ਬੀਤੇ ਕਈ ਦਿਨਾਂ ਤੋਂ ਇੰਡਸਟਰੀ ਵਿੱਚ ਚਰਚਾ ਹੈ ਕਿ ਸਲਮਾਨ ਖਾਨ ਤੇ ਸੰਜੇ ਲੀਲਾ ਭੰਸਾਲੀ 19 ਸਾਲ ਬਾਅਦ ਇਕੱਠੇ ਕੰਮ ਕਰਨ ਵਾਲੇ ਹਨ, ਪਰ ਇਸ ਦੇ ਲੀਡ ਅਭਿਨੇਤਰੀ ਕੌਣ ਹੋਵੇਗੀ ਇਸ 'ਤੇ ਲਗਾਤਾਰ ਕਿਆਸ ਲਾਏ ਜਾ ਰਹੇ ਸਨ। ਇਸ ਫਿਲਮ ਦੀ ਸਟਾਰਕਾਸਟ ਅਤੇ ਨਾਂਅ ਦੋਵਾਂ ਬਾਰੇ ਆਫੀਸ਼ੀਅਲ ਅਨਾਊਂਸਮੈਂਟ ਕਰ ਦਿੱਤੀ ਗਈ ਹੈ। ਫਿਲਮ ਦਾ ਨਾਂਅ ‘ਇੰਸ਼ਾ ਅੱਲ੍ਹਾ’ ਹੋਵੇਗਾ, ਜਿਸ ਵਿੱਚ ਸਲਮਾਨ ਖਾਨ ਦੇ ਆਪੋਜ਼ਿਟ ਆਲੀਆ ਭੱਟ ਨੂੰ ਸਾਈਨ ਕੀਤਾ ਹੈ। ਦੋਵੇਂ ਪਹਿਲੀ ਵਾਰ ਕਿਸੇ ਫਿਲਮ ਵਿੱਚ ਇਕੱਠੇ ਹੋਣਗੇ। ਪਹਿਲਾਂ ਚਰਚਾ ਸੀ ਕਿ ਇਸ ਵਿੱਚ ਦੀਪਿਕਾ ਪਾਦੂਕੋਣ ਕੰਮ ਕਰ ਸਕਦੀ ਹੈ, ਪਰ ਮੇਕਰਸ ਨੇ ਅਨਾਊਂਸਮੈਂਟ ਕਰ ਕੇ ਸਾਰੇ ਕਿਆਸਾਂ 'ਤੇ ਰੋਕ ਲਾ ਦਿੱਤੀ ਹੈ। ਫਿਲਮ ਦੀ ਸ਼ੂਟਿੰਗ ਇਸੇ ਸਾਲ ਦੇ ਅੰਤ ਤੱਕ ਸ਼ੁਰੂ ਹੋ ਸਕਦੀ ਹੈ। ਹਾਲੇ ਤੱਕ ਇਸ ਦੀ ਕਹਾਣੀ ਅਤੇ ਪਲਾਟ ਨਾਲ ਜੁੜੀ ਕੋਈ ਜਾਣਕਾਰੀ ਸਾਹਮਣੇ ਨਹੀਂ ਆਈ। ਸਲਮਾਨ ਖਾਨ ਨੇ ਆਪਣੇ ਟਵਿੱਟਰ 'ਤੇ ਲਿਖਿਆ, ‘‘20 ਸਾਲ ਹੋ ਚੁੱਕੇ ਹਨ, ਪਰ ਮੈਂ ਖੁਸ਼ ਹਾਂ ਕਿ ਭੰਸਾਲੀ ਅਤੇ ਮੈਂ ਫਿਲਮ ‘ਇੰਸ਼ਾ ਅੱਲ੍ਹਾ’ ਵਿੱਚ ਇਕੱਠੇ ਕੰਮ ਕਰਨ ਵਾਲੇ ਹਾਂ। ਇਸ ਫਿਲਮ ਵਿੱਚ ਆਲੀਆ ਦੇ ਨਾਲ ਕੰਮ ਕਰਨ ਦਾ ਇੰਤਜ਼ਾਰ ਕਰ ਰਿਹਾ ਹਾਂ।”
ਸਲਮਾਨ ਅਤੇ ਭੰਸਾਲੀ ਨੇ 19 ਸਾਲ ਪਹਿਲਾਂ ਬਲਾਕਬਸਟਰ ਫਿਲਮ ‘ਹਮ ਦਿਲ ਦੇ ਚੁਕੇ ਸਨਮ’ ਵਿੱਚ ਇਕੱਠੇ ਕੰਮ ਕੀਤਾ ਸੀ। ਫਿਲਮ ਸੁਪਰ-ਡੁਪਰ ਹਿੱਟ ਰਹੀ, ਪਰ ਇਸ ਦੇ ਬਾਅਦ ਦੋਵਾਂ ਨੇ ਕਦੇ ਇਕੱਠੇ ਕੰਮ ਨਹੀਂ ਕੀਤਾ। ਦੋਵਾਂ ਦਾ ਇੰਨਾ ਲੰਬਾ ਬ੍ਰੇਕ ਸਾਰਿਆਂ ਨੂੰ ਰੜਕ ਰਿਹਾ ਸੀ। ਕਈ ਵਾਰ ਇਨ੍ਹਾਂ ਵਿੱਚ ਤਣਾਅ ਦੀਆਂ ਖਬਰਾਂ ਵੀ ਆਈਆਂ, ਪਰ ਪਿਛਲੇ ਦਿਨਾਂ ਸਲਮਾਨ ਨੇ ਇਹ ਗੱਲ ਸਵੀਕਾਰੀ ਕਿ ਉਹ ਭੰਸਾਲੀ ਨਾਲ ਫਿਲਮ ਵਾਲੇ ਹਨ ਤੇ ਚਾਹੁੰਦੇ ਹਨ ਕਿ ਭੰਸਾਲੀ ਉਨ੍ਹਾਂ ਨੂੰ ਜਲਦੀ ਸਕ੍ਰਿਪਟ ਸੌਂਪਣ। ਆਖਰ ਦੋਵਾਂ ਨੇ ਆਪਣੀ ਅਗਲੀ ਫਿਲਮ ਦੀ ਅਨਾਊਂਸਮੈਂਟ ਕਰ ਦਿੱਤੀ ਹੈ।