ਔਕਲੈਂਡ, 25 ਮਾਰਚ (ਹਰਜਿੰਦਰ ਸਿੰਘ ਬਸਿਆਲਾ): ਅੱਜਕੱਲ੍ਹ ਭਾਵੇਂ ਨਿਊਜ਼ੀਲੈਂਡ ਦੇ ਵਿਦਿਅਕ ਅਦਾਰੇ ਭਾਵੇਂ ਭਾਰਤੀ ਵਿਦਿਆਰਥੀਆਂ ਦੇ ਨਾਲ ਰੁੱਸੇ-ਰੁੱਸੇ ਲਗਦੇ ਹਨ ਅਤੇ ਅੰਤਰਰਾਸ਼ਟਰੀ ਪਾੜ੍ਹਿਆਂ ਦੀ ਉਡੀਕ ਕਰਦੀਆਂ ਜਹਾਜ਼ ਦੀਆਂ ਸੀਟਾਂ ਸੁੰਨੀਆ ਹੀ ਆ ਰਹੀਆਂ ਹਨ। ਜੇਕਰ ਗੱਲ ਕਰੀਏ ਇਥੇ ਪਹਿਲਾਂ ਤੋਂ ਆਏ ਹੋਏ ਅੰਤਰਰਾਸ਼ਟਰੀ ਵਿਦਿਆਰਥੀਆਂ ਦੀ ਉਨ੍ਹਾਂ ਦੀ ਖੱਜ਼ਲ-ਖੁਆਰੀ ਵੀ ਬੰਦ ਨਹੀਂ ਹੋਈ ਹੈ ਇਸਦਾ ਕਾਰਨ ਭਾਵੇਂ 'ਨਿਊਜ਼ੀਲੈਂਡ ਕੁਆਲੀਫੀਕੇਸ਼ਨ ਅਥਾਰਟੀ' ਦਾ ਪੜ੍ਹਾਈ ਨੂੰ ਲੈ ਕੇ ਮਿਆਰੀਪਨ ਹੋਵੇ, ਉਚੇ ਮਾਪਦੰਡ ਹੋਣ ਜਾਂ ਛੋਟੇ ਸਿਖਿਆ ਸੰਸਥਾਨਾਂ ਦੇ ਉਤੇ ਸਟੈਂਡਰਜ਼ ਨੂੰ ਲੈ ਕੇ ਸਖਤੀ। ਹੁਣ ਮੈਨੁਕਾਓ ਸਥਿਤ ਐਨ. ਆਈ.ਟੀ.ਟੀ. ਕਾਲਜ ਦਾ ਲੈਵਲ-5 ਅਤੇ ਲੈਵਲ-6 ਦਾ ਬਿਜਨਸ ਡਿਪਲੋਮਾ ਕੋਰਸ ਦੀ ਮਾਨਤਾ ਨੂੰ ਰੱਦ ਕਰ ਦਿੱਤਾ ਗਿਆ ਹੈ। ਇਨ੍ਹਾਂ ਕੋਰਸਾਂ ਦੇ ਵਿਚ ਪੜ੍ਹਦੇ ਪੰਜ ਦਰਜਨ ਤੋਂ ਵੱਧ ਬੱਚੇ ਜਿਨ੍ਹਾਂ ਵਿਚ ਬਹੁਤੇ ਭਾਰਤੀ ਬੱਚੇ ਵੀ ਸ਼ਾਮਿਲ ਹਨ, ਨੂੰ ਇਨ੍ਹਾਂ ਕੋਰਸਾਂ ਦੇ ਬੰਦ ਹੋਣ ਨਾਲ ਬਹੁਤ ਖੱਜ਼ਲ ਖੁਆਰੀ ਦਾ ਸਾਹਾਣਾ ਕਰਨਾ ਪੈ ਰਿਹਾ ਹੈ। ਕੁਝ ਬੱਚਿਆਂ ਨੇ ਆਪਣੀ ਪੜ੍ਹਾਈ ਪੂਰੀ ਕਰਨ ਦੇ ਲਈ ਵੀਜ਼ਾ ਐਕਸਟੈਂਸ਼ਨ ਵੀ ਲਈ ਹੋਈ ਸੀ, ਪਰ ਹੁਣ ਉਨ੍ਹਾਂ ਨੂੰ ਇਹ ਪਤਾ ਨਹੀਂ ਲੱਗ ਰਿਹਾ ਕਿ ਦੂਸਰੇ ਕਾਲਜ ਉਨ੍ਹਾਂ ਨੂੰ ਉਸੇ ਥਾਂ ਤੋਂ ਪੜ੍ਹਾਈ ਸ਼ੁਰੂ ਕਰਵਾ ਦੇਣਗੇ ਜਾਂ ਫਿਰ ਸਾਰੀ ਪੜ੍ਹਾਈ ਦੁਬਾਰਾ ਸ਼ੁਰੂ ਕਰਨੀ ਪਏਗੀ। ਕੁਝ ਕਾਲਜ ਪੁਰਾਣੀ ਪੜ੍ਹਾਈ ਦਾ ਟੈਸਟ ਲੈ ਕੇ ਇਨ੍ਹਾਂ ਨੂੰ ਬਾਕੀ ਪੜ੍ਹਾਈ ਪੂਰੀ ਕਰਵਾ ਸਕਦੇ ਹਨ ਪਰ ਕਈਆਂ ਨੂੰ ਕਾਲਜ ਬਦਲਣ ਦੇ ਨਾਲ-ਨਾਲ ਨਵਾਂ ਕੋਰਸ ਵੀ ਲੈਣਾ ਪੈ ਸਕਦਾ ਹੈ। ਭਾਵੇਂ ਐਨ. ਜ਼ੈਡ. ਕਿਊ ਨੇ ਪੂਰੀ ਸਹਾਇਤਾ ਕਰਨ ਅਤੇ ਰਹਿੰਦੀ ਫੀਸ ਵਾਪਿਸ ਕਰਨ ਦਾ ਵਾਅਦ ਕੀਤਾ ਹੈ, ਪਰ ਵੀਜ਼ਾ ਫੀਸਾਂ ਜੋ ਚਲੇਗਈਆਂ ਉਹ ਵਾਪਿਸ ਨਹੀਂ ਹੋਣਗੀਆਂ। ਕਾਲਜ ਨੂੰ ਇਸ ਸਬੰਧੀ ਕੰਪਲਾਇੰਸ ਨੋਟਿਸ ਜਾਰੀ ਹੋ ਚੁੱਕਾ ਹੈ ਅਤੇ ਫੀਸਾਂ ਵਾਪਿਸ ਕਰਨ ਬਾਰੇ ਕਿਹਾ ਗਿਆ ਹੈ। ਸਿਖਿਆ ਵਿਭਾਗ ਜੁਲਾਈ 2018 ਤੋਂ ਇਸ ਕਾਲਜ ਉਤੇ ਨਿਗ੍ਹਾ ਰੱਖ ਰਿਹਾ ਸੀ ਤੇ ਮਿਆਰ ਨੂੰ ਲੈ ਕੇ ਕੁਝ ਗੰਭੀਰ ਪਾਇਆ ਸੀ। ਨਿਊਜ਼ੀਲੈਂਡ ਕੁਆਲੀਫੀਕੇਸ਼ਨ ਅਥਾਰਟੀ ਨੇ ਦਾਅਵਾ ਕੀਤਾ ਹੈ ਕਿ ਉਹ ਰਾਸ਼ਟਰੀ ਅਤੇ ਅੰਤਰਰਾਸ਼ਟਰੀ ਉਚ ਸਿਖਿਆ ਮਿਆਰ ਨੂੰ ਇਸੀ ਤਰ੍ਹਾਂ ਬਰਕਰਾਰ ਰੱਖੇਗੀ।