣ ਕਰਵਾਈ ਸੀ। ਉਸ ਸਮੇਂ ਅਸ਼ੋਕ ਮਿੱਤਲ ਦੀਆਂ ਮਨੀਮਾਜਰਾ ਵਿੱਚ ਟਰਿਪਲ-8 ਟਰੇਡਿੰਗ ਅਤੇ ਤਮੰਨਾ ਟਰੇਡਿੰਗ ਦੇ ਨਾਂ ਦੀਆਂ ਡਾਇਮੰਡ ਕੰਪਨੀਆਂ ਸਨ ਤੇ ਉਹ ਵਿਦੇਸ਼ ਤੋਂ ਹੀਰੇ ਮੰਗਵਾਉਂਦੇ ਸਨ। ਉਨ੍ਹਾਂ ਨੇ ਉਨ੍ਹਾਂ ਨੂੰ ਹੀਰੇ 25 ਤੋਂ 30 ਫੀਸਦੀ ਸਸਤੇ ਦੇਣ ਦੀ ਗੱਲ ਕੀਤੀ ਸੀ। ਇਸ ਦੇ ਬਦਲੇ ਉਨ੍ਹਾਂ ਤੋਂ ਪਹਿਲਾਂ ਚਾਰ ਕਰੋੜ 37 ਲੱਖ ਰੁਪਏ ਨਗਦ ਲਏ, ਪਰ ਬਾਅਦ ਵਿੱਚ ਉਨ੍ਹਾਂ ਨੇ 9 ਕਰੋੜ 45 ਲੱਖ ਰੁਪਏ ਦੀ ਅਗਲੀ ਅਦਾਇਗੀ ਬੈਂਕ ਰਾਹੀਂ ਲਈ। ਦੋਸ਼ੀ ਨੇ ਆਪਣੇ ਅਤੇ ਆਪਣੇ ਪਰਵਾਰ ਦੇ ਖਾਤੇ ਵਿੱਚ ਪੈਸੇ ਟਰਾਂਸਫਰ ਕਰਵਾਏ। ਵਾਲੀਆ ਨੇ ਦੱਸਿਆ ਕਿ ਉਹ ਲਾਲਚ ਵਿੱਚ ਆ ਗਿਆ ਸੀ ਕਿ ਉਸ ਨੂੰ ਵਿਦੇਸ਼ੀ ਹੀਰੇ ਘੱਟ ਮੁੱਲ 'ਤੇ ਮਿਲ ਰਹੇ ਹਨ, ਪਰ ਨਾ ਹੀਰੇ ਮਿਲੇ ਤੇ ਨਾ ਪੈਸੇ ਵਾਪਸ ਮਿਲੇ।