ਨਵੀਂ ਦਿੱਲੀ, 25 ਮਾਰਚ (ਪੋਸਟ ਬਿਊਰੋ)- ਕੀ ਤੁਸੀਂ ਕਦੇ ਕਿਸੇ ਰੁੱਖ ਦੀ ਗ੍ਰਿਫਤਾਰੀ ਬਾਰੇ ਸੁਣਿਆ ਹੈ, ਸ਼ਾਇਦ ਨਹੀਂ, ਪਰ ਇੱਕ ਕਾਨੂੰਨ ਦੇ ਕਾਰਨ ਪਾਕਿਸਤਾਨ ਦੇ ਖੈਬਰ ਪਖਤੂਨਖਵਾ ਸੂਬੇ ਵਿੱਚ ਇੱਕ ਬੋਹੜ ਦੇ ਦਰੱਖਤ ਨੂੰ ਜੰਜ਼ੀਰਾਂ 'ਚ ਜਕੜਿਆ ਹੋਇਆ ਹੈ, ਉਹ ਵੀ ਪਿਛਲੇ 121 ਸਾਲਾਂ ਤੋਂ ਅਤੇ ਉਸ 'ਤੇ ਇੱਕ ਤਖਤੀ ਵੀ ਲੱਗੀ, ਜਿਸ 'ਤੇ ਲਿਖਿਆ ਹੈ ਆਈ ਐਮ ਅਰੈਸਟ। ਇਹ ਦਰੱਖਤ ਪਾਕਿਸਤਾਨ ਦੇ ਲਾਂਡੀ ਕੋਤਲ ਆਰਮੀ ਕੈਂਪ ਵਿੱਚ ਲੱਗਾ ਹੈ।
ਜਾਣਕਾਰ ਸੂਤਰਾਂ ਅਨੁਸਾਰ ਸਾਲ 1898 ਵਿੱਚ ਜਦ ਦੇਸ਼ ਅੰਗਰੇਜ਼ਾਂ ਦਾ ਗੁਲਾਮ ਸੀ, ਉਦੋਂ ਨਸ਼ੇ 'ਚ ਟੱਲੀ ਇੱਕ ਬ੍ਰਿਟਿਸ਼ ਆਰਮੀ ਅਫਸਰ ਜੇਮਸ ਸਕਵਾਇਡ ਨੂੰ ਲੱਗਾ ਕਿ ਇਹ ਬੋਹੜ ਦਾ ਰੁੱਖ ਉਸ ਵੱਲ ਤੁਰਿਆ ਆ ਰਿਹਾ ਹੈ। ਉਹ ਘਬਰਾ ਗਿਆ ਅਤੇ ਉਸ ਦੇ ਹੁਕਮ 'ਤੇ ਇਸ ਦਰੱਖਤ ਨੂੰ ਗ੍ਰਿਫਤਾਰ ਕਰ ਲਿਆ ਗਿਆ। ਉਸ ਨੇ ਇਹ ਵੀ ਹੁਕਮ ਦਿੱਤਾ ਕਿ ਇਹ ਦਰੱਖਤ ਕਿਤੇ ਭੱਜ ਨਾ ਜਾਵੇ, ਇਸ ਲਈ ਇਸ ਨੂੰ ਜੰਜ਼ੀਰਾਂ ਨਾਲ ਬੰਨ੍ਹ ਦਿੱਤਾ ਜਾਵੇ। 121 ਸਾਲਾਂ ਬਾਅਦ ਅੱਜ ਵੀ ਇਹ ਦਰੱਖਤ ਉਸੇ ਤਰ੍ਹਾਂ ਜੰਜ਼ੀਰਾਂ ਨਾਲ ਜਕੜਿਆ ਪਿਆ ਹੈ। ਇਸ ਰੁੱਖ ਤੋਂ ਜੰਜ਼ੀਰਾਂ ਨੂੰ ਇਸ ਲਈ ਨਹੀਂ ਹਟਾਇਆ ਗਿਆ ਤਾਂ ਕਿ ਅੰਗਰੇਜ਼ੀ ਰਾਜ ਦੇ ਜ਼ੁਲਮ ਨੂੰ ਦਰਸਾਇਆ ਜਾ ਸਕੇ।
ਸਥਾਨਕ ਲੋਕਾਂ ਦਾ ਕਹਿਣਾ ਹੈ ਕਿ ਇਸ ਦਰੱਖਤ ਨੂੰ ਬ੍ਰਿਟਿਸ਼ ਰਾਜ ਦੇ ਕਈ ਸਾਰੇ ਕਾਲੇ ਕਾਨੂੰਨਾਂ 'ਚੋਂ ਇੱਕ ਤਹਿਤ ਗ੍ਰਿਫਤਾਰ ਕੀਤਾ ਗਿਆ ਸੀ। ਉਸ ਤੋਂ ਹੈਰਾਨੀ ਵਾਲੀ ਗੱਲ ਇਹ ਹੈ ਕਿ ਇਹ ਕਾਨੂੰ ਅੱਜ ਵੀ ਉੱਤਰ-ਪੱਛਮੀ ਪਾਕਿਸਤਾਨ ਵਿੱਚ ਲਾਗੂ ਹੈ। ਸਾਲ 2008 ਵਿੱਚ ਪਾਕਿਸਤਾਨ ਦੇ ਤਤਕਾਲੀ ਪ੍ਰਧਾਨ ਮੰਤਰੀ ਯੂਸੁਫ ਰਜ਼ਾ ਗਿਲਾਨੀ ਨੇ ਇਸ ਕਾਨੂੰਨ ਨੂੰ ਰੱਦ ਕਰਨ ਦੀ ਇੱਛਾ ਜ਼ਾਹਰ ਕੀਤੀ ਸੀ, ਪਰ ਉਹ ਪੂਰੀ ਨਹੀਂ ਸੀ ਹੋ ਸਕੀ।