ਵਾਸ਼ਿੰਗਟਨ, 18 ਅਪ੍ਰੈਲ (ਪੋਸਟ ਬਿਊਰੋ)- ਅਮਰੀਕਾ ਦਾ ਬਹੁ-ਉਦੇਸ਼ੀ ਲੜਾਕੂ ਜਹਾਜ਼ ਐੱਫ-21 ਭਾਰਤੀ ਰੱਖਿਆ ਲੋੜਾਂ ਨੂੰ ਪੂਰਾ ਕਰਨ ਵਿੱਚ ਮਹੱਤਵ ਪੂਰਨ ਭੂਮਿਕਾ ਨਿਭਾਵੇਗਾ। ਉਸ ਨੂੰ ਖਾਸ ਤੌਰ 'ਤੇ ਭਾਰਤ ਦੀਆਂ ਲੋੜਾਂ ਨੂੰ ਧਿਆਨ ਵਿੱਚ ਰੱਖ ਕੇ ਵਿਕਸਿਤ ਕੀਤਾ ਗਿਆ ਹੈ। ਇਹ ਚੌਥੀ ਪੀੜ੍ਹੀ ਦੇ ਲੜਾਕੂ ਜਹਾਜ਼ਾਂ ਵਿੱਚ ਵੀ ਕੁਝ ਖਾਸ ਗੁਣਾਂ ਵਾਲਾ ਹੈ। ਇਸ ਦਾ ਰਡਾਰ ਸਿਸਟਮ ਅਤੇ ਵਾਰਫੇਅਰ ਸਿਸਟਮ ਦੁਸ਼ਮਣ ਨੂੰ ਘੇਰ ਕੇ ਕਾਰਵਾਈ ਕਰਨ ਦੇ ਸਮਰੱਥ ਹੈ।
ਇਹ ਗੱਲ ਅਮਰੀਕਾ ਦੀ ਰੱਖਿਆ ਖੇਤਰ ਦੀ ਕੰਪਨੀ ਲਾਕਹੀਡ ਮਾਰਟਿਨ ਨੇ ਕਹੀ ਹੈ। ਬੰਗਲੌਰ ਵਿੱਚ ਫਰਵਰੀ ਵਿੱਚ ਹੋਏ ਏਰੋ ਇੰਡੀਆ ਸ਼ੋਅ ਵਿੱਚ ਐੱਫ-21 ਨੂੰ ਪੇਸ਼ ਕਰਨ ਵਾਲੀ ਲਾਕਹੀਡ ਮਾਰਟਿਨ ਭਾਰਤੀ ਕੰਪਨੀ ਟਾਟਾ ਐਡਵਾਂਸਡ ਸਿਸਟਮਜ਼ ਨਾਲ ਮਿਲ ਕੇ ਭਾਰਤ ਵਿੱਚ ਇਸ ਦਾ ਉਤਪਾਦਨ ਕਰਨ ਵਾਸਤੇ ਤਿਆਰ ਹੈ। ਉਸ ਨੇ ਪਹਿਲਾਂ ਐੱਫ-16 ਜਹਾਜ਼ ਦੇ ਭਾਰਤ ਵਿੱਚ ਸਪਲਾਈ ਅਤੇ ਵਿਕਰੀ ਦੀ ਤਜਵੀਜ਼ ਰੱਖੀ ਸੀ, ਪਰ ਸਿਰੇ ਨਹੀਂ ਸੀ ਚੜ੍ਹ ਸਕੀ। ਲਾਕਹੀਡ ਦੇ ਰਣਨੀਤਕ ਤੇ ਵਪਾਰ ਮਾਮਲਿਆਂ ਦੇ ਉਪ ਪ੍ਰਧਾਨ ਵਿਵੇਕ ਲਾਲ ਨੇ ਦੱਸਿਆ ਕਿ ਐੱਫ-21 ਨੂੰ ਇਸ ਤਰ੍ਹਾਂ ਤਿਆਰ ਕੀਤਾ ਗਿਆ ਹੈ ਕਿ ਉਹ ਭਾਰਤੀ ਹਵਾਈ ਫੌਜ ਨੂੰ ਰਣਨੀਤਕ ਰੂਪ ਤੋਂ ਨਵੀਂ ਤਾਕਤ ਦੇ ਸਕੇ। ਇਹ ਘੱਟ ਤੇਲ ਨਾਲ ਵੱਧ ਦੂਰੀ ਤੱਕ ਅਤੇ ਵੱਧ ਤਾਕਤ ਦੇਣ ਵਾਲਾ ਅਤੇ ਨੈੱਟਵਰਕ ਲਿੰਕਿੰਗ ਦੇ ਮਾਮਲੇ ਵਿੱਚ ਖਾਸ ਜਹਾਜ਼ ਹੈ।
ਐੱਫ-21 ਦੇ ਐੱਫ-16 ਦਾ ਰੀ-ਬ੍ਰਾਂਡ ਹੋਣ ਦਾ ਦਾਅਵਾ ਰੱਦ ਕਰਦੇ ਹੋਏ ਲਾਲ ਨੇ ਕਿਹਾ, ਦੋਵਾਂ ਜਹਾਜ਼ਾਂ ਦੀ ਬਾਹਰੀ ਸ਼ਕਲ ਇੱਕੋ ਜਿਹੀ ਲੱਗ ਸਕਦੀ ਹੈ, ਪਰ ਦੋਵਾਂ ਵਿੱਚ ਵੱਡਾ ਫਰਕ ਹੈ। ਇਸ ਦਾ ਰਡਾਰ ਐੱਫ-16 ਦੀ ਤੁਲਨਾ ਵਿੱਚ ਦੋ ਗੁਣਾ ਵੱਧ ਯੋਗਤਾ ਵਾਲਾ ਹੈ ਅਤੇ ਟੀਚੇ 'ਤੇ ਵੱਧ ਹਮਲਾ ਕਰ ਸਕੇਗਾ। ਇਸ ਵਿੱਚ ਐਡਵਾਂਸਡ ਇਲੈਕਟ੍ਰਾਨਿਕ ਵਾਰਫੇਅਰ ਸਿਸਟਮ ਲੱਗਾ ਹੈ, ਜਿਸ ਨੂੰ ਖਾਸ ਤੌਰ 'ਤੇ ਭਾਰਤ ਦੀਆਂ ਜ਼ਰੂਰਤਾਂ ਦੇ ਮੁਤਾਬਕ ਤਿਆਰ ਕੀਤਾ ਗਿਆ ਹੈ।