ਜੈਕਲੀਨ ਫਰਨਾਂਡੀਜ ਆਪਣੀ ਹਮਸ਼ਕਲ ਅਮਾਂਡਾ ਸੇਰਨੀ ਨਾਲ ਇਨ੍ਹੀਂ ਦਿਨੀਂ ਸੋਸ਼ਲ ਮੀਡੀਆ 'ਤੇ ਖੂਬ ਸਾਰੀਆਂ ਫੋਟੋਆਂ ਪੋਸਟ ਕਰ ਕੇ ਚਰਚਾ ਵਿੱਚ ਹੈ। ਜੈਕਲੀਨ ਦੇ ਸੱਦੇ 'ਤੇ ਅਮਾਂਡਾ ਉਸ ਨੂੰ ਮਿਲਣ ਅਮਰੀਕਾ ਤੋਂ ਮੁੰਬਈ ਆਈ ਹੈ। ਬਾਲੀਵੁੱਡ ਵਿੱਚ 10 ਸਾਲ ਪੂਰੇ ਕਰ ਚੁੱਕੀ ਜੈਕਲੀਨ ਅੱਹ ਤੱਕ ਦੇ ਕਰੀਅਰ ਤੋਂ ਬਹੁਤ ਖੁਸ਼ ਹੈ ਤੇ ਉਸ ਦਾ ਕਹਿਣਾ ਹੈ ਕਿ ਉਸ ਨੂੰ ਹਮੇਸ਼ਾ ਆਪਣੀ ਯੋਗਤਾ ਦੇ ਆਧਾਰ 'ਤੇ ਕੰਮ ਮਿਲਿਆ ਹੈ। 2009 ਦੀ ਫਿਲਮ ‘ਅਲਾਦੀਨ’ ਨਾਲ ਆਪਣਾ ਕਰੀਅਰ ਸ਼ੁਰੂ ਕਰਨ ਤੋਂ ਬਾਅਦ ਅੱਜ ਤੱਕ ‘ਕਿੱਕ', ‘ਹਾਊਸਫੁਲ' ਤੇ ‘ਰੇਸ 3' ਵਰਗੀਆਂ ਕਈ ਵੱਡੀਆਂ ਪਿਲਮਾਂ ਵਿੱਚ ਕੰਮ ਕਰ ਚੁੱਕੀ ਜੈਕਲੀਨ ਕਹਿੰਦੀ ਹੈ, ‘‘ਮੈਂ ਖੁਸ਼ ਹਾਂ ਕਿ ਮੈਂ ਆਪਣੇ ਦਮ 'ਤੇ ਚੀਜ਼ਾਂ ਨੂੰ ਹਾਸਲ ਕਰਨ ਵਿੱਚ ਸਮਰੱਥ ਸੀ। ਕਦੇ-ਕਦੇ ਚੀਜ਼ਾਂ ਨੇ ਕੰਮ ਕੀਤਾ ਤੇ ਕਦੇ-ਕਦੇ ਅਜਿਹਾ ਨਹੀਂ ਵੀ ਹੋਇਆ, ਪਰ ਖੁਦ ਨੂੰ ਬਿਹਤਰ ਕਰਨ ਅਤੇ ਐਕਟਰ ਦੇ ਰੂਪ ਵਿੱਚ ਅੱਗੇ ਵਧਣ ਲਈ ਖੁਦ 'ਤੇ ਜ਼ੋਰ ਦੇਣ ਦਾ ਸੰਘਰਸ਼ ਮੈਂ ਹਮੇਸ਼ਾ ਜਾਰੀ ਰੱਖਿਆ।”
ਕਰਣ ਜੌਹਰ ਦੀ ਹੋਮ ਪ੍ਰੋਡਕਸ਼ਨ ਦੀ ਫਿਲਮ ‘ਡ੍ਰਾਈਵ’ ਵਿੱਚ ਉਹ ਸੁਸ਼ਾਂਤ ਰਾਜਪੂਤ ਦੇ ਆਪੋਜ਼ਿਟ ਦਿਖਾਈ ਦੇਵੇਗੀ। ਇਸ ਤੋਂ ਇਲਾਵਾ ਉਹ ‘ਕਿੱਕ 2’ ਵਿੱਚ ਸਲਮਾਨ ਖਾਨ ਤੇ ‘ਕਿਰਿਕ ਪਾਰਟੀ' ਵਿੱਚ ਕਾਰਤਿਕ ਆਰੀਅਨ ਨਾਲ ਕੰਮ ਕਰ ਰਹੀ ਹੈ ਤੇ ਉਸ ਦਾ ਕਰੀਅਰ ਫਿਰ ਤੋਂ ਰਫਤਾਰ ਫੜ ਰਿਹਾ ਹੈ ਕਿਉਂਕਿ ਇੱਕ ਤੋਂ ਬਾਅਦ ਇੱਕ ਉਹ ਨਵੀਆਂ ਫਿਲਮਾਂ ਸਾਈਨ ਕਰ ਰਹੀ ਹੈ। ਸਭ ਤੋਂ ਪਹਿਲਾਂ ਤਾਂ ਉਸ ਦੇ ਰੋਹਿਤ ਸ਼ੈੱਟੀ ਦੀ ਅਗਲੀ ਫਿਲਮ ‘ਸੂਰਿਆਵੰਸ਼ੀ’ ਵਿੱਚ ਕੰਮ ਕਰਨ ਦੀ ਚਰਚਾ ਹੈ। ਅਜੈ ਤੇ ਰਣਵੀਰ ਤੋਂ ਬਾਅਦ ਰੋਹਿਤ ਦੀ ਇਸ ਫਿਲਮ ਵਿੱਚ ਅਕਸ਼ੈ ਕੁਮਾਰ ਪੁਲਸ ਵਾਲੇ ਦੇ ਰੋਲ ਵਿੱਚ ਨਜ਼ਰ ਆਉਣ ਵਾਲੇ ਹਨ। ਪਿੱਛੇ ਜਿਹੇ ਨਿਰਮਾਤਾਵਾਂ ਨੇ ਫਿਲਮ ਦੀ ਪਹਿਲੀ ਲੁਕ ਜਾਰੀ ਕਰਦੇ ਹੋਏ ਜਾਣਕਾਰੀ ਦਿੱਤੀ ਸੀ ਕਿ ਇਹ ਫਿਲਮ ਅਗਲੇ ਸਾਲ ਈਦ ਦੇ ਮੌਕੇ 'ਤੇ ਬਾਕਸ ਆਫਿਸ 'ਤੇ ਧਮਾਲ ਮਚਾਏਗੀ। ਕਾਫੀ ਸਮੇਂ ਤੋਂ ਇਸ ਫਿਲਮ ਲਈ ਫੀਮੇਲ ਲੀਡ ਲੱਭੀ ਜਾ ਰਹੀ ਸੀ। ਪਹਿਲਾਂ ਫਿਲਮ ਵਿੱਚ ਅਕਸ਼ੈ ਨਾਲ ਕੈਟਰੀਨਾ ਕੈਫ ਦਾ ਨਾਂਅ ਲਿਆ ਜਾ ਰਿਹਾ ਹੈ, ਪਰ ਇਸ ਵੇਲੇ ਖਬਰਾਂ ਹਨ ਕਿ ਫਿਲਮ 'ਚ ਅਕਸ਼ੈ ਦੇ ਆਪੋਜ਼ਿਟ ਜੈਕਲੀਨ ਨਜ਼ਰ ਆਏਗੀ। ਫਿਲਮ ਲਈ ਉਸ ਦਾ ਨਾਂਅ ਫਾਈਨਲ ਹੋ ਚੁੱਕਾ ਹੈ। ਅਕਸ਼ੈ ਤੇ ਜੈਕਲੀਨ ਦੀ ਆਨਸਕਰੀਨ ਕੈਮਿਸਟਰੀ ਨੂੰ ਪਹਿਲਾਂ ਵੀ ਦਰਸ਼ਕ ਪਸੰਦ ਕਰ ਚੁੱਕੇ ਹਨ। ਦੋਵਾਂ ਦੀ ਜੋੜੀ ਇਸ ਤੋਂ ਪਹਿਲਾਂ ‘ਹਾਊਸਫੁੱਲ’ ਤੇ ‘ਬ੍ਰਦਰਜ਼’ ਫਿਲਮ ਵਿੱਚ ਨਜ਼ਰ ਆਈ ਸੀ।