ਬਰੈਂਪਟਨ, (ਹਰਚੰਦ ਸਿੰਘ ਬਾਸੀ)- ਬਰੈਂਪਟਨ ਦੇ ਵਾਰਡ 10 ਵਿੱਚ ਬਰੇਡਨ ਸੀਨੀਅਰਜ਼ ਕਲੱਬ ਦੀ ਕਾਰਜਕਾਰਨੀ ਅਤੇ ਮੈਂਬਰ ਸਾਹਿਬਾਨਾਂ ਦੀ ਬੀਤੇ ਸਨਿਚਰਵਾਰ ਨੂੰ ਚਿੰਕੂਜ਼ੀ ਪਾਰਕ ਵਿੱਚ ਲੰਚ ਮੌਕੇ ਪਰਿਵਾਰਕ ਇਕੱਤਰਤਾ ਹੋਈ। ਉਸ ਮੌਕੇ `ਤੇ ਵਾਰਡ 9-10 ਤੋਂ ਸਕੂਲ ਟਰੱਸਟੀ ਉਮੀਦਵਾਰ ਸਤਪਾਲ ਸਿੰਘ ਜੌਹਲ ਨੂੰ ਪਹੁੰਚਣ ਲਈ ਵਿਸ਼ੇਸ਼ ਸੱਦਾ ਦਿੱਤਾ ਗਿਆ ਸੀ। ਕਲੱਬ ਦੇ ਇਕੱਠ ਨੂੰ ਸੰਬੋਧਨ ਕਰਦਿਆਂ ਪ੍ਰਧਾਨ ਮਨਮੋਹਣ ਸਿੰਘ ਨੇ ਕਿਹਾ ਕਿ ਸਤਪਾਲ ਸਿੰਘ ਜੌਹਲ ਸਕੂਲਾਂ ਨਾਲ ਜੁੜੀਆਂ ਸਮੱਸਿਆਵਾਂ ਤੋਂ ਜਾਣੂੰ ਹਨ ਅਤੇ ਕਮਿਊਨਿਟੀ ਦੀਆਂ ਲੋੜਾਂ ਦੀ ਸਮਝ ਰੱਖਦੇ ਹਨ ਜਿਸ ਕਰਕੇ ਉਹ ਬਹੁਤ ਵਧੀਆ ਸਕੂਲ ਟਰੱਸਟੀ ਸਾਬਿਤ ਹੋ ਸਕਦੇ ਹਨ। ਕਲੱਬ ਦੇ ਸੀਨੀਅਰ ਆਗੂ ਤਾਰਾ ਸਿੰਘ ਗਰਚਾ ਨੇ ਆਖਿਆ ਕਿ ਕਮਿਊਨਿਟੀ ਨੂੰ ਸਮ੍ਰੱਪਿਤ ਅਤੇ ਮਿਹਨਤੀ ਸਕੂਲ ਟਰੱਸਟੀ ਦੀ ਲੋੜ ਹੈ ਅਤੇ ਅਜਿਹੇ ਕਈ ਗੁਣਾਂ ਉਪਰ ਸਤਪਾਲ ਸਿੰਘ ਜੌਹਲ ਲੰਬੇ ਸਮੇਂ ਤੋਂ ਖਰੇ ਉਤਰ ਰਹੇ ਹਨ। ਉਪਰੰਤ ਸਤਪਾਲ ਜੌਹਲ ਨੇ ਸੰਬੋਧਨ ਕਰਦਿਆਂ ਦੱਸਿਆ ਕਿ ਸਕੂਲ ਟਰੱਸਟੀ ਦੀ ਚੋਣ ਭਾਵੇਂ ਛੋਟੀ ਹੈ ਪਰ ਇਸ ਦੀ ਅਹਿਮੀਅਤ ਬਹੁਤ ਵੱਡੀ ਸਮਝੀ ਜਾਣੀ ਚਾਹੀਦੀ ਹੈ ਕਿਉਂਕਿ ਬੱਚਿਆ ਦਾ ਭਵਿੱਖ ਸਕੂਲ ਤੋਂ ਆਰੰਭ ਹੁੰਦਾ ਹੈ। ਉਨ੍ਹਾਂ ਆਖਿਆ ਕਿ ਡੋਰ-ਟੂ-ਡੋਰ ਕੰਪੇਨ ਦੌਰਾਨ ਕਮਿਊਨਿਟੀ ਮੈਂਬਰਾਂ ਦੇ ਵਿਚਾਰਾਂ ਨੂੰ ਸੰਜੀਦਗੀ ਨਾਲ ਸੁਣਿਆ ਹੈ ਅਤੇ ਸਾਰੇ ਸੁਝਾਵਾਂ ਨੂੰ ਗੰਭੀਰਤਾ ਨਾਲ਼ ਨੋਟ ਕਰ ਲਿਆ ਗਿਆ ਹੈ। ਸਾਰੇ ਪਰਿਵਾਰਾਂ ਨੇ ਇਕੱਠੇ ਹੋ ਕੇ ਲੰਚ ਦਾ ਆਨੰਦ ਮਾਣਿਆ ਅਤੇ ਉਘੇ ਕਵੀ ਹਰਚੰਦ ਸਿੰਘ ਬਾਸੀ ਨੇ ਆਪਣੇ ਵਿਚਾਰਾਂ ਤੇ ਰਚਨਾਵਾਂ ਨਾਲ ਮਾਹੌਲ ਨੂੰ ਰੌਚਕ ਕੀਤਾ। ਇਸ ਮੌਕੇ ਤੇ ਬਲਬੀਰ ਸਿੰਘ, ਗੁਰਦੇਵ ਸਿੱਧੂ, ਪੁਸ਼ਪ ਕੁਮਾਰ ਜੈਨ ਅਤੇ ਗੁਰਦੇਵ ਸਿੰਘ ਭੱਠਲ਼ ਆਦਿ ਸਮੇਤ ਅਨੇਕਾਂ ਮੈਂਬਰ ਵੀ ਹਾਜ਼ਿਰ ਸਨ।