ਲੰਡਨ, 25 ਮਾਰਚ (ਪੋਸਟ ਬਿਊਰੋ)- ਭਾਰਤੀ ਅਰਬਪਤੀ ਯੂਸੁਫ ਅਲੀ ਕਾਦੇਰ ਨੇ ਸਕਾਟਲੈਂਡ ਯਾਰਡ ਦੀ ਇਮਾਰਤ ਨੂੰ ਆਲੀਸ਼ਾਨ ਹੋਟਲ ਵਿੱਚ ਬਦਲ ਦਿੱਤਾ ਹੈ। ਇਸ ਨੂੰ ਇਸੇ ਸਾਲ ਦੇ ਅੰਤ ਵਿੱਚ ਖੋਲ੍ਹੇ ਜਾਣ ਦੀ ਤਿਆਰੀ ਹੈ। ਕਾਦੇਰ ਨੇ ਗ੍ਰੇਟ ਸਕਾਟਲੈਂਡ ਯਾਰਡ ਨੂੰ ਸਾਲ 2015 ਵਿੱਚ 11 ਕਰੋੜ ਪੌਂਡ ਵਿੱਚ ਖਰੀਦ ਲਿਆ ਸੀ।
ਲੰਡਨ ਸ਼ਹਿਰ ਵਿੱਚ ਪੁਲਸ 1890 ਤੱਕ, 60 ਸਾਲ ਤੋਂ ਵੀ ਵੱਧ ਸਮੇਂ ਤੱਕ, ਇਸੇ ਇਮਾਰਤ ਤੋਂ ਕੰਮ ਚਲਾਉਂਦੀ ਰਹੀ। ਵਰਨਣ ਯੋਗ ਹੈ ਕਿ ਇਸ ਹੋਟਲ ਦੇ ਕਮਰੇ ਵਿੱਚ ਰਹਿਣ ਲਈ ਗ੍ਰਾਹਕਾਂ ਨੂੰ ਪ੍ਰਤੀ ਰਾਤ 10 ਹਜ਼ਾਰ ਪੌਂਡ ਤੱਕ ਦਾ ਕਿਰਾਇਆ ਦੇਣਾ ਪਵੇਗਾ। ਇਸ ਇਤਿਹਾਸਕ ਇਮਾਰਤ ਦੀ ਲੀਜ਼ ਦਸੰਬਰ 2013 ਵਿੱਚ ਗੇਲੀਯਾਰਡ ਹੋਮਜ਼ ਦੇ ਨਾਂਅ ਕਰ ਦਿੱਤੀ ਗਈ ਸੀ। ਰੱਖਿਆ ਮੰਤਰਾਲੇ ਵਾਸਤੇ ਪੈਸੇ ਇਕੱਠੇ ਕਰਨ ਲਈ ਜਾਇਦਾਦਾਂ ਨੂੰ ਵੇਚਣ ਦੇ ਯਤਨਾਂ ਹੇਠ ਇਹ ਕੰਮ ਕੀਤਾ ਗਿਆ ਸੀ। ਇਸ ਤੋਂ ਬਾਅਦ ਕੇਰਲਾ ਦੇ ਮੂਲ ਦੇ ਯੂਸੁਫ ਅਲੀ ਕਾਦੇਰ ਨੇ 2015 ਵਿੱਚ ਗੇਲੀਯਾਰਡ ਹੋਮਜ਼ ਤੋਂ ਇਮਾਰਤ ਖਰੀਦ ਲਈ ਅਤੇ ਇਸ ਨੂੰ ਹੋਟਲ ਦਾ ਰੂਪ ਦੇਣ ਵਿੱਚ 7.5 ਕਰੋੜ ਪੌਂਡ ਦੀ ਲਾਗਤ ਆਈ ਸੀ। ਇਹ ਟ੍ਰੈਫਲਗਰ ਸਕੁਆਇਰ ਦੇ ਨੇੜੇ ਹੈ। ਇਸ ਵਿੱਚ 150 ਤੋਂ ਜ਼ਿਆਦਾ ਕਮਰੇ ਹਨ।