ਬੀਤੇ ਐਤਵਾਰ ਵਿਰਾਸਤ ਏ ਖਾਲਸਾ ਵਲੋਂ ਸ: ਭਗਤ ਸਿੰਘ ਜੀ ਦੀ ਜੀਵਨੀ ਬਾਰੇ ਤੇ ਜਲਿਆਂਵਾਲਾ ਬਾਗ ਵਿਚ ਹੋਏ ਸਾਕੇ ਦੇ ਸਤਾਬਦੀ ਵਰ੍ਹੇ ਨੂੰ ਸਮਰਪਿਤ ਸਾਊਂਡ ਐਂਡ ਲੇਜ਼ਰ ਸ਼ੋਅ ਕਰਵਾਇਆ ਗਿਆ। ਕੈਨੇਡੀਅਨ ਕਨਵੈਂਸ਼ਨ ਸੈਟਰ ਵਿਚ ਹੋਏ ਇਸ ਸ਼ੋਅ ਨੂੰ ਹਜ਼ਾਰਾਂ ਲੋਕਾਂ ਨੇ ਦੇਖਿਆ ਤੇ ਭਗਤ ਸਿੰਘ ਜੀ ਦੀ ਜੀਵਨੀ ਦੀਆਂ ਗੱਲਾਂ ਨੂੰ ਯਾਦ ਕੀਤਾ। ਇਹ ਸਾਊਂਡ ਐਂਡ ਲੇਜ਼ਰ ਸ਼ੋਅ ਪ੍ਰਾਚੀਨ ਭਾਰਤ ਨਾਮ ਦੀ ਸੰਸਥਾ ਵਲੋਂ ਤਿਆਰ ਕੀਤਾ ਗਿਆ ਸੀ ਤੇ ਇਸ ਨੂੰ ਕੈਨੇਡਾ ਤੱਕ ਲਿਆਉਣ ਲਈ ਕੌਂਸਲਰ ਜਨਰਲ ਆਫ਼ ਇੰਡੀਆ ਦਾ ਵਿਸ਼ੇ਼ਸ਼ ਸਹਿਯੋਗ ਰਿਹਾ। ਸ਼ੋਅ ਦੇ ਸੁਰੂਆਤ ਮੌਕੇ ਕੌਂਸਲਰ ਜਨਰਲ ਸ੍ਰੀ ਦਿਨੇਸ ਭਾਟੀਆ ਨੇ ਜਲਿਆਂਵਾਲਾ ਬਾਗ ਦੇ ਇਸ ਸਾਕੇ ਉਤੇ ਆਪਣੇ ਵਿਚਾਰ ਰੱਖੇ ਅਤੇ ਸ਼ਹੀਦ ਏ ਆਜਮ ਭਗਤ ਸਿੰਘ ਦੀ ਜੀਵਨ ਤੇ ਉਸ ਦੀ ਵਿਚਾਰ ਧਾਰਾ ਦੇ ਬਾਰੇ ਵਿਚ ਆਪਣੀ ਰਾਏ ਦਿੱਤੀ। ਉਨ੍ਹਾਂ ਕਿਹਾ ਕਿ ਜੇਕਰ ਭਾਰਤ ਅੱਜ ਆਜਾਦੀ ਦਾ ਨਿੱਘ ਮਾਣ ਰਿਹਾ ਹੈ ਤਾਂ ਉਸ ਵਿਚ ਵੱਡਾ ਯੋਗਦਾਨ ਭਗਤ ਸਿੰਘ, ਰਾਜਗੁਰੂ, ਸੁਖਦੇਵ ਤੇ ਅਜਿਹੇ ਹੋਰ ਨੌਜਵਾਨਾਂ ਦਾ ਹੈ, ਜਿਨ੍ਹਾਂ ਨੇ ਉਸ ਸਮੇ ਭਾਰਤ ਦੀ ਜਨਤਾ ਨੂੰ ਜਗਾਇਆ ਤੇ ਆਪਣਾ ਹੱਕ ਆਜਾਦੀ ਲੈਣ ਲਈ ਪ੍ਰੇਰਿਆ। ਹਰਜਿੰਦਰ ਗਿੱਲ, ਜਿਨ੍ਹਾਂ ਨੇ ਇਹ ਸਾਰਾ ਪ੍ਰੋਗਰਾਮ ਕੋਆਰਡੀਨੇਟ ਕੀਤਾ, ਉਨ੍ਹਾਂ ਆਏ ਦਰਸ਼ਕਾਂ ਦਾ ਧੰਨਵਾਦ ਕੀਤਾ। ਇਹ ਸਾਰਾ ਪ੍ਰੋਗਰਾਮ ਮੁਫਤ ਸੀ। ਇਸ ਵਿਚ ਤਿੰਨ ਸ਼ੋਅ ਪੇਸ਼ ਕੀਤੇ ਗਏ। ਪਹਿਲਾ ਸ਼ੋਅ 1 ਵਜੇ ਪੰਜਾਬੀ ਵਿਚ, ਦੂਜਾ ਸ਼ੋਅ 3 ਵਜੇ ਹਿੰਦੀ ਵਿਚ ਤੇ ਤੀਜਾ ਸ਼ੋਅ ਸ਼ਾਮ 5 ਵਜੇ ਅੰਗੇ੍ਰਜੀ ਵਿਚ ਪੇਸ਼ ਕੀਤਾ ਗਿਆ।