ਬਰੈਂਪਟਨ, 27 ਮਾਰਚ (ਪੋਸਟ ਬਿਊਰੋ) : ਬਰੈਂਪਟਨ ਵਿੱਚ ਗੋ ਟਰੇਨ ਸਰਵਿਸ ਦਾ ਪਸਾਰ ਕਰਕੇ ਓਨਟਾਰੀਓ ਸਰਕਾਰ ਲੋਕਾਂ ਦੀ ਭਲਾਈ ਕਰ ਰਹੀ ਹੈ। ਇਹ ਵਿਚਾਰ ਪ੍ਰਗਟਾਉਂਦਿਆਂ ਟਰਾਂਸਪੋਰਟੇਸ਼ਨ ਮੰਤਰੀ ਜੈੱਫ ਯੂਰੇਕ ਨੇ ਅੱਜ ਗੋ ਟਰੇਨ ਸਰਵਿਸ ਦੇ ਪਸਾਰ ਦਾ ਐਲਾਨ ਕੀਤਾ ਜੋ ਕਿ ਬਰੈਂਪਟਨ ਦੇ ਟਰਾਂਜਿ਼ਟ ਯੂਜ਼ਰਜ਼ ਤੇ ਕਮਿਊਟਰਜ਼ ਲਈ ਹੋਰ ਬਦਲ ਪੇਸ਼ ਕਰੇਗਾ। ਇਹ ਫੈਸਲਾ 8 ਅਪਰੈਲ, 2019 ਤੋਂ ਲਾਗੂ ਹੋਵੇਗਾ।
ਬਰੈਂਪਟਨ ਦੇ ਕਮਿਊਟਰਜ਼ ਹੁਣ ਟਰਾਂਸਪੋਰਟੇਸ਼ਨ ਸਬੰਧੀ ਹੋਰ ਬਦਲ ਅਪਣਾ ਸਕਣਗੇ। ਸਵੇਰ ਸਮੇਂ ਹੁਣ ਕਮਿਊਟਰਜ਼ ਨੂੰ ਬ੍ਰਾਮੇਲੀਆ ਗੋ ਤੇ ਯੂਨੀਅਨ ਸਟੇਸ਼ਨ ਦਰਮਿਆਨ ਟਰਿੱਪ ਲਈ ਵਧੇਰੇ ਬਦਲ ਮਿਲ ਸਕਣਗੇ। ਟਰਾਂਸਪੋਰਟੇਸ਼ਨ ਵਿੱਚ ਕੀਤੇ ਜਾਣ ਵਾਲੇ ਸੁਧਾਰ ਵਿੱਚ ਗੱਡੀ ਸਵੇਰੇ 7:55 ਉੱਤੇ ਬ੍ਰਾਮੇਲੀਆ ਗੋ ਸਟੇਸ਼ਨ ਛੱਡੇਗੀ ਤੇ ਸਾਰੇ ਸਟੌਪਜ਼ ਉੱਤੇ ਰੁਕਦੀ ਹੋਈ ਸਵੇਰੇ 8:33 ਉੱਤੇ ਯੂਨੀਅਨ ਸਟੇਸ਼ਨ ਪਹੁੰਚੇਗੀ। ਇਸ ਸਮੇਂ ਮਾਲਟਨ ਗੋ ਤੋਂ ਸਵੇਰੇ 8:33 ਉੱਤੇ ਚੱਲਣ ਵਾਲਾ ਟਰਿੱਪ ਹੁਣ ਬ੍ਰਾਮੇਲੀਆ ਗੋ ਤੋਂ ਸਵੇਰੇ 8:27 ਉੱਤੇ ਸ਼ੁਰੂ ਹੋਵੇਗਾ ਤੇ 9:05 ਉੱਤੇ ਯੂਨੀਅਨ ਸਟੇਸ਼ਨ ਪਹੁੰਚੇਗਾ। ਇਸ ਤੋਂ ਇਲਾਵਾ ਕੁੱਝ ਗੱਡੀਆਂ ਦਾ ਆਕਾਰ ਵੀ ਵਧਾਇਆ ਜਾਵੇਗਾ ਤਾਂ ਕਿ ਕਸਟਮਰਜ਼ ਨੂੰ ਪਰੇਸ਼ਾਨੀ ਨਾ ਹੋਵੇ।
ਇਹ ਤਬਦੀਲੀਆਂ 8 ਅਪਰੈਲ ਨੂੰ ਪ੍ਰਭਾਵੀ ਹੋਣਗੀਆਂ। ਮਾਲਟਨ ਗੋ (ਜੋ ਕਿ ਹੁਣ ਬ੍ਰਾਮੇਲੀਆ ਤੋਂ ਸਵੇਰੇ 8:27 ਉੱਤੇ ਸ਼ੁਰੂ ਹੋ ਰਹੀ ਹੈ) ਤੋਂ ਸਵੇਰੇ 8:33 ਵਾਲੀ ਟਰੇਨ ਵਿੱਚ ਛੇ ਤੋਂ 10 ਕੋਚ ਦਾ ਵਾਧਾ ਕੀਤਾ ਜਾਵੇਗਾ। ਐਮਪੀਪੀ ਪ੍ਰਭਮੀਤ ਸਰਕਾਰੀਆ ਨੇ ਆਖਿਆ ਕਿ ਬ੍ਰਾਮੇਲੀਆ ਗੋ ਤੇ ਯੂਨੀਅਨ ਸਟੇਸ਼ਨ ਦਰਮਿਆਨ ਸਵੇਰ ਵਾਲੇ ਟਰਿੱਪਜ਼ ਨਾਲ ਬਰੈਂਪਟਨ ਦੇ ਕਮਿਊਟਰਜ਼ ਨੂੰ ਉਦੋਂ ਹੋਰ ਬਦਲ ਮਿਲ ਸਕਣਗੇ ਜਦੋਂ ਉਨ੍ਹਾਂ ਨੂੰ ਉਨ੍ਹਾਂ ਦੀ ਸੱਭ ਤੋਂ ਵੱਧ ਲੋੜ ਹੋਵੇਗੀ।