ਬਮਾਕੋ, 25 ਮਾਰਚ (ਪੋਸਟ ਬਿਊਰੋ) : ਸੰਯੁਕਤ ਰਾਸ਼ਟਰ ਵੱਲੋਂ ਦਿੱਤੀ ਗਈ ਜਾਣਕਾਰੀ ਅਨੁਸਾਰ ਮਾਲੀ ਦੇ ਕੇਂਦਰੀ ਪਿੰਡ ਵਿੱਚ ਹੋਏ ਕਤਲੇਆਮ ਵਿੱਚ 134 ਵਿਅਕਤੀ ਮਾਰੇ ਗਏ। ਐਤਵਾਰ ਨੂੰ ਜਾਰੀ ਨਵੀਂ ਵੀਡੀਓ ਅਨੁਸਾਰ ਇੱਕ ਪਾਸੇ ਘਰ ਸੜ ਰਹੇ ਸਨ ਤੇ ਦੂਜੇ ਪਾਸੇ ਲੋਕ ਜ਼ਮੀਨ ਉੱਤੇ ਲਿਟੇ ਹੋਏ ਸਨ।
ਪਿਛਲੇ ਸਾਲ ਕੇਂਦਰੀ ਮਾਲੀ ਉੱਤੇ ਹੋਏ ਹਮਲਿਆਂ ਲਈ ਨਸਲੀ ਡੌਗੌਨ ਮਿਲੀਸ਼ੀਆ ਨੂੰ ਜਿੰ਼ਮੇਵਾਰ ਠਹਿਰਾਇਆ ਗਿਆ ਸੀ। ਇਸੇ ਹੀ ਮਿਲੀਸ਼ੀਆ ਨੂੰ ਹੀ ਸ਼ਨਿੱਚਰਵਾਰ ਨੂੰ ਨਸਲੀ ਪਿੰਡ ਪੇਊਹਲ ਉੱਤੇ ਕੀਤੇ ਗਏ ਹਮਲੇ ਲਈ ਵੀ ਜਿ਼ੰਮੇਵਾਰ ਮੰਨਿਆ ਜਾ ਰਿਹਾ ਹੈ। ਪੇਊਹਲ ਦੇ ਇੱਕ ਗਰੁੱਪ ਤਾਬੀਤਾਲ ਪੁਲਾਕੂ ਨੇ ਦਾਅਵਾ ਕੀਤਾ ਕਿ ਓਗੋਸੋਗੂ ਵਿੱਚ ਹਮਲੇ ਦਾ ਸਿ਼ਕਾਰ ਹੋਣ ਵਾਲਿਆਂ ਵਿੱਚ ਗਰਭਵਤੀ ਔਰਤਾਂ, ਨਿੱਕੇ ਬੱਚੇ, ਬਜ਼ੁਰਗ ਵੀ ਸ਼ਾਮਲ ਸਨ।
ਨਵੀਂ ਫੁਟੇਜ ਤੋਂ ਇਹ ਵੀ ਪਤਾ ਲੱਗਿਆ ਹੈ ਕਿ ਸ਼ਨਿੱਚਰਵਾਰ ਨੂੰ ਹੋਏ ਇਸ ਹਮਲੇ ਵਿੱਚ ਕਈ ਲੋਕ ਤਾਂ ਆਪਣੇ ਘਰਾਂ ਵਿੱਚ ਹੀ ਸੜ ਕੇ ਮਾਰੇ ਗਏ। ਮਾਲੀ ਦੀ ਰਾਜਧਾਨੀ ਬਾਮਾਕੋ ਵਿੱਚ ਸੰਯੁਕਤ ਰਾਸ਼ਟਰ ਦੀ ਸੁਰੱਖਿਆ ਕਾਉਂਸਲ ਦੇ ਮਾਲੀ ਦੌਰੇ ਉੱਤੇ ਆਏ ਪ੍ਰਧਾਨ ਫਰੈਂਕੌਇਸ ਡੇਲਾਤਰੇ ਨੇ ਇਸ ਕਤਲੇਆਮ ਦੀ ਨਿਖੇਧੀ ਕੀਤੀ। ਇਸ ਘਟਨਾ ਵਿੱਚ ਘੱਟੋਘੱਟ 55 ਲੋਕ ਜ਼ਖ਼ਮੀ ਵੀ ਹੋ ਗਏ। ਮਾਲੀ ਵਿੱਚ ਸੰਯੁਕਤ ਰਾਸ਼ਟਰ ਮਿਸ਼ਨ ਦੇ ਅਧਿਕਾਰੀਆਂ ਨੇ ਆਖਿਆ ਕਿ ਜਿਹੜੇ ਜ਼ਖ਼ਮੀ ਲੋਕ ਹਨ ਉਨ੍ਹਾਂ ਨੂੰ ਜਲਦ ਇੱਥੋਂ ਬਾਹਰ ਕੱਢ ਲਿਆ ਜਾਵੇਗਾ।
ਨਿਊ ਯੌਰਕ ਵਿੱਚ ਸੰਯੁਕਤ ਰਾਸ਼ਟਰ ਦੇ ਸਕੱਤਰ ਜਨਰਲ ਵੱਲੋਂ ਵੀ ਹਮਲੇ ਦੀ ਨਿਖੇਧੀ ਕੀਤੀ ਗਈ ਤੇ ਉਨ੍ਹਾਂ ਮਾਲੀ ਦੇ ਅਧਿਕਾਰੀਆਂ ਤਂੋ ਮਾਮਲੇ ਦੀ ਜਲਦ ਤੋਂ ਜਲਦ ਜਾਂਚ ਕਰਨ ਦੀ ਵੀ ਮੰਗ ਕੀਤੀ।