ਸੋਨਾਕਸ਼ੀ ਸਿਨਹਾ ਨੇ ‘ਦਬੰਗ’ ਤੋਂ ਅੱਜ ਤੱਕ ਲਗਭਗ ਅੱਠ ਸਾਲ ਦੇ ਆਪਣੇ ਕਰੀਅਰ ਵਿੱਚ ਬਾਕਸ ਆਫਿਸ 'ਤੇ ਜ਼ੋਰਦਾਰ ਕਾਮਯਾਬੀ ਅਤੇ ਘੋਰ ਨਾਕਾਮੀ, ਦੋਵਾਂ ਦੇ ਸਵਾਦ ਵੇਖ ਲਏ ਹਨ। ਉਸ ਨੂੰ ਚੰਗੇ ਆਫਰ ਮਿਲਣ ਲੱਗੇ ਹਨ। ਇਸੇ ਦਾ ਸਬੂਤ ਹੈ ਕਰਣ ਜੌਹਰ ਦੀ ਅਭਿਸ਼ੇਕ ਵਰਮਨ ਨਿਰਦੇਸ਼ਿਤ ਮਲਟੀਸਟਰਾਰ ‘ਕਲੰਕ’ ਵਿਚ ਸੋਨਾਕਸ਼ੀ ਨੂੰ ਹੈਰਾਨ ਕਰ ਦੇਣ ਵਾਲਾ ਕਿਰਦਾਰ ਮਿਲਣਾ। ਪੇਸ਼ ਹਨ ਉਸ ਨਾਲ ਹੋਈ ਇੱਕ ਗੱਲਬਾਤ ਦੇ ਅੰਸ਼ :
* ਤੁਸੀਂ ਕਦੇ ਕਾਮਯਾਬੀ ਦੇ ਟੌਪ 'ਤੇ ਸੀ, ਪਰ ਉਸ ਤੋਂ ਬਾਅਦ ਨਾਕਾਮੀਆਂ ਦਾ ਲੰਬਾ ਦੌਰ ਵੀ ਦੇਖਿਆ। ਅਜਿਹੇ ਸਫਰ 'ਤੇ ਕੀ ਕਹੋਗੇ?
- ਕਾਮਯਾਬੀ ਤੇ ਨਾਕਾਮੀ ਇੱਕੋ ਸਿੱਕੇ ਦੇ ਦੋ ਪਹਿਲੂ ਹਨ ਅਤੇ ਦੋਵਾਂ ਤੋਂ ਇਨਸਾਨ ਨੂੰ ਕੁਝ ਨਾ ਕੁਝ ਸਿੱਖਣ ਨੂੰ ਮਿਲਦਾ ਹੈ। ਇਹੀ ਕਾਰਨ ਹੈ ਕਿ ਮੇਰੇ ਲਈ ਦੋਵਾਂ ਹਾਲਾਤ ਵਿੱਚ ਫਾਇਦਾ ਹੋਇਆ। ਇੰਨੇ ਦਿਨਾਂ ਤੱਕ ਇੰਡਸਟਰੀ 'ਚ ਐਕਟਿਵ ਰਹਿਣ ਤੋਂ ਬਾਅਦ ਮੈਂ ਸਮਝ ਚੁੱਕੀ ਹਾਂ ਕਿ ‘ਹਿੱਟ’ ਦਾ ਸ਼ੋਰ-ਸ਼ਰਾਬਾ ਅਤੇ ‘ਫਲਾਪ’ ਦੀ ਮਾਯੂਸੀ ਦੋਵੇਂ ਬੇਕਾਰ ਹਨ।
* ਕੀ ਕਿਸ਼ਤਵਾਰ ਰੂਪ 'ਚ ਮਿਲੀਆਂ ਨਾਕਾਮੀਆਂ ਨਾਲ ਤੁਹਾਡੇ ਅੰਦਰ ਨਿਰਾਸ਼ਾ ਘਰ ਕਰ ਰਹੀ ਸੀ? ਕੀ ਇੰਡਸਟਰੀ ਦੇ ਲੋਕਾਂ ਦੇ ਨਜ਼ਰੀਏ 'ਚ ਵੀ ਫਰਕ ਦੇਖਿਆ?
- ਬਿਲਕੁਲ ਨਹੀਂ, ਆਖਰ ਨਿਰਾਸ਼ ਕਿਉਂ ਹੋਵਾਂ। ਮੈਨੂੰ ਪਤਾ ਹੈ ਕਿ ਕਿਸੇ ਫਿਲਮ ਨੂੰ ਕਲਾਕਾਰ ਨਹੀਂ, ਸਗੋਂ ਦਰਸ਼ਕ ਹਿੱਟ ਜਾਂ ਫਲਾਪ ਕਰਾਉਂਦੇ ਹਨ। ਦੋਵੇਂ ਚੀਜ਼ਾਂ ਉਸ ਦੇ ਹੱਥ 'ਚ ਹਨ ਅਤੇ ਜੋ ਚੀਜ਼ ਮੇਰੇ ਹੱਥ 'ਚ ਨਹੀਂ ਹੈ, ਉਸ ਤੋਂ ਮੈਂ ਖੁਦ ਨੂੰ ਨਿਰਾਸ਼ ਨਹੀਂ ਹੋਣ ਦਿੰਦੀ। ਜਿੱਥੋਂ ਤੱਕ ਲੋਕਾਂ ਦੇ ਨਜ਼ਰੀਏ 'ਚ ਤਬੀਦੀਲ ਦੀ ਗੱਲ ਹੈ ਤਾਂ ਮੈਨੂੰ ਨਹੀਂ ਲੱਗਦਾ ਕਿ ਮੇਰੇ ਪ੍ਰਤੀ ਇੰਡਸਟਰੀ 'ਚ ਕਿਸੇ ਤਰ੍ਹਾਂ ਦੀ ਤਬਦੀਲੀ ਆਈ ਹੈ।
* ਕਿਸ ਤਰ੍ਹਾਂ ਦੀਆਂ ਫਿਲਮਾਂ ਕਰਨਾ ਤੁਹਾਨੂੰ ਜ਼ਿਆਦਾ ਪਸੰਦ ਹੈ?
- ਸੱਚ ਦੱਸਾਂ ਤਾਂ ਮੈਂ ਰੋਮਾਂਟਿਕ ਐਕਸ਼ਨ, ਡਾਰਕ ਲਗਭਗ ਹਰ ਤਰ੍ਹਾਂ ਦੀਆਂ ਫਿਲਮਾਂ ਵਿੱਚ ਵੱਖ-ਵੱਖ ਤਰ੍ਹਾਂ ਦੇ ਕਿਰਦਾਰ ਨਿਭਾ ਚੁੱਕੀ ਹਾਂ, ਪਰ ਇਸ ਦੇ ਬਾਵਜੂਦ ਮੈਨੂੰ ਕਾਮੇਡੀ ਫਿਲਮਾਂ ਬਹੁਤ ਪਸੰਦ ਹਨ। ਮੈਂ ਫੈਮਿਲੀ ਐਂਟਰਟੇਨਰ ਵੀ ਕਰਨਾ ਚਾਹੁੰਦੀ ਹਾਂ, ਪਰ ਮੇਰੀ ਕੋਸ਼ਿਸ਼ ਇਹੀ ਹੈ ਕਿ ਇੱਕ ਕਲਾਕਾਰ ਹੋਣ ਦੇ ਨਾਤੇ ਹਰ ਤਰ੍ਹਾਂ ਦੀਆਂ ਫਿਲਮਾਂ ਕਰਾਂ।
* ਮਲਟੀਸਟਾਰਰ ਫਿਲਮ ‘ਕਲੰਕ’ ਵਿੱਚ ਕੰਮ ਕਰਨ ਦੇ ਤਜਰਬੇ ਬਾਰੇ ਕੀ ਕਹੋਗੇ?
- ਮੈਂ ਇਸ ਫਿਲਮ ਦਾ ਹਿੱਸਾ ਬਣ ਕੇ ਬਹੁਤ ਉਤਸ਼ਾਹਤ ਹਾਂ ਤੇ ਮੇਰੀ ਖੁਸ਼ੀ ਦਾ ਸਭ ਤੋਂ ਵੱਡਾ ਕਾਰਨ ਇਹੀ ਹੈ ਕਿ ਇਸ ਦੀ ਸਟਾਰ ਕਾਸਟ ਬਹੁਤ ਸ਼ਾਨਦਾਰ ਹੈ। ਮੈਨੂੰ ਇੱਕ ਸਮੇਂ 'ਚ ਇੱਕੋ ਫਿਲਮ ਵਿੱਚ ਨਵੇਂ ਅਤੇ ਪੁਰਾਣੇ ਕਲਾਕਾਰਾਂ ਨਾਲ ਕੰਮ ਕਰਨ ਦਾ ਮੌਕਾ ਮਿਲ ਰਿਹਾ ਹੈ, ਕਿਉਂਕਿ ਇਸ ਫਿਲਮ 'ਚ ਮੇਰੇ ਤੋਂ ਇਲਾਵਾ ਆਲੀਆ ਭੱਟ, ਵਰੁਣ ਧਵਨ, ਆਦਿੱਤਿਆ ਰਾਏ ਕਪੂਰ, ਮਾਧੁਰੀ ਦੀਕਸ਼ਿਤ ਅਤੇ ਸੰਜੇ ਦੱਤ ਵੀ ਹਨ।
* ਕਿਹਾ ਜਾ ਰਿਹਾ ਹੈ ਕਿ ‘ਆਪਲਾ ਮਾਨੂਸ’ ਦੇ ਹਿੰਦੀ ਰੀਮੇਕ 'ਚੋਂ ਤੁਸੀਂ ਕਰੀਨਾ ਕਪੂਰ ਨੂੰ ਆਊਟ ਕਰ ਦਿੱਤਾ ਹੈ?
- ਕੀ ਤੁਹਾਨੂੰ ਇੰਝ ਲੱਗਦਾ ਹੈ ਕਿ ਸੋਨਾਕਸ਼ੀ ਕਿਸੇ ਹੋਰ ਅਭਿਨੇਤਰੀ ਦੀ ਸਾਈਨ ਹੋਈ ਫਿਲਮ ਖੋਹ ਸਕਦੀ ਹੈ। ਨਹੀਂ, ਮੈਂ ਅਜਿਹਾ ਕਰ ਹੀ ਨਹੀਂ ਸਕਦੀ।