ਨਿਊਯਾਰਕ, 17 ਅਪ੍ਰੈਲ (ਪੋਸਟ ਬਿਊਰੋ)- ਇੱਕ ਪੰਛੀ ਨੂੰ ਇੰਨਾ ਗੁੱਸਾ ਆਇਆ ਕਿ ਉਸ ਨੇ ਆਪਣੇ ਮਾਲਕ ਨੂੰ ਜਾਨੋਂ ਮਾਰ ਦਿੱਤਾ। ਤੁਸੀਂ ਸੋਚੋਗੇ ਕਿ ਭਲਾ ਇਹ ਕਿਹੜਾ ਪੰਛੀ ਹੈ, ਜਿਸ ਨੇ ਆਪਣੇ ਮਾਲਕ ਨੂੰ ਮਾਰ ਦਿੱਤਾ।
ਅਸਲ ਵਿੱਚ ਇਸ ਪੰਛੀ ਦਾ ਨਾਂਅ ਕੈਸੋਵਰੀ ਹੈ। ਇਹ ਪੰਛੀ ਉਡ ਤਾਂ ਨਹੀਂ ਸਕਦਾ, ਪਰ ਦੌੜਦਾ ਬਹੁਤ ਤੇਜ਼ ਹੈ। ਕੈਸੋਵਰੀ ਨੂੰ ਦੁਨੀਆ ਦਾ ਸਭ ਤੋਂ ਖਤਰਨਾਕ ਪੰਛੀ ਕਿਹਾ ਜਾਂਦਾ ਹੈ, ਜਿਹੜਾ ਆਸਟਰੇਲੀਆ ਅਤੇ ਪਾਪੁਆ ਨਿਊ ਗਿਨੀ ਦੇ ਜੰਗਲਾਂ ਵਿੱਚ ਪਾਇਆ ਜਾਂਦਾ ਹੈ। ਫਲੋਰੀਡਾ ਦੇ ਅਲਾਚੂਆ ਕਾਊਂਟੀ ਵਿੱਚ ਫਾਇਰ ਰੈਸਕਿਊ ਡਿਪਾਰਟਮੈਂਟ ਦੇ ਹੈਡ ਗੇਨੇਸਿਵਲੇ ਨੇ ਸਨ ਅਖਬਾਰ ਨੂੰ ਇਹ ਜਾਣਕਾਰੀ ਦਿੱਤੀ ਹੈ। ਉਨ੍ਹਾਂ ਮੁਤਾਬਕ ਇਹ ਘਟਨਾ ਉਦੋਂ ਹੋਈ, ਜਦੋਂ ਕੈਸੋਵਰੀ ਦਾ ਮਾਲਕ (ਜਿਸ ਦਾ ਨਾਂਅ ਜ਼ਾਹਰ ਨਹੀਂ ਕੀਤਾ ਗਿਆ) ਪੰਛੀ ਨੂੰ ਬ੍ਰੀਡਿੰਗ ਲਈ ਲਿਜਾ ਰਿਹਾ ਸੀ। ਦੇਖ ਰੇਖ ਕਰਨ ਵਾਲਾ ਵਿਅਕਤੀ ਪੰਛੀਆਂ ਦੇ ਵਾੜੇ ਵਿੱਚ ਸੀ। ਕਿਸੇ ਕਾਰਨ ਉਸ ਦਾ ਸੰਤੁਲਨ ਵਿਗੜ ਗਿਆ ਤੇ ਉਹ ਡਿੱਗ ਗਿਆ। ਇਸ ਮੌਕੇ ਕੈਸੋਵਰੀ ਨੇ ਉਸ 'ਤੇ ਹਮਲਾ ਕਰ ਦਿੱਤਾ ਅਤੇ ਆਪਣੇ ਪੰਜੇ ਨਾਲ ਆਪਣੇ ਮਾਲਕ ਦਾ ਪੇਟ ਚੀਰ ਦਿੱਤਾ। ਵਰਨਣ ਯੋਗ ਹੈ ਕਿ ਕੈਸੋਵਰੀ ਦੀ ਦੌੜਨ ਦੀ ਰਫਤਾਰ 38 ਕਿਲੋਮੀਟਰ ਪ੍ਰਤੀ ਘੰਟਾ ਹੈ। ਕੈਸੋਵਰੀ ਦਾ ਕੱਟ 1.8 ਮੀਟਰ ਤੱਕ ਅਤੇ ਭਾਰ ਲਗਭਗ ਅੱਸੀ ਕਿਲੋ ਜਾਂ ਉਸ ਤੋਂ ਵੀ ਜ਼ਿਆਦਾ ਹੋ ਸਕਦਾ ਹੈ।