* ਅਮਰੀਕੀ ਯੂਨੀਵਰਸਿਟੀ ਨੇ ਅਧਿਐਨ 'ਚ ਕੀਤਾ ਖੁਲਾਸਾ, ਅਮਿਤਾਭ ਬੱਚਨ, ਨਾਰਾਇਣ ਮੂਰਤੀ, ਸਚਿਨ ਤੇ ਸ੍ਰੀ ਸ੍ਰੀ ਰਵੀ ਸ਼ੰਕਰ ਤੱਕ ਰਸਾਈ ਕੀਤੀ
ਵਾਸ਼ਿੰਗਟਨ, 25 ਮਾਰਚ (ਪੋਸਟ ਬਿਊਰੋ)- ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੇ ਸਾਲ 2014 ਦੀਆਂ ਆਮ ਚੋਣਾਂ ਮੌਕੇ ਆਪਣੀ ਚੋਣ ਇੱਛਾਵਾਂ ਨੂੰ ਪੂਰੀ ਕਰਨ ਅਤੇ ਟਵਿੱਟਰ 'ਤੇ ਆਪਣੀ ਹਾਜ਼ਰੀ ਤੇ ਘੇਰਾ ਵਧਾਉਣ ਲਈ ਅਮਿਤਾਭ ਬੱਚਨ ਤੇ ਸਚਿਨ ਤੇਂਦੁਲਕਰ ਸਮੇਤ ਹੋਰ ਕਈ ਉਘੀਆਂ ਹਸਤੀਆਂ ਦਾ ਸਹਾਰਾ ਲਿਆ ਸੀ। ਇਹ ਦਾਅਵਾ ਅਮਰੀਕੀ ਯੂਨੀਵਰਸਿਟੀ ਵੱਲੋਂ ਕੀਤੇ ਅਧਿਐਨ 'ਚ ਕੀਤਾ ਗਿਆ ਹੈ।
ਮਿਸ਼ੀਗਨ ਯੂਨੀਵਰਸਿਟੀ ਵਿੱਚ ਸਹਾਇਕ ਪ੍ਰੋਫੈਸਰ ਜੋਇਓਜੀਤ ਪਾਲ ਨੇ ਇਸ ਨਤੀਜੇ 'ਤੇ ਪੁੱਜਣ ਲਈ ਟਵਿੱਟਰ ਹੈਂਡਲ @ ਨਰਿੰਦਰ ਮੋਦੀ ਵੱਲੋਂ ਫਰਵਰੀ 2009 ਤੋਂ ਅਕਤੂਬਰ 2015 ਦੇ ਅਰਸੇ ਦੌਰਾਨ ਕੀਤੇ ਨੌਂ ਹਜ਼ਾਰ ਤੋਂ ਵੱਧ ਟਵੀਟਾਂ ਦੀ ਘੋਖ ਕੀਤੀ ਹੈ।
ਅਧਿਐਨ ਮੁਤਾਬਕ ਮੋਦੀ ਨੇ ਸਾਲ 2009 ਵਿੱਚ ਜਦੋਂ ਟਵੀਟ ਕਰਨਾ ਸ਼ੁਰੂ ਕੀਤਾ ਤਾਂ ਉਹ ਭਾਰਤ ਦੇ ਉਨ੍ਹਾਂ ਕੁਝ ਗਿਣੇ ਚੁਣੇ ਆਗੂਆਂ ਵਿੱਚ ਸ਼ੁਮਾਰ ਸਨ, ਜੋ ਸੋਸ਼ਲ ਮੀਡੀਆ ਮੰਚਾਂ 'ਤੇ ਸਰਗਰਮ ਸਨ। ਅਕਤੂਬਰ 2012 ਤੱਕ ਸ੍ਰੀ ਮੋਦੀ ਦੇ ਟਵਿੱਟਰ 'ਤੇ ਦਸ ਲੱਖ ਤੋਂ ਵੱਧ ਫੌਲੋਅਰਜ਼ ਸਨ।
ਮੌਜੂਦਾ ਸਮੇਂ ਟਵਿੱਟਰ 'ਤੇ ਉਨ੍ਹਾਂ ਨੂੰ 4.6 ਕਰੋੜ ਤੋਂ ਵੱਧ ਲੋਕ ਫੌਲੋ ਕਰਦੇ ਹਨ। ਪਾਲ ਮੁਤਾਬਕ ਭਾਰਤ ਵਿੱਚ ਸੋਸ਼ਲ ਮੀਡੀਆ ਦੇ ਵਿਸਥਾਰ ਦੇ ਨਾਲ ਹੀ ਸਿਆਸੀ ਆਗੂ ਵਜੋਂ ਮੋਦੀ ਦਾ ਉਭਾਰ ਹੋਇਆ ਹੈ। ਮੋਦੀ ਵੱਲੋਂ ਕੀਤੇ ਟਵੀਟਾਂ ਦੀ ਘੋਖ ਪੜਤਾਲ ਤੋਂ ਖੋਜਾਰਥੀਆਂ ਨੇ ਪਤਾ ਲਾਇਆ ਹੈ ਕਿ ਇਨ੍ਹਾਂ ਵਿੱਚ 414 ਅਜਿਹੇ ਮੌਕੇ ਸਨ ਜਿਨ੍ਹਾਂ ਵਿੱਚ ਉਘੀਆਂ ਹਸਤੀਆਂ ਦਾ ਕਈ-ਕਈ ਵਾਰ ਜ਼ਿਕਰ ਸੀ।
ਪਾਲ ਨੇ ਕਿਹਾ ਕਿ ਮੋਦੀ ਵੱਲਂ ਛੇ ਸਾਲਾਂ ਦੌਰਾਨ ਕੀਤੇ ਟਵੀਟਾਂ ਦੇ ਅਧਿਐਨ ਤੋਂ ਤਿੰਨ ਪੜਾਅ ਸਾਹਮਣੇ ਆਏ ਹਨ। ਪਹਿਲੇ ਪੜਾਅ ਵਿੱਚ ਮੋਦੀ ਨੇ ਕੌਮੀ ਪੱਧਰ 'ਤੇ ਅਜਿਹੀ ਦਿੱਖ ਬਣਾਉਣ ਦਾ ਯਤਨ ਕੀਤਾ, ਜੋ ਸਾਰਿਆਂ ਨੂੰ ਸਵੀਕਾਰ ਹੋਵੇ। ਦੂਜੇ ਪੜਾਅ ਵਿੱਚ ਉਨ੍ਹਾਂ ਅਮਿਤਾਭ ਬੱਚਨ, ਕਾਰੋਬਾਰੀ ਨਰਾਇਣ ਮੂਰਤੀ, ਕ੍ਰਿਕਟਰ ਸਚਿਨ ਤੇਂਦੁਲਕਰ ਤੇ ਅਧਿਆਤਮਕ ਆਗੂ ਸ੍ਰੀ ਸ੍ਰੀ ਰਵੀ ਸ਼ੰਕਰ ਜਿਹੀਆਂ ਉਘੀਆਂ ਸ਼ਖਸੀਅਤਾਂ ਤੱਕ ਰਸਈ ਕੀਤੀ। ਤੀਜੇ ਪੜਾਅ ਵਿੱਚ ਮੋਦੀ ਨੇ ਚੋਣਾਂ ਮਗਰੋਂ ਆਪਣੀਆਂ ਪਹਿਲਕਦਮੀਆਂ ਨੂੰ ਪ੍ਰਚਾਰਨ ਵਾਲੀਆਂ ਹਸਤੀਆਂ ਨੂੰ ਚੈਂਪੀਅਨਜ਼ ਕਰਾਰ ਦਿੱਤਾ।
ਪਾਲ ਨੇ ਕਿਹਾ ਕਿ ਸੋਸ਼ਲ ਮੀਡੀਆ ਵਰਤੋਂਕਾਰਾਂ ਨੂੰ ਭਾਵੇਂ ਇਸ ਗੱਲ ਦਾ ਇਲਮ ਨਹੀਂ ਕਿ ਮੋਦੀ ਅਦਾਕਾਰਾ ਦੀਪਿਕਾ ਪਾਦੂਕੋਨ ਨੂੰ ਜਾਣਦੇ ਹਨ, ਪਰ ਉਨ੍ਹਾਂ ਦੇ ਟਵੀਟ ਇਸ ਦਾ ਭੁਲੇਖਾ ਜ਼ਰੂਰ ਪਾਉਂਦੇ ਹਨ।