ਚੰਡੀਗੜ੍ਹ, 17 ਅਪ੍ਰੈਲ (ਪੋਸਟ ਬਿਊਰੋ)- ਇੱਕ ਕਸਟਮਰ ਕੋਲੋਂ ਕੈਰੀ ਬੈਗ ਦੇ ਸਿਰਫ ਤਿੰਨ ਰੁਪਏ ਵਸੂਲ ਕਰਨਾ ਬਾਟਾ ਸ਼ੂ ਸਟੋਰ ਨੂੰ ਮਹਿੰਗਾ ਪੈ ਗਿਆ। ਜਿ਼ਲਾ ਕੰਜ਼ਿਊਮਰ ਫੋਰਮ ਨੇ ਦਿਨੇਸ਼ ਪ੍ਰਸਾਦ ਰਤੂੜੀ ਦੀ ਸ਼ਿਕਾਇਤ ਉੱਤੇ ਬਾਟਾ ਸਟੋਰ ਸੈਕਟਰ-22 'ਤੇ ਤਿੰਨ ਹਜ਼ਾਰ ਰੁਪਏ ਜੁਰਮਾਨਾ ਲਾਇਆ ਹੈ।
ਅਸਲ ਵਿੱਚ ਬਾਟਾ ਸਟੋਰ ਨੇ ਦਿਨੇਸ਼ ਪ੍ਰਸਾਦ ਰਤੂੜੀ ਤੋਂ ਕੈਰੀ ਬੈਗ ਦੇ ਤਿੰਨ ਰੁਪਏ ਵੱਖਰੇ ਚਾਰਜ ਕਰ ਲਏ ਸਨ। ਰਤੂੜੀ ਨੇ ਜਦ ਕੈਰੀ ਬੈਗ ਦੇ ਤਿੰਨ ਰੁਪਏ ਵਾਪਸ ਮੰਗੇ ਤਾਂ ਉਨ੍ਹਾਂ ਨੇ ਇਨਕਾਰ ਕਰ ਦਿੱਤਾ। ਇਸ ਉਤੇ ਰਤੂੜੀ ਨੇ ਬਾਟਾ ਸਟੋਰ ਦੇ ਖਿਲਾਫ ਕੰਜ਼ਿਊਮਰ ਫੋਰਮ ਵਿੱਚ ਸ਼ਿਕਾਇਤ ਕਰ ਦਿੱਤੀ। ਉਸ ਦਾ ਕਹਿਣਾ ਹੈ ਕਿ ਉਸ ਨੇ ਪੰਜ ਫਰਵਰੀ ਨੂੰ ਚੰਡੀਗੜ੍ਹ ਦੇ ਸੈਕਟਰ 22-ਡੀ ਵਿੱਚ ਬਾਟਾ ਸਟੋਰ ਤੋਂ ਬੂਟ ਖਰੀਦੇ ਸਨ ਅਤੇ ਸਟੋਰ ਨੇ ਉਨ੍ਹਾਂ ਨੂੰ 402 ਰੁਪਏ ਦਾ ਬਿਲ ਦਿੱਤਾ, ਜਿਸ ਵਿੱਚ ਪੇਪਰ ਕੈਰੀ ਬੈਗ ਦੇ ਤਿੰਨ ਰੁਪਏ ਦਾ ਬਿਲ ਸ਼ਾਮਲ ਸੀ। ਪੇਪਰ ਬੈਗ ਉੱਤੇ ਬਾਟਾ ਆਪਣੇ ਬ੍ਰਾਂਡ ਦਾ ਪ੍ਰਚਾਰ ਕਰ ਰਿਹਾ ਸੀ। ਦਿਨੇਸ਼ ਨੇ ਕੰਜ਼ਿਊਮਰ ਫੋਰਮ ਨੂੰ ਸ਼ਿਕਾਇਤ ਕੀਤੀ। ਫੋਰਮ ਨੇ ਕਿਹਾ ਕਿ ਬਾਟਾ ਇੰਡੀਆ ਜੇ ਖੁਦ ਨੂੰ ਵਾਤਾਵਰਣ ਐਕਟੀਵਿਸਟ ਸਮਝਦਾ ਹੈ ਤਾਂ ਇਹ ਬੈਗ ਉਸ ਨੂੰ ਆਪਣੇ ਗ੍ਰਾਹਕਾਂ ਨੂੰ ਮੁਫਤ ਦੇਣਾ ਚਾਹੀਦਾ ਹੈ। ਫੋਰਮ ਨੇ ਇਹ ਵੀ ਕਿਹਾ ਕਿ ਗਲਤ ਢੰਗ ਲਏ ਤਿੰਨ ਰੁਪਏ ਗ੍ਰਾਹਕ ਨੂੰ ਵਾਪਸ ਕੀਤੇ ਜਾਣ ਅਤੇ ਇਸ ਦੇ ਨਾਲ ਫੋਰਮ ਨੇ ਬਾਟਾ ਨੂੰ ਤਿੰਨ ਹਜ਼ਾਰ ਰੁਪਏ ਹਰਜਾਨਾ ਦੇਣ ਨੂੰ ਕਿਹਾ ਹੈ। ਫੋਰਮ ਨੇ ਇੱਕ ਹਜ਼ਾਰ ਰੁਪਏ ਮੁਕੱਦਮਾ ਖਰਚ ਵੀ ਦੇਣ ਨੂੰ ਕਿਹਾ ਹੈ। ਫੋਰਮ ਨੇ ਬਾਟਾ ਇੰਡੀਆ ਨੂੰ 5000 ਰੁਪਏ ਖਪਤਕਾਰ ਕਾਨੂੰਨੀ ਸਹਾਇਤਾ ਖਾਤਾ ਵਿੱਚ ਵੀ ਦੇਣ ਨੂੰ ਕਿਹਾ ਹੈ।