ਓਨਟਾਰੀਓ, 14 ਅਪਰੈਲ (ਪੋਸਟ ਬਿਊਰੋ) : ਓਨਟਾਰੀਓ ਦੇ ਇਮੀਗ੍ਰੇਸ਼ਨ ਨੌਮਿਨੀ ਪ੍ਰੋਗਰਾਮ ਵਿੱਚ ਟਰੱਕਿੰਗ ਇੰਡਸਟਰੀ ਨੂੰ ਸ਼ਾਮਲ ਕੀਤੇ ਜਾਣ ਦਾ ਓਨਟਾਰੀਓ ਟਰੱਕਿੰਗ ਐਸੋਸਿਏਸ਼ਨ (ਓਟੀਏ) ਵੱਲੋਂ ਸਵਾਗਤ ਕੀਤਾ ਗਿਆ ਹੈ। ਓਟੀਏ ਵੱਲੋਂ ਇਸ ਲਈ ਫੋਰਡ ਸਰਕਾਰ ਦੀ ਸਰਾਹਨਾ ਕੀਤੀ ਗਈ। ਫੋਰਡ ਸਰਕਾਰ ਵੱਲੋਂ ਇਸ ਨੂੰ ਡਿਮਾਂਡ ਵਾਲੀ ਸਕਿੱਲ ਸਟਰੀਮ ਦਾ ਦਰਜਾ ਦਿੱਤਾ ਗਿਆ ਹੈ।
2019 ਵਿੱਚ ਫੋਰਡ ਸਰਕਾਰ ਦੇ ਬਜਟ ਵਿੱਚ ਆਖਿਆ ਗਿਆ ਕਿ ਇੰਪਲਾਇਰ ਤੇ ਲੇਬਰ ਮਾਰਕਿਟ ਦੀਆਂ ਲੋੜਾਂ ਨੂੰ ਦਰਸਾਉਣ ਲਈ ਫੋਰਡ ਸਰਕਾਰ ਇੰਪਲਾਇਰ ਜੌਬ ਆਫਰ ਲਈ ਯੋਗ ਧੰਦਿਆਂ ਦਾ ਪਸਾਰ ਕਰਨਾ ਚਾਹੁੰਦੀ ਹੈ। ਇਸ ਦੇ ਮੱਦੇਨਜ਼ਰ ਹੀ ਇਨ-ਡਿਮਾਂਡ ਸਕਿੱਲਜ਼ ਸਟਰੀਮ ਵਿੱਚ ਟਰਾਂਸਪੋਰਟ ਟਰੱਕ ਡਰਾਈਵਰ ਤੇ ਨਿਜੀ ਸਪੋਰਟ ਵਰਕਰਾਂ ਨੂੰ ਸ਼ਾਮਲ ਕੀਤਾ ਗਿਆ ਹੈ।
ਇਸ ਤਬਦੀਲੀ ਨਾਲ ਓਨਟਾਰੀਓ ਦੀਆਂ ਟਰੱਕਿੰਗ ਕੰਪਨੀਆਂ ਦੀ ਹੁਣ ਵਿਦੇਸ਼ੀ ਲੇਬਰ ਸਰੋਤਾਂ ਤੱਕ ਪਹੁੰਚ ਹੋ ਸਕੇਗੀ। ਇਸ ਤੋਂ ਪਹਿਲਾਂ ਇਹ ਮਦਦ ਖੇਤੀਬਾੜੀ ਤੇ ਕੰਸਟ੍ਰਕਸ਼ਨ ਇੰਡਸਟਰੀਜ਼ ਤੱਕ ਹੀ ਸੀਮਤ ਸੀ। ਓਨਟਾਰੀਓ ਟਰੱਕਿੰਗ ਐਸੋਸਿਏਸ਼ਨ ਦੇ ਚੇਅਰਮੈਨ ਡੇਵਿਡ ਕੈਰਥ ਨੇ ਆਖਿਆ ਕਿ ਆਰਥਿਕ ਮੁਕਾਬਲੇਬਾਜ਼ੀ ਦੇ ਦੌਰ ਵਿੱਚ ਓਨਟਾਰੀਓ ਦੀ ਨਿਰਭਰਤਾ ਵਧੇਰੇ ਕਰਕੇ ਟਰੱਕਿੰਗ ਇੰਡਸਟਰੀ ਉੱਤੇ ਨਿਰਭਰ ਕਰਦੀ ਹੈ। ਇਸ ਪ੍ਰੋਗਰਾਮ ਨਾਲ ਹੁਣ ਟਰੱਕਿੰਗ ਕੰਪਨੀਆਂ ਆਪਣੀ ਲੋੜ ਮੁਤਾਬਕ ਹੁਨਰਮੰਦ ਲੋਕਾਂ ਨੂੰ ਭਰਤੀ ਕਰਕੇ ਆਪਣੀ ਵਰਕਫੋਰਸ ਵਿਚਲਾ ਖੱਪਾ ਪੁਰ ਕਰ ਸਕਣਗੀਆਂ।
ਇਸ ਪ੍ਰੋਗਰਾਮ ਤਹਿਤ ਡਰਾਈਵਰਾਂ ਨੂੰ ਓਨਟਾਰੀਓ ਦੇ ਐਂਟਰੀ ਲੈਵਲ ਟਰੇਨਿੰਗ ਪ੍ਰੋਗਰਾਮ ਰਾਹੀਂ ਲੰਘਣਾ ਹੋਵੇਗਾ ਤੇ ਫਿਰ ਉਸ ਤੋਂ ਬਾਅਦ ਉਨ੍ਹਾਂ ਨੂੰ ਆਪਣੇ ਇੰਪਲਾਇਰ ਕੋਲੋਂ ਉਸ ਦੀ ਲੋੜ ਮੁਤਾਬਕ ਟਰੇਨਿੰਗ ਲੈਣੀ ਹੋਵੇਗੀ।