ਬਰੈਂਪਟਨ, 14 ਅਪਰੈਲ (ਪੋਸਟ ਬਿਊਰੋ) : ਸਰਕਾਰੀ ਵਿਰੋਧੀ ਧਿਰ ਦੀ ਡਿਪਟੀ ਆਗੂ ਸਾਰਾ ਸਿੰਘ (ਬਰੈਂਪਟਨ ਸੈਂਟਰ) ਤੇ ਇਲਾਕੇ ਦੇ ਐਨਡੀਪੀ ਐਮਪੀਪੀਜ਼ ਕੈਵਿਨ ਯਾਰਡੇ (ਬਰੈਂਪਟਨ ਨੌਰਥ) ਤੇ ਗੁਰਰਤਨ ਸਿੰਘ (ਬਰੈਂਪਟਨ ਈਸਟ) ਨੇ ਆਖਿਆ ਕਿ ਵੀਰਵਾਰ ਨੂੰ ਜਾਰੀ ਕੀਤੇ ਗਏ ਬਜਟ ਵਿੱਚ ਫੋਰਡ ਸਰਕਾਰ ਵੱਲੋਂ ਕੀਤੀਆਂ ਕਟੌਤੀਆਂ ਦਾ ਦਰਦ ਪਹਿਲਾਂ ਤੋਂ ਹੀ ਚੌਪਾਸਿਓਂ ਮਾਰ ਸਹਿ ਰਹੇ ਬਰੈਂਪਟਨ ਦੇ ਕਈ ਪਰਿਵਾਰਾਂ ਨੂੰ ਹੰਢਾਉਣਾ ਪਵੇਗਾ।
ਵੀਰਵਾਰ ਨੂੰ ਪੇਸ਼ ਕੀਤੇ ਗਏ ਬਜਟ ਵਿੱਚ ਚਿਲਡਰਨ, ਕਮਿਊਨਿਟੀ ਤੇ ਸੋਸ਼ਲ ਸਰਵਿਸਿਜ਼ ਮੰਤਰਾਲੇ ਤੋਂ ਇੱਕ ਬਿਲੀਅਨ ਡਾਲਰ ਦੀ ਕਟੌਤੀ ਕਰ ਲਈ ਗਈ, ਹੈਲਥ ਕੇਅਰ ਲਈ ਵੀ ਪੂਰੇ ਫੰਡ ਨਈ ਦਿੱਤੇ ਗਏ, ਇਸ ਤੋਂ ਭਾਵ ਹੋਵੇਗਾ ਕਿ ਹਾਲਵੇਅ ਮੈਡੀਸਿਨ ਹੋਰ ਜਿ਼ਆਦਾ ਬਦਤਰ ਹੋ ਜਾਵੇਗੀ। ਇੱਥੇ ਇਹ ਵੀ ਦੱਸਣਾ ਬਣਦਾ ਹੈ ਕਿ ਫੋਰਡ ਨੇ ਬਰੈਂਪਟਨ ਵਾਸੀਆਂ ਨੂੰ ਨਵੇਂ ਹਸਪਤਾਲ ਦੀ ਸਹੂਲਤ ਦੇਣ ਤੋਂ ਵੀ ਇਨਕਾਰ ਕਰ ਦਿੱਤਾ ਹੈ, ਨਾ ਹੀ ਹੁਣ ਉਹ ਯੂਨੀਵਰਸਿਟੀ ਕੈਂਪਸ ਹੀ ਬਰੈਂਪਟਨ ਵਾਸੀਆਂ ਨੂੰ ਮਿਲਣ ਦੀ ਉਮੀਦ ਹੈ ਜਿਸ ਦੀ ਲੰਮੇਂ ਸਮੇਂ ਤੋਂ ਉਹ ਯੋਜਨਾ ਬਣਾ ਰਹੇ ਸਨ ਤੇ ਆਟੋ ਇੰਸ਼ੋਰੈਂਸ ਦਰਾਂ ਦੇ ਸਬੰਧ ਵਿੱਚ ਪੋਸਟਲ ਕੋਡ ਖਤਮ ਕਰਨ ਸਬੰਧੀ ਕਿਸੇ ਤਰ੍ਹਾਂ ਦੀ ਕਾਰਵਾਈ ਕੀਤੇ ਜਾਣ ਦਾ ਵੀ ਫੋਰਡ ਦਾ ਕੋਈ ਇਰਾਦਾ ਨਜ਼ਰ ਨਹੀਂ ਆ ਰਿਹਾ।
ਸਾਰਾ ਸਿੰਘ ਨੇ ਆਖਿਆ ਕਿ ਬਰੈਂਪਟਨ ਤੇਜ਼ੀ ਨਾਲ ਵਿਕਸਤ ਹੋ ਰਿਹਾ ਸ਼ਹਿਰ ਹੈ ਤੇ ਇਸ ਦੇ ਨਾਲ ਹੀ ਪਰਿਵਾਰਾਂ ਲਈ ਸੇਵਾਵਾਂ ਵਿੱਚ ਵਾਧਾ ਹੋਣਾ ਵੀ ਜ਼ਰੂਰੀ ਹੈ। ਸਿਹਤ ਤੇ ਸਿੱਖਿਆ ਵਿੱਚ ਨਿਵੇਸ਼ ਕਰਨ ਦੀ ਥਾਂ ਡੱਗ ਫੋਰਡ ਬਰੈਂਪਟਨ ਦੇ ਪਰਿਵਾਰਾਂ ਤੋਂ ਚੀਜ਼ਾਂ ਦੂਰ ਲਿਜਾ ਰਹੇ ਹਨ। ਉਨ੍ਹਾਂ ਆਖਿਆ ਕਿ ਸਾਨੂੰ ਨਵੇਂ ਹਸਪਤਾਲ, ਪੀਲ ਮੈਮੋਰੀਅਲ ਦੇ ਵਿਸਥਾਰ ਦੀ ਲੋੜ ਹੈ। ਸਾਨੂੰ ਯੂਨੀਵਰਸਿਟੀ ਕੈਂਪਸ ਦੀ ਲੋੜ ਹੈ ਤਾਂ ਕਿ ਸਾਡੇ ਨੌਜਵਾਨ ਬਰੈਂਪਟਨ ਵਿੱਚ ਹੀ ਰਹਿ ਕੇ ਵਧੀਆ ਤਾਲੀਮ ਹਾਸਲ ਕਰ ਸਕਣ। ਫੋਰਡ ਸਰਕਾਰ ਦੇ ਬਜਟ ਨੇ ਨਾ ਸਿਰਫ ਇਨ੍ਹਾਂ ਲੋੜਾਂ ਨੂੰ ਨਜ਼ਰਅੰਦਾਜ਼ ਕੀਤਾ ਹੈ ਸਗੋਂ ਅਜਿਹੀਆਂ ਕਟੌਤੀਆਂ ਕੀਤੀਆਂ ਹਨ ਜਿਨ੍ਹਾਂ ਨਾਲ ਸਾਡੇ ਪਰਿਵਾਰ ਬੁਰੀ ਤਰ੍ਹਾਂ ਪ੍ਰਭਾਵਿਤ ਹੋਣਗੇ।
ਅਕਤੂਬਰ ਵਿੱਚ ਨਿਊ ਡੈਮੋਕ੍ਰੈਟਸ ਨੇ ਬਰੈਂਪਟਨ ਲਈ ਨਵੇਂ ਹਸਪਤਾਲ ਤੇ ਪੀਲ ਮੈਮੋਰੀਅਲ ਸੈਂਟਰ ਦੇ ਪਸਾਰ ਲਈ ਫੰਡ ਜਾਰੀ ਕਰਨ ਦੀ ਮੰਗ ਕੀਤੀ ਸੀ। ਪਰ ਫੋਰਡ ਦੀ ਅਗਵਾਈ ਵਾਲੀ ਕੰਜ਼ਰਵੇਟਿਵ ਸਰਕਾਰ ਨੇ ਇਹ ਮੰਗ ਨਹੀਂ ਸੀ ਮੰਨੀ। ਇਸ ਦੌਰਾਨ ਐਨਡੀਪੀ ਦੇ ਕਮਿਊਨਿਟੀ ਸੇਫਟੀ ਕ੍ਰਿਟਿਕ ਯਾਰਡੇ ਨੇ ਆਖਿਆ ਕਿ ਗੰਨ ਵਾਇਲੰਸ ਤੇ ਕਮਿਊਨਿਟੀ ਸੇਫਟੀ ਵਿੱਚ ਸੁਧਾਰ ਲਈ ਵੀ ਬਜਟ ਵਿੱਚ ਕੋਈ ਫੰਡ ਨਹੀਂ ਰੱਖਿਆ ਗਿਆ। ਗੁਰਰਤਨ ਸਿੰਘ ਨੇ ਆਖਿਆ ਕਿ ਫੋਰਡ ਨੇ ਨਵੇਂ ਕਾਲਜ ਕੈਂਪਸ ਲਈ ਫੰਡ ਕੈਂਸਲ ਕਰਕੇ ਬਰੈਂਪਟਨ ਦੇ ਵਿਦਿਆਰਥੀਆਂ ਤੋਂ ਉਨ੍ਹਾਂ ਦਾ ਭਵਿੱਖ ਖੋਹ ਲਿਆ।