ਇਨ੍ਹੀਂ ਦਿਨੀਂ ਸੱਚੀਆਂ ਘਟਨਾਵਾਂ ਅਤੇ ਜੰਗ 'ਤੇ ਆਧਾਰਤ ਫਿਲਮਾਂ ਬਣ ਰਹੀਆਂ ਹਨ। ‘ਉੜੀ : ਦ ਸਰਜੀਕਲ ਸਟਰਾਈਕ’ ਦੇ ਬਾਅਦ ਅਕਸ਼ੈ ਕੁਮਾਰ ਦੀ ਸਾਰਾਗੜ੍ਹੀ ਜੰਗ 'ਤੇ ਆਧਾਰਤ ਫਿਲਮ ‘ਕੇਸਰੀ' ਰਿਲੀਜ਼ ਹੋ ਰਹੀ ਹੈ। ਅੱਗੋਂ ਫਿਰ ਅਜੈ ਦੇਵਗਨ ਵੀ ਜੰਗ ਉਤੇ ਆਧਾਰਤ ਫਿਲਮ ਦਾ ਹਿੱਸਾ ਬਣਨ ਜਾ ਰਹੇ ਹਨ, ਜੋ ਸੱਚੀ ਘਟਨਾ 'ਤੇ ਆਧਾਰਤ ਹੈ। ਇਹ ਭਾਰਤ ਦੇ ਸਭ ਤੋਂ ਮਹੱਤਵ ਪੂਰਨ ਯੁੱਧ ਦੀ ਕਹਾਣੀ ਹੈ।
ਟੀ ਸੀਰੀਜ਼ ਦੇ ਸਹਿਯੋਗ ਨਾਲ ਬਣ ਰਹੀ ਇਸ ਫਿਲਮ ਦਾ ਨਾਂਅ ‘ਭੁਜ : ਦ ਪ੍ਰਾਈਡ ਆਫ ਇੰਡੀਆ’ ਹੈ। ਇਸ ਵਿੱਚ ਅਜੈ ਸਕਵਾਡਰਨ ਲੀਡਰ ਵਿਜੈ ਕਾਰਣਿਕ ਦੀ ਭੂਮਿਕਾ ਨਿਭਾਉਣਗੇ। ਉਹ ਸਾਲ 1971 ਦੇੇ ਇੰਡੋ-ਪਾਕਿ ਜੰਗ ਵੇਲੇ ਭੁਜ ਏਅਰਪੋਰਟ ਦੇ ਇੰਚਾਰਜ ਸਨ। ਜੰਗ ਦੌਰਾਨ ਪਾਕਿਸਤਾਨ ਨੇ ਭੁਜ ਦੀ ਹਵਾਈ ਪੱਟੀ ਨੂੰ ਬੰਬ ਨਾਲ ਨਸ਼ਟ ਕਰ ਦਿੱਤਾ ਸੀ। ਤਦ ਕਾਰਣਿਕ ਅਤੇ ਉਸ ਦੀ ਟੀਮ ਨੇ ਗੁਜਰਾਤ ਦੇ ਭੁਜ ਵਿੱਚ ਨਸ਼ਟ ਹੋਏ ਏਅਰਫੋਰਸ ਏਅਰਸਟਿ੍ਰਪ ਨੂੰ ਤਿੰਨ ਸੌ ਸਥਾਨਕ ਔਰਤਾਂ ਦੀ ਮਦਦ ਨਾਲ ਮੁੜ ਉਸਾਰਿਆ ਸੀ, ਤਾਂ ਕਿ ਭਾਰਤੀ ਫੌਜੀ ਸੁਰੱਖਿਅਤ ਲੈਂਡਿੰਗ ਕਰ ਸਕਣ। ਫਿਲਮ ਦਾ ਨਿਰਦੇਸ਼ਨ ਤੇ ਲੇਖਕ ਅਭਿਸ਼ੇਕ ਦੁਧੈਯਾ ਕਰਨਗੇ। ਫਿਲਮ ਵਿੱਚ ਅਭਿਨੇਤਰੀ ਬਾਰੇ ਅਜੇ ਐਲਾਨ ਨਹੀਂ ਕੀਤਾ ਗਿਆ।